Brigada Zjarrfikëse e Ferizajt me mungesë të punëtorëve dhe të kushteve për punë

Ndërrimi i qeverisë qendrore, por edhe i asaj lokale, nuk po e ndryshon për të mirë gjendjen e zjarrfikësve ferizajas. Brigada e Zjarrfikësve të Ferizajt, për vite të tëra përballet me probleme të shumta, duke filluar nga mungesa e punëtorëve e deri tek mungesa e kushteve të domosdoshme për punë. Kështu thotë komandanti i kësaj brigade, Halil Osmani, duke theksuar se kjo brigadë përbëhet nga vetëm 20 punëtorë, ku 12 prej tyre janë të moshës mbi 60 vjeçare.

“Numrin e punëtorëve e kam në gjendje të mjerueshme, kam 5 zjarrfikësa që kanë dalë në pension dhe nuk janë zëvendësuar ende, por politika e bën punën e vet dhe e zë vendin e punës nëpër kuvende e buxhetin nuk e ka që të paguaj dy persona dhe tjetra është shumë e madhe, punëtorët zjarrfikës që i kam janë të moshës së shtyer mbi 60 vjeçar, kanë sëmundje të lloj-llojshme dhe me këta zjarrfikës të moshës së shtyer e me sëmundje është  e pamundur të jesh i suksesshëm. E kemi një automjet e kemi blerë para dy viteve  me shkallë hidraulike 30 metra lartësi, është prishë që një vit nuk po mundemi me ia gjet pjesën që është defekt dhe kemi nevojë për atë automjet pasi e kemi të pamundur me u ngjitë në katet lartë, e kemi njërin automjet, por ai është në një gjatësi prej 12 metrave,  por nuk ka lartësi të mirë dhe  e kemi problem me intervenu në katet 7-8”, tha Osmani.

Osmani, thotë se tërë këto probleme nuk po dinë kujt t’ia adresojnë.

“Kena metë as me komunë as me ministri, shkojna në ministri na thonë ju i keni mjetet në Kuvend Komunal, në Kuvend Komunal na thonë ju jeni me ministri,  e kena metë as andej as këndej,  nuk e di se si do të zgjidhet, por është shumë e nevojshme që të zgjidhet statusi i zjarrfikësve  që të vendoset ose me ministri ose me komunë, unë nuk e di se si do t’ia dalim, por këta që janë në krye të shtetit e kuvendeve komunale do të mundohen të na ndihmojnë neve, por edhe qytetarëve, pasi gjendja nuk është e mirë dhe do të kemi telashe të shumta këtë vit”, tha Osmani.

Për Brigadën e Zjarrfikësve ka disa vite që është ndërtuar objekti i ri, por ai asnjëherë nuk u shfrytëzua, meqë parashihej që punëtorët të ndaheshin në të dyja objektet, mirëpo numri i vogël i zjarrfikësve e ka pamundësuar një gjë të tillë.

Leave a Comment

Your email address will not be published.