Digjet fabrika e përpunimit të plastikës, dëmet mbi 40 mijë euro

Gjithçka që kishte brenda saj u bë shkrumb e hi pas zjarrit të mbrëmshëm  i cili kaploi fabrikën e vëllezërve Salihu nga fshati Slivovë, ku bëhej përpunimi i plastikës.

Safet Salihu, njëri nga pronarët e kësaj fabrike, thotë se dëmet janë të konsiderueshme.

“Mbikëqyrësi i pyllit e ka parë dhe e ka thirrë policinë, mandej një qytetar e ka thirrë vëllaun i ka thënë që është duke u djegur diçka te lokali, mandej vëllau më ka thirrë kur kam ardhë flaka vetëm se  e kishte mbuluar, ne nuk banojmë këtu, i kemi shtëpitë më larg, diku rreth orës 7 vëllau e ka mbyllë lokalin, dëmi është shumë i madh diku rreth 40-50 mijë euro, makineritë çka janë kanë 4 copa janë djegur, objekti është shkatërruar. Shkaqet nuk po i dimë, po dyshojmë vetëm tek rryma, por po presim nga policia dhe KEDS-i çka po na thonë”, tha Salihu.

Ndërsa, në Policinë Rajonale të Ferizajt, thonë se së bashku me njësitet tjera relevante janë duke hetuar shkaktarin e zjarrit.

“Mbrëmë rreth orës 21:50 minuta kemi marrë një informatë se në fshatin Slivovë një fabrikë për përpunimin e plastikës ka marrë flakë, njësitet policore kanë dalë menjëherë në vend të ngjarjes, zjarrfikësit më vonë dhe punëtorët e KEDS-it dhe zjarri është lokalizuar dhe hetimet janë duke vazhduar, nuk ka persona të lënduar dhe presim raportet nga njësitet e zjarrfikësit dhe raportet e KEDS-it, për momentin nuk i dimë shkaqet, ato do t’i sqarojnë ekspertët e zjarreve dhe KEDS-it”, tha zëdhënësi Agim Gashi.

Kjo fabrikë e cila funksiononte që 5 vite, sipas pronarëve, ishte burim i vetëm ekzistencial i familjes Salihu.

Leave a Comment

Your email address will not be published.