Kosovë

Mbahet ”Java e Kimisë” në kolegjin “Mehmet Akif”

Published

6 years ago

11 October, 2019

Me aktivitete të ndryshme në kolegjin “Mehmet Akif” në Lipjan, nga e hëna deri te premtën është mbajtur ”Java e Kimisë”. Profesoresha e lëndës së kimisë në këtë kolegj Xhemajlie Llugiqi, duke folur rreth këtyre aktiviteteve të nxënësve, u shpreh e kënaqur që punon me këta nxënës.

“Është kënaqësi e veçantë të punoj me këtë kategori të nxënësve, sepse kolegji ynë “Mehmet Akif” sivjet për herë të parë ka hapur dyert për nxënësit e klasës së gjashtë, shtatë, tetë dhe nëntë, prandaj edhe e kemi një vizion të ri të punës së re me këtë kategori të veçantë që na janë bashkëngjitur këtë vit. Mund t’iu them që për këtë javë me rezultatet që kanë treguar me optimizmin, me kreativitetin e tyre që na kanë ofru, të pavarur, na kanë impresionu, në veçanti mua si mësimdhënëse në lëndën e kimisë. Do të thotë kolegji sivjet përpos shkollës së mesme, klasës së dhjetë, njëmbëdhjetë dhe dymbëdhjetë në gjirin e vet ka përfshi edhe këta nxënës, një pjesë e tyre kanë ardhur si bursistë përmes konkurseve që kanë qenë të organizuara prej shkollës dhe në një formë kemi mbledhur një numër të konsiderushëm të nxënësve të jashtëzakonshëm të mirë që janë në mesin tonë“, u shpreh ajo.

Ndërkaq, Bujar Mehmeti, kryetar i Këshillit të Nxënësve në kolegjin “Mehmet Akif”, tha se këto aktivitete u japin mundësi të mësojnë përtej asaj që mësojnë në libra.

“E patë edhe vet nga afër për punën dhe mënyrën se si kalohet kjo periudhë ku nxënësit me projektet e tyre personale krijojnë ide të reja i sjellin në shkollë, mirëpo edhe prej atyre mundësive çka i kemi këtu i përdorin edhe ato mjete që i kanë ketu për me formu eksperimente, pse jo për me pa më shumë përtej asaj çka mësohet në libër, përtej asaj teorisë”, tha Mehmeti.

Më tej, Mehmeti na tregoi se si një nxënës e kalon ditën në këtë kolegj.

“Prej mëngjesit kur edhe mësimi fillon në orën 8:30 deri në orën 3 të pasditës, nxënësit varësisht nga numri i orëve, gjashtë apo shtatë brenda ditës, janë pushimet brenda orëve, në mes të dy orëve të mësimit, nxënësit gjatë orës së mësimit e përfundojnë mësimin në aspektin teorik, mundohen që pjesërisht me kalu edhe në pjesën praktike, mirëpo zakonisht lëndët shkencore si fizika, kimia, biologjia, pastaj lëndët teorike, mund të ndodhë që njëra nga orët që zhvillohet gjatë javës tërësisht të kalohet në njërin prej laboratorëve të cilët gjenden në shkollë, për shembull lënda e kimisë, nëse tri orë mësimore për lëndën e kimisë janë të caktuara brenda një jave, dy orë përdoren brenda klasës së kimisë ndërsa në njërën prej orëve profesoresha me nxënësit vje këtu në laborator dhe e zhvillojnë procesin praktik të atyre që i kanë mësuar veçse në teori“, u shpreh mes tjerash Mehmeti.

Në kampusin e kolegjit “Mehmet Akif” në Lipjan, mësimet këtë vit i ndjekin mbi 300 nxënës.

Kosovë

Një muaj paraburgim ndaj ish-pjesëtarit të MPB-së serbe, i dyshuar për krime lufte në Kosovë

Published

1 day ago

07 April, 2026

Redaksia

Gjykata Themelore në Prishtinë ka caktuar masën e paraburgimit prej një muaji për një ish-pjesëtar të Ministrisë së Punëve të Brendshme të Serbisë, i arrestuar nën dyshime për krime lufte në Kaçanik.

A.D. u arrestua më 4 prill dhe sipas Prokurorisë Speciale të Kosovës, ai ishte pjesëtar i MPB-së serbe në Ferizaj dhe polic i trafikut në rajonin e Kaçanikut në kohën kur dyshohet se ka kryer krime në mars të vitit 1999 në fshatin Ivajë dhe fshatrat përreth të Kaçanikut.

Sipas Prokurorisë, ai dyshohet se “në bashkëkryerje me persona të tjerë ende të paidentifikuar të forcave policore, ushtarake serbe, më 09.03.1999, gjatë një aksioni të organizuar policor ushtarak kundër popullsisë civile shqiptare, i detyroi banorët të largohen nga shtëpitë e tyre, të cilat më pas u dogjën dhe u shkatërruan”.

Prokuroria po ashtu ka thënë se ai dyshohet për rrahjen dhe torturimin “në mënyrë brutale, çnjerëzore, fizike dhe psikike” dhe shkaktimin e “lëndimeve të rënda trupore” të 13 civilëve gjatë marrjes në pyetje në stacionin policor në Kaçanik.

Këta civilë ishin në mesin e 91 meshkuj që forcat serbe i kishin ndarë prej rreth 400 burrave, grave, pleqve e fëmijëve të grumbulluar për t’u dërguar në stacionin policor në Kaçanik, sipas Prokurorisë Speciale të Kosovës.

Arrestimi i A.D. nxiti reagime nga Zyra për Kosovën në Qeverinë serbe, që tha se ai ishte një polic në pension nga një fshat i Prizrenit, duke e cilësuar arrestimin e tij si të motivuar “politikisht”.

Arrestimi i fundit vjen pak javë pasi Gjykata në Prishtinë shqiptoi dënim me burgim ndaj dy ish-pjesëtarëve të forcave policore dhe ushtarake të Serbisë për krime lufte në Kosovë gjatë luftës së viteve 1998-99.

Gjykata në Prishtinë i dënoi më 18 mars Zoran Kostiqit me 15 vjet burgim, ndërsa Dragan Milloviqin me 7 vjet burgim.

Së voni, autoritetet kosovare kanë arrestuar të dyshuar të shumtë dhe kanë ngritur një sërë aktakuzash për krime lufte në Kosovë.

Ndërkaq, që nga përfundimi i luftës, dhjetëra të dyshuar janë dënuar për këto krime para institucioneve vendore dhe ndërkombëtare.

Fillimisht pas luftës, përkatësisht nga viti 2000 dhe 2008, krimet e luftës në Kosovë u hetuan nga Misioni i Kombeve të Bashkuara në Kosovë (UNMIK), ndërsa nga viti 2008, nga Misioni i Bashkimit Evropian për Sundim të Ligjit (EULEX).

Më 2018, EULEX-i ia dorëzoi lëndët organeve vendore të drejtësisë.

| Radio Evropa e Lirë

Kosovë

Këto janë çmimet maksimale të derivateve për sot

Published

1 day ago

07 April, 2026

Redaksia

Ministria e Industrisë, Ndërmarrësisë, Tregtisë dhe Inovacionit (MINTI) ka njoftuar se për ditën e sotme (07.04.2026) një litër naftë mund të shitet maksimumi për 1.88 €, 1 litër benzinë 1.46 € derisa 1 litër gaz mund të shitet maksimumi 0.74 €.

MINTI u bën thirrje të gjithë operatorëve ekonomikë që të zbatojnë me përpikëri vendimin e ri të marrë më datë 05.04.2026. Shkeljet e këtij vendimi do të trajtohen në përputhje me legjislacionin në fuqi.

Kosovë

Visar Azemi dorëzon në polici dëshmitë për njehsorët e rrymës

Published

1 day ago

07 April, 2026

Redaksia

Sekretari organizativ në LDK, Visar Azemi, sot ka dorëzuar në polici dëshmitë rreth njehsorëve elektrikë.

Ai u tha mediave se dosjen me fakte e dorëzoi pas ftesës nga Drejtoria e Krimeve Ekonomike për të dëshmuar rreth dyshimeve për mosfunksionimin e rregullt të njehsorëve elektrik të KEDS-it.

Azemi tha se skandali me njehsorët elektrik po tentohet të minimizohet nga KEDS-i dhe Ministria e Industrisë, por meqë prokuroria ka autorizuar fillimin e hetimeve, ai shpreson që ky proces të zhvillohet për të mirën e qytetarëve dhe që ata në fund të kompensohen.

“I gjithë ky skandal i madh i cili ka filluar me njehsorë elektrike po mundohet me u minimizuar edhe nga ana e KEDS-s, e fatkeqësisht edhe nga ana e Qeverisë, në këtë rast nga Ministria e Industrisë, ku akoma po manipulojnë me qytetarë, po thonë që këto devijime të cilat i kanë pranuar dhe i kanë tërheq disa njësorë elektrikë nga qytetarët, po e matin saktë sasinë, po nuk po tregojnë ku është problemi.

Pra, problemi është që energjia elektrike e cila është dashtë me u faturua me të lirën, sipas vendimit të Zyrës së Rregullatorit për Energji, është faturuar me tarifën e shtrenjtë. Qytetarët kanë prit me orë të tëra për me i vendos në funksion pajisjet e tyre, duke menduar që po e shfrytëzojnë energjinë me të lirë qysh edhe iu ka mundësuar nga Zyra e Rregullatorit të Energjisë, po në fakt ka dalë e kundërta. Kjo është dëshmia kryesore dhe ky është skandali kryesor në të cilin unë po punoj. Do ta bëj maksimumin tim për të gjetur një zgjidhje sepse qëllimi këtu është që t’iu kthehen të gjitha paratë që iu kanë marrë qytetarëve të Kosovës padrejtësisht”, tha ai.

Ditë më parë, Azemi kishte prezantuar gjetjen, sipas së cilës, nga 884 njehsorë të verifikuar, 87% e njehsorëve për matjen e energjisë elektrike faturojnë qytetarët më shtrenjtë edhe kur tarifa është me të lirën.