Ferizaj

Jepet shfaqja “Kësulëkuqja” nga nxënësit e shkollës ”Besim Rexhepi”

Published

8 years ago

26 December, 2018

“Kësulëkuqja”, është shfaqja e cila është shfaqur sot në teatrin “Adriana” në Ferizaj, nga nxënësit e shkollës fillore “Besim Rexhepi” të fshatit Komogllavë, me regji të Ali Krasniqit.

Drejtoresha e shkollës “Besim Rexhepi”, Dajete Qazimi, tha se përmes kësaj shfaqje kanë dashur që nxënësit ta përjetojnë ndjenjën e të qenit aktorë.

“Dua të falënderoj komunitetin komogllavas dhe prindërit që ua mundësuan këtyre nxënësve të vegjël ta përjetojnë magjinë e skenës dhe ta ndjejnë vetën aktorë. Këtë ide e kemi shtjelluar me regjisorin dhe më pas e kemi bërë projektin dhe po besoj se ka dalë mirë”, tha Qazimi.

Kurse, regjisori i kësaj shfaqje Ali Krasniqi, tha se ishte kënaqësi të punoj me këta fëmijë.

“Është një bashkëpunim mes meje si regjisor i shfaqjes dhe shkollës “Besim Rexhepi”, unë i falënderoj që patën besim tek unë edhe këta nxënës të cilët kanë me qenë aktorë të ardhshëm, bëhet fjalë për shfaqjen “Kësulëkuqja” e vëllezërve Grim, e kam adaptuar brenda kësaj hapësire me skenografi të Skënder Bedriut, me ndihmën e Hajrullah Elezit dhe gjithë të tjerëve, jam kënaqur me këta fëmijë dhe për mua ka qenë një eksperiencë e jashtëzakonshme”, tha Krasniqi.

Fëmijët që ishin pjesë e kësaj shfaqje u shprehën të lumtur për rolet që patën.

“Rolin e kam pasur të ujkut, dhe më ka pëlqy shumë shfaqja”, tha Erdi Osmani, nxënës.

“Kam pasur rolin e lepurit, shfaqja më ka pëlqy shumë dhe nuk e kam menduar se ka me dalë kaq mirë“, tha nxënësi Alt Metushi.

“Unë e kam pasur rolin e kësulëkuqes, më ka pëlqy shumë roli i kësulëkuqes, gjithmonë kam pasur dëshirë të aktroj dhe kjo m’u realizua”, tha Gresa Beqiri, nxënëse.

Shfaqja “Kësulëkuqja”, u pëlqye shumë nga publiku, që kryesisht ishin nxënës të shkollës ”Besim Rexhepi”.

“Më ka pëlqy shumë shfaqja, unë e di tërë hitorinë e kësulëkuqes, por sot më pëlqeu edhe më shumë”, tha Tara Abazi.

“Shumë më ka pëlqy kjo përrallë, ishte shumë mirë”, tha një fëmijë tjetër.

U bë e ditur se kjo shfaqje e nxënësve të shkollës fillore “Besim Rexhepi”, do të ngjitet edhe në skenat e teatrove të tjerë të Kosovës.

Ferizaj

Festim Ramadani dënohet me 16 vjet burgim për vrasjen në Bibaj të Ferizajt

Published

2 hours ago

01 October, 2026

Redaksia

Gjykata Themelore në Ferizaj, departamenti për Krime të Rënda, e ka shpallur fajtor ish-policin Festim Ramadanin për veprën penale “Vrasje e rëndë”.

Ramadani është dënuar me 16 vjet burgim. Sipas aktgjykimit, në dënim do të llogaritet edhe koha e tij e kaluar në paraburgim, nga 16 gushti 2024. Dënimi do të ekzekutohet pas plotfuqishmërisë së aktgjykimit.

Sipas akuzës, ngjarja kishte ndodhur më 16 gusht 2024, rreth orës 19:21, në parkingun e oborrit të restorantit “F. Palace”, në fshatin Bibaj të Komunës së Ferizajt, gjatë një ceremonie martesore.

I pandehuri akuzohej se me dashje dhe paramendim, për motive të pretenduara familjare, kishte shtënë me një armë zyrtare automatike të policisë në drejtim të viktimës S.S., duke e privuar atë nga jeta në vendin e ngjarjes.

Gjykata ka vendosur që Festim Ramadanit t’i vazhdohet masa e paraburgimit deri në plotfuqishmërinë e aktgjykimit, por jo më gjatë se kohëzgjatja e dënimit të shqiptuar.

Kundër këtij aktgjykimi palët kanë të drejtë ankese brenda 30 ditësh nga dita e pranimit të aktgjykimit në formë të shkruar, thuhet mes tjerash në njoftim.

Ferizaj

Një burrë theret me kaçavidë nga dy persona në Ferizaj

Published

1 week ago

22 September, 2026

Redaksia

Një burrë është therur me kaçavidë nga dy persona të panjohur në Ferizaj.

Rasti është raportuar mbrëmjen e së hënës rreth orës 22:30. Sipas policisë, viktima ka pësuar lëndime të lehta trupore dhe pas trajtimit mjekësor është liruar.

Ferizaj / 21.09.2026 – 22:30.

‘Është raportuar se viktima mashkull kosovar ka kërkuar ndihmë mjekësore, pasi dyshohet se i njëjti është therur me një mjetë të mprehtë (kaçavidë) nga dy persona të panjohur. Pas tretmanit mjekësor i njëjti është liruar”, thuhet në raportin e policisë.

Ferizaj

Javën e kaluar Policia shqiptoi 1205 gjoba dhe pezulloi 30 patenta shoferi në Ferizaj

Published

1 week ago

21 September, 2026

Redaksia

Policia e Ferizajt gjatë javës së kaluar ka shqiptuar 1 mijë e 205 gjoba për kundërvajtje në trafik dhe ka pezulluar 20 patentë shoferi.

Në këtë hark kohor janë regjistruar 30 aksidente përfshirë edhe ato ku mbetën të lënduar 13 persona.

“Gjatë javës së kaluar, nga data 14-20.09.2026 janë shqiptuar 1.205 gjoba kundërvajtëse, si dhe janë pezulluar 20 patentë shoferë për shoferët e mjeteve që kanë kryer shkelje të rënda në trafik. Gjatë kësaj periudhe janë regjistruar gjithsej 30 aksidente, nga të cilat 9 aksidente me lëndime, ku kanë mbetur të lënduar 13 persona 21 aksidente me dëme materiale”- thuhet në komunikatën e së hënës (21.09.2026) të Zyrës për Informim dhe Marrëdhënie me Publikun të Policisë Rajonale të Ferizajt.