Ferizaj

”Shtëpia e Bamirësisë” bën me strehë familjen Ramadani

Published

6 years ago

19 February, 2020

Gjatë muajit tetor të vitit të kaluar pronari i “Plus Market”-it dhe organizata joqeveritare që funksionojnë në Ferizaj, vendosën një kafeteri të improvizuar në qendër të qytetit nga e cila grumbulluan para për t’ia ndërtuar shtëpinë familjes 7 anëtarëshe Ramadani nga Ferizaj, e cila jetonte në kushte të rënda banimi.

E, rezultati i kësaj iniciative u pa sot, kur familja Ramadani hyri në banesë të re.

Pronari i ”Plus Market”-it Sylejman Neziri, tha se nga iniciativa e “Shtëpisë së Bamirësisë” u grumbulluan mbi 31 mijë euro, për të cilat kontribuan nxënës, biznese e qytetarë.

“Falënderoj bashkëpronarët e firmave të ndryshme që kanë kontribuar për këtë familje, është një familje që jeton në Francë i ka dhënë 4 mijë euro, na i ka dhënë paratë që ka pasur të shkoj në haxh, po ashtu edhe nxënësit i falënderoj pasi shumicën e mjeteve i kanë mbledhur nxënësit, mbi 10 mijë euro”, tha Neziri.

Edhe iniciatorët e tjerë u shprehën se thirrjes së tyre iu bashkuan shumë grupe të shoqërisë e qytetarë dhe bashkërisht ia dolën të sigurojnë banimin për këtë familje.

“Po e përjetojmë bashkërisht me familjen dhe është një emocion i jashtëzakonshëm për të gjithë ne. Nuk kam menduar asnjëherë që nga aktivitetet tona do të zgjidhet çështja e banimit për ndonjë familje. Falënderojmë mësuesen që na ka dhënë informacione për këtë familje dhe të gjithë nxënësit, mësuesit, bizneset dhe gjithë ekipin e ”Shtëpisë së Bamirësisë” dhe kështu kemi ardhë sot që ta ndajmë këtë gëzim së bashku”, tha Dashurie Ahmeti.

Kurse, familja Ramadani e cila jetonte tek ish-objekti i organizatës së pensionistëve, u shpreh falënderuese ndaj të gjithë atyre të cilët kontribuan që të bëhen me banesë.

“Përshëndes të gjithë që kanë qenë pjesë e aktivitetit dhe mundësuan që ne të bëhemi me shtëpi të re. Kushtet i kemi pasur mjaft të vështira, shpresoj që fëmijët e mi të bëhen dhe t’ua shpërblejnë popullit që na e mundësuan të bëhemi me banesë, falënderoj të gjithë për këtë vepër që kanë bërë“, tha Nafije Ramadani.

Inciativa të tilla u tha se nuk do të mungojnë edhe në të ardhmen.

Ferizaj

Ngritët aktakuza e parë për zgjedhjet e 28 dhjetorit

Published

1 day ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

3 days ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

2 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.