Ferizaj

Kandidatët nga Ferizaj që kanë gjasë të bëhen deputetë

Published

5 years ago

18 February, 2021

Kandidati për deputet nga Lëvizja Vetëvendosje në Ferizaj Hekuran Murati, sipas të gjitha gjasave do të jetë kandidati më i votuar në komunën e Ferizajt në këto zgjedhje.

Kur ende nuk janë numëruar votat nga diaspora dhe ato me kusht, Murati vetëm në komunën e Ferizajt ka marrë mbi 20 mijë vota.

Përpos Muratit, numër të madh të votave kanë grumbulluar edhe 7 kolegët e tij nga Lëvizja Vetëvendosje në Ferizaj, thonë përfaqësues të këtij subjekti politik.

“Kemi dyfishim të votave në Ferizaj, mbi 31 mijë vota janë të numëruara duke mos përfshirë këtu edhe votat me kusht dhe të mërgatës. 9 kandidatë që kanë qenë brenda listës së Vetëvendosjes me origjinë nga Ferizaj të njëjtit do të jenë deputetë meqenëse secili prej tyre ka pasur më tepër se 4 mijë vota”, tha Liridona Gashi, sekretare e LVV-së në Ferizaj.

Edhe në Partinë Demokratike të Kosovës në Ferizaj, thonë se ka mundësi që në ulësen e deputetit të ulen tre kandidatë nga kjo degë.

“Nga dega jonë janë 9 kandidatë dhe presim që në parlamentin e ardhshëm të jenë 2 ose 3 kandidatë, po presim gjithsesi Ilmi Reçica që ka mbi 6 mijë vota, por presim që të shkojnë edhe Adelina Grainca dhe Kristina Gashi-Bytyçi. Ky rezultat nuk është i kënaqshëm, por ky është rezultati zgjedhor”, tha Arian Imeri nga dega e PDK-së në Ferizaj.

Balton Dërguti nga Lista Vjosa thotë se numër të madh të votave kanë marrë edhe Burim Karameta e Ekrem Mustafa.

“Duke pasur parasysh që lista Vjosa ka qenë e themeluar një muaj para datës së zgjedhjeve ne në këtë periudhë kemi arritur të tregojmë një rezultat shumë të mirë, pasi kandidatët tanë sillen mbi 7 mijë vota dhe janë me gjasë për të hyrë në Parlamentin e Kosovës. Kandidatët tanë vetëm në Ferizaj kanë marrë mbi 4 mijë vota”, tha Balton Dërguti nga Lista Vjosa.

Ndër kandidatet femra që është votuar mjaft shumë në Ferizaj është edhe Kristina Gashi-Bytyçi nga lista e PDK-së.

“Falënderoj qytetarët e Ferizajt për edukatën e qetësinë e treguar gjatë zgjedhjeve sepse kemi qenë një shembull i mirë dhe dua ta uroj fituesin e këtyre zgjedhjeve duke uruar që së shpejti të formojnë institucionet. Sa i përket mbështetjes së qytetarëve si kandidate falënderoj edhe subjektin, por edhe qytetarët që më kanë dhënë mbështetjen, nuk jam e zhgënjyer, kam pasur mbështetje mjaft të mirë, kam pasur mbi 30% të votave të subjektit të PDK-së në Ferizaj. Deri më tani pa numërimin e votave me kusht dhe të diasporës kam arritur t’i kem 3 mijë e 557 vota, por patjetër që pres mbështetje edhe nga komunat e tjera”, tha Gashi-Bytyçi.

Më të votuarit nga LDK-ja e Ferizajt janë Muharrem Svarqa dhe Saranda Musliu, edhe pse me votat e grumbulluara aktualisht nuk mund t’i sigurojnë ulëset në Kuvend. Nga votat e numëruara deri më tani Muharrem Svarqa ka marrë 2 mijë e 400 vota, ndërsa Saranda Musliu 2000 vota.

Ferizaj

Lëndohen tre policë gjatë arrestimit të sulmuesit 16 vjeç në Ferizaj

Published

3 days ago

10 July, 2026

Redaksia

Policia e Kosovës ka njoftuar se gjatë arrestimit të të miturit me inicialet P.GJ (16 vjeç), i dyshuar për therje të dy personave mëngjesin e sotëm në Ferizaj, janë lënduar tre zyrtarë policor ku njëri prej tyre është goditur me thikë në pjesën e qafës.

Sipas policisë, pas kontrollit ë banesën e të dyshuarit dhe më pas në një adresë në fshatin Greme, policia ka arritur ta lokalizojë atë.

“Me të arritur në vendngjarje, i dyshuari ka refuzuar t’u bindet urdhrave policorë, duke mbajtur një thikë në dorë, ka sulmuar zyrtarët policorë me gurë dhe mjete të forta, si dhe është vërsulur ndaj tyre me thikë.

Gjatë ndërhyrjes, nëna e tij ka penguar zyrtarët policorë në kryerjen e detyrës zyrtare.

Në një moment, i dyshuari ka marrë një shishe me benzinë dhe ia ka hedhur vetes mbi trup, duke vazhduar t’i kërcënojë policët me thikë dhe duke mos lejuar afrimin e tyre.

Gjatë përpjekjeve për vënien e tij nën kontroll, tre zyrtarë policorë kanë pësuar lëndime, ndërsa njëri prej tyre është goditur me thikë në pjesën e qafës.

Pas ndërhyrjes policore, i dyshuari me inicialet P.GJ (16 vjeç) është vënë nën kontroll dhe është arrestuar së bashku me nënën e tij D.GJ (47 vjeçe).

Gjithashtu është sekuestruar edhe thika, e cila dyshohet se është përdorur në sulmin ndaj qytetarëve”, ka njoftuar policia.

Në përditësimin e fundit, thuhet se në sulmin që ndodhi rreth orës 07:53, në rrugën ‘Dëshmorët e Kombit’, në afërsi të Postës Qendrore në Ferizaj, mbetën të plagosur dy qytetarë, të cilët u dërguan për trajtim mjekësor në Spitalin e Ferizajt.

Njëri nga të plagosurit, I.M. 81 vjeç, ishte therur në fytyrë dhe në gjymtyrë, ndërsa i plagosuri tjetër, një zyrtar i degës së Postës së Kosovës në Ferizaj, pas trajtimit mjekësor është liruar për në shtëpi.

Në njoftimin e Prokurorisë në Ferizaj, i dyshuari me vendim të Prokurorit të Shtetit është ndaluar në kohëzgjatje prej 24-orësh, për shkak të dyshimit se i njëjti ka kryer veprat penale “Sulmi ndaj personit zyrtar” dhe “Vrasja në tentativë”.

Ferizaj

Arrestohet i dyshuari për plagosjen e dy personave me thikë në Ferizaj

Published

3 days ago

10 July, 2026

Redaksia

Është ndaluar një person, i mitur, i dyshuar për rastin e sulmit dhe therjes me thikë të dy personave të tjerë, mëngjesin e sotëm në Ferizaj.

“Rasti ka ndodhur sot, më datën 10.07.2026, rreth orës 07:53, në rrugën ‘Dëshmorët e Kombit’, në afërsi të Postës Qendrore në Ferizaj, ku, sipas informatave fillestare, dyshohet se i mituri ka sulmuar me mjet të mprehtë (thikë) dy persona të tjerë” , njoftoi Prokuroria.

Të lënduarit janë dërguar për trajtim mjekësor në Emergjencën e Ferizajt.

Sipas informacioneve të fundit, njëri nga të plagosurit, I.M 81 vjeç, ka pësuar therje të rëndë në fytyrë dhe në gjymtyrë, ndërkaq i plagosuri tjetër, një zyrtar i degës së Postës së Kosovës në Ferizaj, pas trajtimit mjekësor në Emergjencën e Spitalit është liruar për në shtëpi.

Ferizaj

Arratiset i dyshuari për plagosje me thikë të dy personave në Ferizaj

Published

3 days ago

10 July, 2026

Redaksia

Një person dyshohet se ka sulmuar dhe therur me thikë dy të tjerë mëngjesin e sotëm afër objektit të postës qendrore në Ferizaj.

Të lënduarit janë dërguar për trajtim mjekësor në Emergjencën e Ferizajt, kurse i dyshuari është arratisur nga vendi i ngjarjes.

Policia bëri të ditur se është në kërkim intensiv për të dyshuarin dhe se po shikohen kamerat për të ndihmuar në identifikimin e të dyshuarit dhe sqarimin e rrethanave të rastit.

“Sot, rreth orës 07:50, kemi pranuar informatën se në rrugën “Dëshmorët e Kombit”, në afërsi të Postës Qendrore në Ferizaj, ka ndodhur një incident, ku një person dyshohet se ka sulmuar dy persona me mjet të mprehtë (thikë), të cilët janë transportuar për trajtim mjekësor në Emergjencën e Ferizajt, pasi kanë marrë ndihmën e parë në vendin e ngjarjes nga ekipet mjekësore. I dyshuari është larguar nga vendi i ngjarjes në drejtim të panjohur”, njoftoi Policia.