Programi për Mbrojtjen e Konsumatorëve të Cenueshëm të Energjisë Elektrike, i cili u prezantua të martën në qeveri, do t’i ndihmojë familjet e cenueshme duke ua subvencionuar faturat e energjisë.

Ky program është i dizajnuar për familjet kosovare me të ardhura mesatare nën 150 euro për anëtar, ndërsa subvencionimi do të bëhet përmes formës së aplikimit në Ministrinë e Financave.

Kryeministri Albin Kurti tha se programi, i cili do të zgjasë një vjet, do të jetë shumë i rëndësishëm për këto familje.

“Fokus të veçantë në këtë program do të kenë grupe të caktuara të shoqërisë, si personat me aftësi të kufizuar, prindërit vetë-ushqyes dhe pensionistët që jetojnë vetëm.

Programi  për Mbrojtjen e Konsumatorëve të Cenueshëm është program një vjeçar i cili fokusohet në subvencionimin e faturave të energjisë elektrike për konsumatorët e cenueshëm, të hyrat mesatare mujore të të cilëve janë nën 150 euro për anëtar të familjes”, tha Kurti.

Ndërsa, ministri i Financave, Hekuran Murati, sqaroi se megjithëse tashmë është hapur forma e aplikimit, ministria së shpejti do të dalë me njoftime se si të plotësohet ky formular.

“Programi parasheh t’i ndihmojë të gjitha familjet të cilat mesatarisht kanë më pak se 150 të ardhura mujore për anëtar të familjes. Pra, nëse një familje ka katër anëtar parashihet që nëse ka më pak se 600 euro të ardhura mujore mesatare mund të kualifikohet për programin dhe shuma e subvencionimit pastaj do të varët varësisht më pak sesa pragu i nevojshëm që merr”.

Në prezantimin e këtij programi morën pjesë edhe shefi i bashkëpunimit në zyrën e BE-së, Alessandro Bianciardi dhe menaxheri i Bankës Botërore në Kosovë, Massimiliano Paolucci.