Kryetari i Kuvendit të Kosovës, Glauk Konjufca, ka dënuar dhunën që raportohet se i është bërë politikanit serb, Nikola Sanduloviq, në Serbi duke i kërkuar njëkohësisht bashkësisë ndërkombëtare që ta dënojë këtë akt, siç u shpreh “të brutalitetit të shtetit serb, që është i orientuar sa drejt Republikës së Kosovës, aq edhe drejt figurave publike që i shërbejnë përparimit të marrëdhënieve tona”.

Konjufca shprehu shqetësimin për raportet se në torturat ndaj Sanduloviqit ka marrë pjesë edhe terroristi Milan Radoiçiq.

“Në një situatë të frikësimit dhe territ mediatik në Serbi, aludimi shqetësues se në torturim ka marrë pjesë edhe terroristi Milan Radojçiq, i kërkuar nga Republika e Kosovës dhe ndërkombëtarisht për sulmin terrorist në Banjskë, akoma nuk është sqaruar”, ka shkruar ai duke shtuar se kështu po sulmohet edhe mundësia për pajtim politik mes Kosovës dhe Serbisë.

“Përpjekja për të trembur dhe zmbrapsur politikanë si z. Sanduloviq, i cili sulmohet pikërisht se njeh sovranitetin e Republikës së Kosovës dhe kërkon falje për krimet e Serbisë ndaj shqiptarëve, vjen si sulm ndaj mundësisë së një pajtimi të drejtë politik mes Kosovës dhe Serbisë, si dhe ndaj kulturës politike evropiane në Serbi”, ka shkruar Konjufca në Facebook.

Sanduloviqi ishte arrestuar të mërkurën nga Agjencia e Inteligjencës e Serbisë (BIA). Sipas familjes dhe avokatit të tij, Çedomir Stojanoviq, arsyeja ishte një postim i tij në rrjetin social “X “ për homazhe te varrezat e familjes Jashari në Prekaz, duke thënë se është i vetmi politikan nga Serbia që nderoi viktimat e pafajshme shqiptare.

Avokati Stojanoviq ka publikuar edhe akuzën zyrtare, sipas së cilës ‘Sanduloviq përhapi urrejtje ndaj serbëve duke vendosur lule në varrezat e shqiptarëve dhe kërkoi falje nga shqiptarët për krimet e kryera.”