Në Qendrën Komunale të Numërimit në Mitrovicën e Jugut ka përfunduar procesi i verifikimit dhe numërimit të fletëvotimeve për raundin e dytë të zgjedhjeve për Kryetar të Komunës.

Procesi është zhvilluar nën mbikëqyrjen e përfaqësuesve të subjekteve politike dhe dy hetuesve policorë të caktuar nga Prokuroria Themelore në Mitrovicë, për shkak të dyshimeve për manipulim me fletëvotime.

Vendimi  i Prokurorisë për  rifillimin e numërimit të ndërprerë të hënën, është marrë pas sqarimit zyrtar nga kompania sllovene CETIS, e cila ka printuar fletëvotimet për zgjedhjet komunale në Kosovë.

Sipas rezultateve të publikuara nga KQZ-ja, pas numërimit të mbi 96% të votave, Faton Peci (LVV) ka fituar 53.07% të votave kurse Arian Tahiri (PDK) fitoi 46.93% të votave.

Prokuroria Speciale e Kosovës e ka dorëzuar të martën në Gjykatën Themelore një aktakuzë ndaj ministres në detyrë të Industrisë, Ndërmarrësisë dhe Tregtisë, Rozeta Hajdari, si dhe ndaj tre të tjerëve, për keqpërdorimin e dyshuar të rezervave shtetërore.

Prokuroria tha se Hajdari, dhe dy zyrtarët Irfan Lipovica dhe Hafiz Gara dyshohen se bashkëkryerje i kanë keqpërdorur detyrat zyrtare me qëllim që të përfitonin pasuri për persona të tjerë dhe i kanë shkaktuar dëm buxhetit të Kosovës gjatë muajve shkurt dhe mars 2022.

Buxheti i shtetit ka pësuar një dëm prej rreth 3 milionë eurove si pasojë e veprimeve të tyre, tha Prokuroria në një njoftim.

Ata dyshohet se asokohe kishin blerë një sasi vaji dhe një sasi gruri jashtë vendit, që nuk kishin arritur kurrë në Kosovë.

ë të tre akuzohen për kryerjen e veprave penale keqpërdorimi i pozitës apo autoritetit zyrtar, dhe zbulimi i fshehtësisë zyrtare.

Ndërsa i akurzuari i katërt, R.M., dyshohet për ndihmimin në kryerjen e veprës penale të keqpërdorimit të pozitës apo autoritetit zyrtar.

Hajdari, Lipovica dhe Gara akuzohen gjithashtu se, pa autorizim, kanë zbuluar fshehtësinë zyrtare.

“Edhe pse kanë qenë në dijeni se vendndodhja e rezervave shtetërore përbën sekret shtetëror, sipas Ligjit për Rezervat Shtetërore të Mallrave, ata me dashje ia kanë vënë në dispozicion këtë informacion të pandehurit R.M”, thuhet në njoftim.

Sipas aktakuzës. R.M., më pas u kishte krijuar kushte të tjerëve për kryerjen e veprës penale, duke ndërmjetësuar dhe negociuar drejtpërdrejt, si dhe duke propozuar e rekomanduar përzgjedhjen e operatorëve ekonomikë në emër të rezervave shtetërore.

Gara, drejtor i departamentit të rezervave shtetërore, dhe Lipovica, drejtor i departamentit për integrime evropiane, ishin arrestuar më 2023 për këtë rast.

Më herët të martën, Hajdari tha se ishte njoftuar nga avokati i vet për aktakuzën.

“Sapo ta kem pranuar të plotë dokumentin e aktakuzës do të deklarohem më gjerësisht për media”, shkroi Hajdari.

Hajdari, megjithatë, tha se ndihet “krenare për punën që kam bërë si ministre në kohën më të vështirë – sigurimin e rezervës shtetërore të mallrave, me produktet esenciale për jetesë, në kohën kur ishim të pambrojtur, gjatë muajve shkurt dhe mars 2022”.

Albulena Haxhiu, nënkryetare e Kuvendit të Kosovës nga Lëvizja Vetëvendosje e kryeministrit në detyrë Albin Kurti, e mbrojti Hajdarin në një postim në Facebook, duke thënë se ajo “nuk është e korruptuar, as nuk ka keqpërdorur ndonjëherë detyrën e saj zyrtare”.

Ajo e quajti aktakuzën të “motivuar politikisht, pa asnjë bazë reale dhe dukshëm e qëllimshme”.

Haxhiu, e cila ishte ministre e Drejtësisë në mandatin e kaluar katërvjeçar të Kurtit, tha se Hajdari “ka bërë gjithçka që ka qenë në dorën e saj për të mbrojtur interesin e vendit dhe për të siguruar që Kosova të ketë rezerva shtetërore, ndryshe nga qeveritë e kaluara, të cilat kishin lënë vendin pa rezerva”.

Hajdari ishte marrë në pyetje disa herë nga Prokuroria Speciale si e dyshuar për keqpërdorimin e rezervave shtetërore, por ishte mbrojtur në heshtje.

Si dëshmitar për këtë rast është thirrur edhe kryeministri në detyrë, Albin Kurti, por deri më tani nuk ka pranuar të shkojë në Prokurorinë Speciale, duke ngulur këmbë të japë dëshminë në Kryeministri.

Rasti i rezervave shtetërore

Më 2023, tre persona u arrestuan për rastin e rezervave shtetërore.

Në mesin e tyre kanë qenë edhe punonjës të Ministrisë së Industrisë, Ndërmarrësisë dhe Tregtisë (MINT), që udhëhiqet nga Rozeta Hajdari, e cila, gjatë paraqitjes për dëshmi në Prokurorinë Speciale, ka zgjedhur të mbrohet në heshtje.

Në këtë Ministri, më 2023, u kryen bastisje pas publikimit të audio-incizimeve nga portali Nacionale, ku ishte pretenduar se një sasi vaji, e blerë në Poloni, dhe një sasi gruri, e blerë në Turqi, nuk kishin arritur kurrë.

Hajdari ka thënë se blerjet për rezerva shtetërore ishin bërë në përputhje me ligjin, por nuk ka dhënë më shumë hollësi, meqë informacionet për to janë sekrete shtetërore.

Ajo e ka akuzuar policinë se gjatë bastisjeve, ka marrë në cilësinë e provave dokumente të klasifikuara si sekrete shtetërore.

Kurti i ka dalë në mbrojtje Hajdarit, duke thënë se “nuk ka kurrfarë korrupsioni e keqpërdorimi”.

| Radio Evropa e Lirë

Balotazhi për kryetarë, në 18 komuna të Kosovës, solli disa ndryshime por gjithsesi këto zgjedhje prodhuan një shpërndarje të baraspeshuar të pushteteve lokale mes subjekteve politike, duke mundësuar që të gjithë pa përjashtim, në një mënyrë ose tjetrën, të ndjehen “fitues” .

Pas dy rundeve të zgjedhjeve lokale, numrin më të madh të komunave i fitoi Lista Serbe.  Ajo triumfoi në 10 sish, nga të cilat, në balotazh ishte vetëm komuna e Kllokotit. Lista Serbe në raundin e parë fitoi në Mitrovicë të Veriut, Leposaviq, Zubin Potok, Zveçan, Artanë, Ranillug, Shtërpcë, Graçanicë dhe në Partesh.

Lëvizja Vetëvendosje dhe LDK-ja fituan nga shtatë komuna, ndërsa PDK-ja fitoi në 6 komuna derisa  AAK-ja  në 5 sish derisa Nisma Socialdemokrate, Partia Demoratike Turke e Kosovës dhe Lista për Drenasin fituan nga një komunë.

Vetëvendosje i fitoi në raundin e parë Podujevën, Shtimen dhe Kamenicën kurse në balotazh triumfoi edhe në Mitrovicë të Jugut, Gjilan, Obiliq dhe Fushë-Kosovë.

LDK-ja në raundin e parë kishte fituar Lipjanin e Istogut, ndërsa në balotazh e fitoi Prishtinën, Pejën, Dragashin, Junikun dhe Vitinë.

PDK-ja pa balotazh e fitoi Skenderajn, Ferizajn dhe Hanin e Elezit, kurse në balotazh e fitoi Prizrenin, Kaçanikun e Vushtrrinë.

AAK-ja kishte fituar pa balotazh Deçanin, e në balotazh e fitoi edhe Gjakovën, Suharekën, Rahovecin dhe Klinën.

Sa i përket rezultateve finale, duhet të pritet edhe numërimi i votave me kusht, të persona ve me nevoja të veçanta dhe votat me postë, ku këto të fundit mund të kenë ndikim direkt në rezultatet e dy komunave; atë të Junikut  dhe në Komunën e Vitisë.

Në Junik , sipas rezultateve preliminare ka fituar Ruzhdi Shehu i LDK-së me 55.92% ndaj Agron Kuçit të AAK-së me 44.08%. Dallimi mes tyre është  vetëm 302 vota marrë parasysh se në raundin e parë ishin 1.132 vota të vlefshme nga diaspora. Nëse edhe në rundin e dytë vijnë përafërsisht numri i njëjtë i votave, atëherë mund të ketë edhe ndryshim rezultati.

Situatë e ngjashme është edhe në Viti, ku sipas KQZ-së, Sokol Haliti i LDK-së ka fituar 50.60% kurse Arsim Ademi  i LVV-së 49.40% të votave. Dallimi mes tyre është vetëm  197 vota andaj numërimi i votave me postë mund të bëjë ndryshim, pasi në raundin e parë, nga diaspora e Vitisë, me postë erdhën 1.383 vota të vlefshme.

Rezultatet përfundimtare mund të dalin deri në fund të javës, pasi të jenë rinumëruar të gjitha votat e së dielës, si dhe pas numërimit të votave me kusht, ato të personave me nevoja të veçanta dhe votat e ardhura me postë.