Dardan Krivaqës i është rikonfirmuar dënimi me burgim të përjetshëm për vrasjen e 18-vjeçares Marigona Osmanit, ndërkaq Arbër Sejdiu është dënuar me pesëmbëdhjetë vjet prapa grilave për ndihmë Krivaqës gjatë vrasjes mizore në banesën e të akuzuarit kryesor, më 22 gusht 2021, në Ferizaj. Si në gjykimin e parë, edhe në të dytin pas vendimit të Gjykatës së Apelit për rigjykim, të akuzuarit janë liruar nga akuzat për dhunim dhe ndihmë në dhunim.

Aktgjykimi i procesit të ri gjyqësor është lexuar sot nga Sahit Krasniqi, kryetar i trupit gjykues të Gjykatës Themelore të Ferizajt.

Gazmend Rexhepi, avokat i familjes Osmani, ka thënë se do ta apelojë pjesën e aktgjykimit që i liron të dënuarit nga akuza për dhunim dhe ndihmë në dhunim. “Pjesërisht i kënaqur, përsëritje e vendimit të kaluar. Do të isha tërësisht i kënaqur nëse edhe i akuzuari i dytë do ta merrte vendimin meritor, burgimin e përjetshëm, për atë që jemi thirr prej fillimit”, ka thënë Rexhepi, i shoqëruar prej familjarëve.

Krasniqi, në emër të trupit gjykues, ku përfshihen edhe gjyqtarët Habib Zeqiri dhe Fitore Daci, ka shpjeguar gjatë leximit të vendimit se vdekja e Osmanit ishte rezultat i dhunës së ngadalshme mizore. Ai i është referuar raportit të autopsisë dhe dëshmisë së ekspertit të mjekësisë ligjore, Naim Haliti.

“… dhe në dëshminë e tij në këtë gjykatë vetëm sa e konfirmon vdekjen në mënyrën më mizore të të ndjerës Marigona Osmani”, ka lexuar Sahiti, duke iu referuar përmbajtj4es së raportit, ku thuhet shprehimisht se “vdekja e të ndjerës ka ardhur si pasojë e lëndimeve të shumëfishta, që ndryshe quhet si politraumë”. Në arsyetim është thënë gjithashtu se Krivaqa i kishte shkaktuar dëmtime të organeve vitale të Osmanit. Sipas  gjykatës, Sejdiu e kishte ndihmuar gjatë gjithë kohës Krivaqën.

Procesi i ri gjyqësor për vrasjen e Marigona Osmanit nisi më 24 maj 2024 pas vendimit të Gjykatës së Apelit për të rishqyrtuar vendimet e Gjykatës Themelore të Ferizajt për dënimet e Dardan Krivaqës dhe Arbër Sejdiun.

Më 4 gusht të vitit të kaluar, Krivaqa u dënua me dënim të përjetshëm për vrasjen e Marigona Osmanit, ndërkaq u lirua nga akuza për dhunim. Sejdiu u dënua me pesëmbëdhjetë vjet burgim për ndihmë në vrasjen e rëndë në bashkëkryerje, por u lirua nga vepra penale e ndihmës në dhunim.

Arbnora Shefkiu, avokate e mbrojtjes, ka paralajmëruar se do të paraqet ankesë në Gjykatën e Apelit.

Sipas aktakuzës, Krivaqa thuhet se më 21 gusht 2021, rreth orës 10:14, në banesën e tij, pa pëlqimin e tani të ndjerës Marigona Osmani, e kishte detyruar atë të kryente marrëdhënie seksuale dhe e kishte abuzuar e maltretuar në forma të ndryshme.

Një ditë më pas, më 22 gusht 2021, Krivaqa dhe Sejdiu akuzohen se kanë privuar nga jeta Marigona Osmanin, në përpjekje për të fshehur veprën penale të dhunimit.

Mirëpo Gjykata e Apelit, me aprovimin e ankesës së Prokurorisë Themelore në Ferizaj dhe mbrojtjes së dy të akuzuarve, e ka kthyer çështjen në rigjykim. Krivaqa e Sejdiu edhe në seancën e majit të procesit të rigjykimit, Krivaqa e Sejdiu thanë se nuk ndiheshin fajtorë për akuzat e prokurorisë.

Skënder Musa, avokat i Krivaqës, e ka akuzuar prokurorinë në seancën e parë të rigjykimit se nuk i ka vërtetuar plotësisht pretendimet në procesin e parë gjyqësor. Mbrojtja ka pretenduar se Krivaqa ka qenë nën ndikimin e substancave narkotike në kohën e kryerjes së vrasjes së Osmanit. Musa nuk ka qenë sot i pranishëm në seancën e shpalljes së aktgjykimit.

Avokati i familjes Osmani, Gazmend Rexhepi, kishte thënë se Apeli nuk është dashur ta kthente rastin në rigjykim, sepse, sipas, në gjykimin e parë ishin shterë të gjitha mjetet ligjore. Ai kishte e cilësuar si “shumë konfuz” vendimin e Apelit, duke theksuar se është e drejtë e gjykatës për ta përcaktuar shkallën e mizorisë me të cilën ishte shkaktuar vdekja e Osmanit.

Në seancën e 25 korrikut, në fjalën përfundimtare të enjten në Gjykatën Themelore në Ferizaj, i akuzuari Dardan Krivaqa tha se tani e ndjera Marigona Osmani ishte personi që e ka dashur dhe se vrasja e saj nuk ka qenë e qëllimshme, raportoi “Betimi për Drejtësi”.

Prokurori Valdet Avdiu kishte thënë se i qëndron në tërësi fjalës përfundimtare të dhënë në shqyrtimin e kaluar më 1 gusht 2023 dhe një kopje të saj ia dorëzoi trupit gjykues.

Ai i propozoi Gjykatës që të akuzuarit t’i shpallë fajtorë për veprat për të cilat akuzohen.