Kryetari i Lëvizjes Vetëvendosje, Albin Kurti, ka deklaruar se nuk ka konsensus mes partive parlamentare për konstituimin e Kuvendit, ndonëse ka deklaruar se i ka ofruar dy propozime kompromisi për të zhbllokuar procesin.

Kurti u tha mediave se LDK dhe PDK  e kanë keq-lexuar dhe keqinterpretuar aktgjykimin e Gjykatës Kushtetuese, andaj edhe përafrimi i propozimeve ishte i pamundshëm.

Ai tha se Gjykata Kushtetuese s’e ka shpallur Komisionin jo kushtetues dhe se askund nuk thuhet që kryesuesi i seancës, Avni Dehari ka bërë ndonjë shkelje.

“PDK dhe LDK e kanë keqlexuar aktgjykimin dhe po e keqinterpretojnë atë publikisht. Nuk është as qëllimi dhe as kuptimi ajo që po thuhet nga PDK dhe LDK. Gjykata Kushtetuese nuk ka thënë që Komisioni është jokushtetues dhe nuk thotë askund që kryesuesi Avni Dehari ka bërë shkelje.”

Më tej, Kurti tha se në takim ka dhënë dy propozime , për të cilat tha se mund t’i japin zgjidhje ngërӓit të krijuar në Kuvend.

“Propozimi i parë ka qenë nëse kandidatja për kryetare, Albulena Haxhiu,  nuk i merr 61 vota në votimin e fshehtë, atëherë tërhiqet nga kandidatura. Edhe pse ky ka qenë qëndrim i njëanshëm i Haxhiut, unë e respektoj. Ajo nuk dëshiron të votohet dy herë me votim të fshehtë.

Dhe e dyta ishte që ta bëjmë një marrëveshje politike lidhur me nenin 67 të Kushtetutës, marrëveshje në paketë për votimin e kryetarit dhe nënkryetarët. E pastaj nëse nuk duan votim të fshehtë, le të delegojnë përfaqësuesit në komisionin për votim të fshehtë të cilin mund ta rrëzojnë me votë,” tha Kurti duke shtuar se takimi i sotëm ishte i vlefshëm së paku për shkak të sqarimeve të ndërsjella mes partive parlamentare.