Me 27 vota për dhe 7 kundër Kuvendi Komunal i Ferizajt ka miratuar buxhetin e vitit 2021-2023 në vlerë mbi 34 milionë euro.

Kryetari Agim Aliu, tha se buxheti për vitin 2021 është zvogëluar për gati 2  milion euro si rezultat i pandemisë, mirëpo theksoi se pavarësisht kësaj nuk do t’i ndalin investimet që i kanë planifikuar.

Ai njoftoi se në këtë projekt-buxhet është paraparë ndërtimi i dy shkollave, ndërtimi i një çerdheje, ndërtimi i objektit të ri për kompaninë “Pastërtia”, ndërtimi i Stacionit të Autobusëve, rikonstruktimi i tregut të gjelbër, e investime në bujqësi, sport e kulturë, duke veçuar se do të bëjnë katër projekte, siç tha ai,  unike.

“Projekti për ndërtimin e shtëpisë së pensionistëve, ndërtimi i qendrës rehabilituese për përdoruesit e substancave narkotike, ndërtimi i strehimores për gratë viktima të dhunës, ndërtimi i kompleksit për personat me nevoja të veçanta si dhe i qendrës burimore për fëmijët me nevoja të veçanta janë vetëm disa nga asetet institucionale, pasuritë e shërbimeve që Ferizaj për pak kohë do t’i ketë. Investimet në rregullimin e vazhdueshëm deri në të fundit projekt për infrastrukturën rrugore është synimi i pakos sonë të veprimeve në infrastrukturën rrugore”, tha Aliu.

Anëtarët e Kuvendit Komunal nga radhët e LDK-së, i gjetën vërejtje projekt-buxhetit të hartuar nga ekzekutivi.

“Zyra e kryetarit me gjithsej 12 punëtorë sa i ka ka ndarë diku 110 mijë euro për paga, ndërsa zyra e Kuvendit të komunës që i ka 41 asamblistë dhe anëtarë tjerë staf parashihen vetëm 139 mijë euro dhe një llogaritje të bëhet del se një pagë e punëtorit të kabinetit të zyrës së kryetarit është diku 765 euro, kjo me të vërtet është  pagë e lartë”, tha Imri Hashani nga LDK-ja.

“Meqë unë kam qenë kryetar i komunës në mandatin paraprak duke e pas parasysh projekt-buxhetin që na është servuar këtu më është dhënë mundësia që një akuzë të fajësisë sime të paqenë për krijimin e borxheve, të ashtuquajtura, ta sqarojmë tani. Nëse ne e analizojmë buxhetin dhe e shohim raportin e auditorit gjeneral janë rritur borxhet e komunës ndaj operatorëve ekonomik për 1 milion euro, pra kryetari Aliu që është zotuar se do ta zvogëloj këtë borxh tani ka dalur në rritje të borxheve. Kryetari Aliu është mirë në pikëpamje kolegiale të na sqaroj se a është metodë e mirë ajo që e ka aprovuar nga qeverisja e kaluar për planifikimin e projekteve 3 vjeçare dhe ta pranoj botërisht për shkak se të njëjtën e ka zbatu më mirë se unë ose të kërkoj falje se ato borxhe nuk kanë qenë, por kanë qenë borxhe që është dashur t’iu paguhen operatorëve ekonomik për shkak të punëve që kryhen”, tha Muharrem Svarqa nga LDK.

“Ne vërtet kemi origjina të ndryshme, datëlindje të ndryshme dhe shkolla të ndryshme edhe politike edhe jetësore, por unë dhe qeverisja ime asnjëherë nuk i kemi takuar dhe nuk do t’i takojmë shkollës së propagandës, shkollës së hipokrizisë dhe shkollës së demagogjisë, nëse do të na kërkoni mund të na gjeni në shkollën e të moralshmëve, të ndershmëve, të profesionalistëve dhe të njerëzve të përgjegjshëm”, tha kryetari Agim Aliu.

Përveç pozitës, projekt-buxheti u votua edhe nga Lëvizja Vetëvendosje, përfaqësuesit e së cilës pranuan ta votojnë këtë dokument me kusht që aty të inkorporohen kërkesat e tyre. Ky veprim i LVV-së u pa me dyshim nga anëtarët e LDK-së, të cilët e akuzuan këtë parti se ka marrëveshje të fshehtë me pushtetin.

“Ne Lëvizja Vetëvendosje kemi marrë nga qytetarët disa kërkesa që kërkojmë t’i inkorporojnë në buxhetin e vitit 2021. Ato janë: të sigurohet shuma prej 100 eurosh për familjet e të sapolindurve të komunës sonë, t’iu sigurohet mujore për transport shkollimi të gjithë fëmijëve me kushte të rënda sociale, të sigurohet transport për të gjithë fëmijët me nevoja të veçanta, në rast se kërkesat tona inkorporohen ne si Lëvizje do ta përkrahim buxhetin”, tha Evetare Azemi nga LVV.

“Kohët e fundit është mirë me ditë edhe qytetarët se është një marrëveshje  e fshehtë mes PDK-së dhe VV-së. VV që thirret kinse parimore, pra ja ku bjen parimi i tyre”, tha Imri Hashani nga LDK.

“LVV ka marrëveshje me qytetarë dhe interesat e tyre i sjell këtu, mua më vjen keq që për 20 vite që keni qeverisë ju është turp çka ka ndodhë në mandatin e kaluar me miratimin e PZHK-së që e keni shkatërruar një qytet dhe sot e keni ish-drejtorin nëpër gjykata“, tha Xhevat Sallahu nga LVV.

Në këtë seancë u miratuan edhe disa pika të tjera të cilat kishin të bëjnë me shpallje të interesit të përgjithshëm të ngastrave kadastrale në Varosh, Babush, Ferizaj dhe në Sojevë.