Lapidari i dëshmorit Sejdi Sejdiu në fshatin Nerodime e Poshtme, dita ditës po shkatërrohet nga persona të pandërgjegjshëm. Veprimet e personave të cilët po dëmtojnë lapidarin e dëshmorit të rënë për liri, e kanë irrituar banorin e këtij fshati Gani Neziri, i cili  thotë se përveç mungesës së përkujdesjes institucionale, për këtë lapidar nuk përkujdesen as banorët e fshatit.

“Kjo është duke u dëmtuar shumë, shkatërrimi i pllakave, rrethojës, dëmtimi i pemëve, shihet që është bërë qëllimisht. Mungon shumë mirëmbajtja institucionale po ashtu edhe nga banorët të cilët nëse nuk munden me ndihmu, të paktën mos ta dëmtojnë.  Skënderbeu gjithmonë ju frikonte rrënimit të kalasë nga brenda, kjo është duke u rrënu nga brenda, nga këtu, nga banorët është duke u rrënuar jo nga jashtë”, u shpreh ai.

Neziri tha se në këtë mënyrë po dëshmohet që ne jemi popull që nuk i respektojmë ata të cilët dhanë jetën për lirinë që sot e gëzojmë.

“Ju bëj apel banorëve të këtuhit, institucioneve, që të kujdesen, këtu ka dëshmorë të luftës së dytë botërore, dëshmorë të UÇK-së, ata dhanë jetën për këtë vend, ndërsa ne mos të jemi në gjendje një punë më të vogël ta bëjmë, përkujdesjen e këtij lapidari, unë nuk jam familjar, jam vetëm banor, por po më pengon kjo padisiplinë, kjo pakujdesi që çdo njeri i civilizuar e me pak ndjenja kombëtare që ka kish me pengu ky veprim antipopullor, antikombëtar, se shkatërrimi i monumenteve të dëshmorëve është veprim antikombëtar”, tha Neziri.

Në kompaninë ‘’Ambienti’’ në Ferizaj, thanë se kanë për obligim vetëm mirëmbajtjen e hapësirave ku ndodhen lapidarët, ndërkaq për pjesën tjetër duhet të përkujdeset kompania që e ka ndërtuar lapidarin.