Ferizaj

Hapet ‘’INTEREX’’ në Ferizaj

Published

8 years ago

14 July, 2018

Rrjeti i marketeve “INTEREX”, ka zgjeruar edhe më shumë rrjetin e tij me pikën më të re në Ferizaj. Sot në rrugën “Ahmet Kaçiku’’, është bërë hapja solemne e tij. INTEREX në Ferizaj vjen me një sipërfaqe prej 3 mijë e 500 metrash katror.

Përfaqësuesja e “INTEREX”-it, Juliana Haxholli, tha se synojnë që konsumatorëve ferizajas t’u ofrojnë cilësi e çmime të lira.

“INTEREX” vjen sot në këtë pikë të re në Ferizaj, ne duam që të gjithë qytetarët e Kosovës të marrin ofertën më të mirë, të kenë zgjedhjen më të mirë. “INTEREX” Ferizaj është pjesë e planit zhvillimor të “INTEREX” në të gjitha qytetet e Kosovës, kështu që ne kemi menduar që ky qytet kaq i bukur me këta njerëz kaq të mirë të kenë një mundësi shumë më të mirë për të zgjedhur atë që u duhet për jetën e tyre të përditshme, një ndër pjesët kryesore që ne mund t’u ofrojmë konsumatorëve që është edhe pjesë e sloganit të kompanisë ne do të ofrojmë çmime shumë të mira, kështu që slogani jonë është ekstra lirë, kështu që konsumatorët do të kenë mundësi të marrin më të mirën në të gjitha produktet që ata kërkojnë”, tha Haxholli.

Ndërsa, Arian Zeka drejtor ekzekutiv i Odës Ekonomike Amerikane, tha se zgjerimi i veprimtarive të tilla përveç që krijon vende të reja të punës, rrit cilësinë dhe konkurrencën.

“Secila hapje e pikave të tilla në Ferizaj apo anembanë Kosovës natyrisht se nënkupton vende të reja të punës edhe nënkupton atë që është më e rëndësishme, shërbime më të mira për konsumatorë, kështu që besoj se duhet të shohim shumë më shpesh ngjarje sikurse kjo dhe në një mjedis të tillë ku konkurrenca është e pranishme ata që përfitojnë më së shumti janë konsumatorët qoftë në aspektin e cilësisë së shërbimeve, qoftë në aspektin e çmimeve të produkteve të cilat i blejnë, kështu që një konkurrencë e tillë formale brenda një sektori të formalizuar është e mirëpritur”,tha Zeka.

Kurse qytetarët të cilët kishin ardhur në hapjen e kësaj qendre në Ferizaj, u shprehën të kënaqur për hapjen e këtij marketi në këtë qytet, meqë thanë se më nuk kanë nevojë të udhëtojnë nëpër qytete tjera ku ekzistonte kjo qendër.

“Po besoj se Ferizaj është bërë një qendër jashtëzakonisht tregtare, “INTEREX” është një kompani e cila i ka çmimet e volitshme dhe gëzohem shumë që është hapur në Ferizaj dhe qytetarët do të kenë mundësi të blejnë produkte me një çmim më të ulët që edhe kanë nevojë, shumë vite më parë ka qenë në Fushë Kosovë dhe me të vërtet kemi ble gjëra që kanë qenë shumë më mirë se në dyqanet e tjera dhe për mua është gëzim që ka ardhur edhe në Ferizaj se me shkua atje ka shpenzime, kështu që është mirë për qytetarët e Ferizajt”, tha Habib Musliu.

“Çmimet e mira, ishin çmime që na u përgjigjen edhe neve popullatës po besoj që ja ka vlejtur që është hapur”, tha Veli Sherifi.

“Në Gjilan më ka ra shumë herë me shku, ndërsa tani s’ka nevojë me shku, ka pas nevojë për këtë qendër, edhe pse ka boll të tjera, por edhe popullata është shtuar”, tha Bejtush Latifi.

Qendra tregtare “INTEREX”, aktualisht operon me 20 pika shitëse në vend.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

6 days ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”

Ferizaj

Sekuestrohet një revole me municion dhe shurdhues në Ferizaj

Published

1 week ago

04 May, 2026

Redaksia

Një person është shoqëruar në stacionin policor në Ferizaj pas një kontrolli në shtëpinë e tij, ku janë gjetur dhe sekuestruar një pistoletë me gaz, pesë fishekë dhe një shurdhues i armës së zjarrit.

Në raportin 24 orësh të policisë bëhet e ditur se rasti ka ndodhur mëngjesin e së dielës, më 3 maj 2026, rreth orës 8:30 në rrugën “Gucia” në Ferizaj .

Me vendim të prokurorit pas intervistimit, rasti vazhdon të hetohet në procedurë të rregullt.