Ferizaj

Universiteti i Ferizajt pranon 350 studentë

Published

8 years ago

20 July, 2018

Universiteti i Shkencave të Aplikuara në Ferizaj, ka shpallur rezultatet e pranimit të studentëve për vitin akademik 2018/2019. Në afatin e parë të regjistrimit ky universitet ka pranuar 352 studentë nga 410 sa do të regjistroj gjithsej. Zyrtari i shërbimeve studentore në USHAF Armend Hysa, tha se në dy programe studimi është plotësuar numri i studentëve, ndërsa kanë mbetur edhe 58 vende të lira në dy programe të tjera për afatin plotësues.

“Kemi pas provimin pranues më 18 korrik dhe më 19 korrik i kemi shpallur rezultatet e pranimit për afatin e parë të konkursit, për 410 vende kanë konkurruar 438 kandidatë nëpër programe të ndryshme, në turizëm kanë aplikuar 220 studentë për 150 vende të lira, në programin arkitekturë interieri kanë aplikuar 116 për 100 vende të lira, në programin dizajn dhe konstruksion të produktit të drurit kanë aplikuar 24 kandidatë për 60 vende të lira dhe programin inxhinieri industriale dhe informatikë kanë aplikuar 78 nga 100 vende të lira. Do të thotë në programin e studimit turizëm dhe arkitekturë interieri janë plotësuar vendet e kërkuara, ndërsa për afatin plotësues kanë mbetur të lira 36 vende në programin dizajn dhe konstruksione të produktit të drurit, në programin inxhinieri kanë mbetur 22 vende të lira për afatin plotësues”, tha Hysa.

Hysa tha se studentët e pranuar nuk i janë nënshtruar provimit pranues, përveç atyre që nuk kanë pasur provim të maturës.

“Këta kandidatë që kanë pasur maturë shtetërore kriteri ka qenë pikët e maturës, suksesi dhe senati ka caktuar disa lëndë prioritare siç janë matematikë, informatikë, fizikë dhe në turizëm lëndë prioritare kanë qenë ekonomi dhe ndërmarrësi, ndërsa për kategorinë tjetër që nuk kanë pasur maturë shtetërore që janë një gjeneratë mbi 30 vjet për ata kemi organizu provim pranues dhe kanë qenë vetëm 8 kandidatë”, tha Hysa.

Në Universitetin e Ferizajt njoftuan se afati plotësues për pranimin e studentëve në profilet ku kanë mbetur vende të lira do të jetë në shtator.

Ferizaj

Ndërroi jetë artisti dhe koreografi i shquar ferizajas, Bajram Tahiri

Published

2 days ago

03 February, 2026

Redaksia

Ka ndërruar jetë Bajram Tahiri, artist, valltar dhe koreografi i shquar i ansamblit “Kastriotët” në Ferizaj.

I ndjeri gjithë jetën e tij artistike ia kushtoi ruajtjes dhe begatimit të traditës dhe trashëgimisë kulturore, fillimisht si valltar pastaj edhe si koreograf i A.K.V ,,Kastriotët” Ferizaj.

Për një periudhë kohore, nga viti 1999-2009, Tahiri ishte Drejtor Operativ në KRM “Pastërtia”, pastaj nga viti 2017 deri në vitin 2020 shërbeu si këshilltar politik në Ministrinë e Tregtisë dhe Industrisë, derisa nga viti 2010 udhëhoqi me kompaninë “Mbrojtja e Ambientit”.

Mbledhja komemorative për artistin e ndjerë, Bajram Tahiri, mbahet më 3 Shkurt 2026, ora 14:00 në Teatrin “Adriana” kurse ceremonia e varrimit nga ora 15:30 në varrezat e reja të qytetit.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.