Ferizaj

Promovohet romani ‘’Shpella’’ i autorit Bashkim Hyseni

Published

8 years ago

21 July, 2018

Një ngjarje me shumë dilema e shumë përjetime. Një rrëfim shumëdimensional i kohës e i kujtimeve, i idealizimit e denigrimit, janë këto që e përshkruajnë romanin e autorit Bashkim Hyseni i titulluar “Shpella”, i cili u promovua sot.

Redaktori i romanit “Shpella”, Sulejman Dërmaku, tha se ky roman sjell përjetime të hidhura e tragjike, të ndërthurura edhe me motive, të cilat bëjnë që secili lexues ta gjej vetën aty.

“Autori Bashkim Hyseni në mënyrë tejet specifike, por me një gjuhë mjaftë të qartë në romanin e tij “Shpella” trajton disa tema të aktualitet tonë që në fakt janë pasqyrë e ngjarjeve të dy epokave të fundshekullit 20 dhe fillimshekullit 21, e të cilat ishin dhe mbeten preokupim i yni i vazhdueshëm. Libri do të zgjoj kërshërinë e lexuesve të të gjitha shtresave e niveleve shoqërore meqë temat të cilat trajtohen brenda kopertinave të romanit janë të tilla saqë secili lexues në njëfarë mënyre do të identifikohet me të bëmat, veprimet a mosveprimet e personazheve duke e vënë kështu në peshojë edhe personalitetin e vet dhe kontributin e dhënë për vendin në instancë të fundit”, tha Dërmaku.

Kurse, recensuesit e romanit “Shpella”, Arsim Hamiti dhe Zyrafete Shala, thanë se temat e shtjelluara në këtë roman, janë tema të patrajtuara deri më sot në letërsinë shqipe.

“Romani ”Shpella” i Bashkim Hysenit botohet 15 vjet pas ditarit të luftës ‘’Jeta mund vdekjen’’, ku autori kishte përmbledhur përjetimet e një kohe të rëndë, ankthin dhe përgjegjësinë që bartnin mbi supe personeli i spitalit të improvizuar ushtarak që krahas mjekimit të ushtarëve të plagosur ishte e nevojshme edhe mbrojtja e tyre nga sulmet e armikut, ky ditarë në një mënyrë është pararendës i hershëm i romanit “Shpella” dhe përmban në vete bërthamat e situatave dramatike që do të jenë pikënisje e fabulës së romanit, por edhe krijimit të personazheve të cilët do të vazhdojnë luftën e tyre në dy dekada jo si luftë kundër armikut, por në luftë me jetën dhe shoqërinë”, theksoi Shala.

“Ky roman trajton atë tranzicionin e papërfunduar social, politik e nacional të shoqërisë sonë që ndodhi pasluftës sonë të fundit dhe po vazhdon të ndodhë akoma, autori në këtë rast na sjell një rrëfim interesant, të zakonshëm në shikim të parë për përditshmërinë tonë, por aspak të zakonshëm për letërsinë e krijimtarinë e pasluftës duke na futur në labirinte të panjohura që pëson njeriu përball fatit të tij, duke ndjekur kryepersonazhin “Gafa”, përjetimet e tij, ne shohim se si realiteti i vrazhdë që kemi ndërtuar paslufte dalëngadalë e vret heroin modern”, tha Hamiti.

Për përmbajtjen e këtij romani foli edhe autori Bashkim Hyseni. Ai tha se në këtë roman është munduar të sjell shqetësimet dhe dilemat e njeriut që jeton nën qiellin kosovar.

“Jam mundu t’i sjell letërsisë shqipe diçka pak më ndryshe, është një tip i një ushtari që jeton në kohën e sotme, ndoshta të një ushtari naiv në kohë që ka idealizu gjithçka, por që megjithatë del se edhe liria ka kosto edhe jeta e sotme nuk është e barabartë për të gjithë, është një bashkëjetesë e dy personazheve njëri që mbetet në shpellë dhe tjetrin që vjen poshtë nga shpella dhe që deri në fund nuk dihet se cilit i ka ra më mirë në këtë kuptim”, tha Hyseni.

Romani “Shpella”u promovua në mesin e dhjetëra shkrimtarëve të të gjitha trojeve shqiptare, të cilët ishin pjesë e kolonisë letrare ‘’Muza e Jezercit, që po mbahet në këtë fshat, organizuar nga klubi letrar “De Rada”.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

4 days ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

5 days ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”

Ferizaj

Sekuestrohet një revole me municion dhe shurdhues në Ferizaj

Published

1 week ago

04 May, 2026

Redaksia

Një person është shoqëruar në stacionin policor në Ferizaj pas një kontrolli në shtëpinë e tij, ku janë gjetur dhe sekuestruar një pistoletë me gaz, pesë fishekë dhe një shurdhues i armës së zjarrit.

Në raportin 24 orësh të policisë bëhet e ditur se rasti ka ndodhur mëngjesin e së dielës, më 3 maj 2026, rreth orës 8:30 në rrugën “Gucia” në Ferizaj .

Me vendim të prokurorit pas intervistimit, rasti vazhdon të hetohet në procedurë të rregullt.