Ferizaj

PAI propozon Florim Bajramin për nënkryetar të komuniteteve

Published

8 years ago

27 July, 2018

Në seancën e ardhshme të Kuvendit Komunal të Ferizajt, kryetari Agim Aliu do të propozoj emërimin e nënkryetarit të komunës nga radhët e komuniteteve. Emri i cili do të propozohet për nënkryetar është Florim Bajrami nga Partia e Ashkalinjve për Integrim, parti kjo e cila e kishte mbështetur Agim Aliun në balotazh për të parin e komunës.

Qazim Rrahmani, nga PAI tha se kryetari i Ferizajt nuk është i obliguar që të emëroj nënkryetarin nga radhët e komuniteteve, por se është vullnet i tij politik, duke shtuar se emërimi i nënkryetarit nga komunitetet nuk është shpërblim për mbështetjen që ia kanë dhënë në fushatë.

“Ky vullnet politik i komunës së Ferizajt për të zgjedhur një nënkryetar shtesë nga radhët e komuniteteve edhe në aspektin kur ne nuk kemi ulëse dhe përfaqësues në asamblenë komunale është mënyra më e mirë e qasjes ndaj komuniteteve për t’iu dhënë të drejtat e tyre të barabarta, normalisht për të respektuar Kushtetutën dhe ligjet në fuqi të Kosovës, ka qenë mjerim që ashkalinjtë nuk kanë pasur ulëse në zgjedhjet e fundit, normalisht kjo ka ndodhë si pasojë e ndarjes politike. Ne e kemi mbështetur programin e zotëri Aliut dhe nuk po themi që tani ky emërim është në kuadër të pazareve politike”, tha Rrahmani.

Rrahmani u bëri thirrje anëtarëve të Kuvendit Komunal që të votojnë pro emërimit të Florim Bajramit në postin e nënkryetarit të komunës, duke thënë se edhe komunitetet pakicë meritojnë përfaqësim dinjitoz nëpër institucione.

“Unë kërkoj nga të gjitha strukturat politike shqiptare që janë të përfaqësuar në Kuvendin Komunal të Ferizajt të na mbështesin, të na e përkrahin kandidatin tonë, mos t’i shikojnë kahet pozitë opozitë, mos t’i shikojnë ngjyrat politike sepse vërtet komunitetet kanë nevojë për përfaqësim në ekzekutivin e komunës, për shkak se popullata pakicë të ketë qasje më të mirë dhe normalisht edhe të ndihmojë komunitetet për kërkesat dhe hallet që kanë. Unë mendoj se partitë politike shqiptare do ta tregojnë vetën këtë herë dhe do të tregojnë vullnetin e tyre polik që me u dhënë mundësinë që komunitetet edhe pa përfaqësues në asamble ata të gjejnë mundësinë të votojnë kandidatin tonë Florim Bajrami”, tha Rrahmani.

Ndër vite, nënkryetar komune nga radhët e komuniteteve kanë qenë Danush Ademi, Rexhep Bajrami dhe Asllan Kryeziu.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

2 weeks ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim