Ferizaj

Drejtoria e Bujqësisë planifikon 365 mijë euro subvencione për këtë vit

Published

6 years ago

02 February, 2021

Anëtarët e Komitetit për Politikë e Financa në Ferizaj mbajtën sot mbledhjen e parë për këtë vit, ku ia proceduan pikat e rendit të ditës Asamblesë Komunale.

Kuvendarët e Ferizajt në seancën e parë për këtë vit që do të mbahet pas 3 dite, do t’i kenë vetëm 8 propozime për t’i diskutuar e miratuar, shumica prej të cilave propozim-vendime për shpallje të interesit të përgjithshëm të ngastrave kadastrale, të cilat sot nuk u diskutuan fare nga anëtarët e Komitetit.

Përveç këtyre propozimeve, nga kuvendarët e Ferizajt do të kërkohet edhe një herë aprovimi i tyre për Rregulloren Komunale për Transparencë, meqë sipas drejtoreshës së Administratës Aurora Ramadani, kjo rregullore ka pësuar disa ndryshime.

“Kjo rregullore ka kaluar në vitin e kaluar përmes këtij Kuvendi, por me shfuqizimin e udhëzimit administrativ për transparencë nga MAPL-ja ne duhet ta harmonizojmë me këtë udhëzim administrativ, prandaj me këto ndryshime kemi sjell tek ju që të votohet dhe të kalohet pastaj si draft. Neni 2, neni 4, neni 5 neni 6.8 dhe 6.9, neni 7, neni 9, neni 18.2 dhe 18.5 dhe neni 26 ka ndryshuar në tërësi në këtë rregullore, prandaj ju ftoj ta votoni”, tha Ramadani.

Ashtu si propozimi i drejtoreshës së Administratës që kaloi pa diskutime, ngjashëm ndodhi edhe me propozimin e Drejtorisë së Bujqësisë për ndarjen e subvencioneve për këtë vit në vlerë prej 365 mijë eurove.

“Përmes kryetarit Aliu kemi propozim-vendimin për ndarjen e subvencioneve në fushën e bujqësisë, këtë propozim e bëjmë duke u bazuar në rregulloren për ndarjen e subvencioneve neni 21 dhe 21.1, rregullore e cila është miratuar nga Kuvendi Komunal“, tha Burim Bajrami, drejtor i Bujqësisë.

Në seancën e së premtes do të jetë edhe propozim-vendimi për zëvendësimin e anëtarit të Komitetit nga radhët e komuniteteve.

Ferizaj

Bëhet i ditur identiteti i viktimave të aksidentit tragjik në Gjermani

Published

5 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

5 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

7 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.