Ferizaj

Kandidatët e LDK-së për deputetë nga Ferizaj vizitojnë institucionet shëndetësore

Published

5 years ago

09 February, 2021

Kandidatët për deputetë në Kuvendin e Kosovës nga radhët e Lidhjes Demokratike të Kosovës në Ferizaj, Muharrem Svarqa, Saranda Musliu e Fadil Haliti, vizituan institucionet shëndetësore në këtë qytet.

Muharrem Svarqa i cili është kryetar i LDK-së në Ferizaj, tha se kandidatët e kësaj partie do të jenë zëri i punonjësve shëndetësor në Kuvendin e Kosovës.

”Unë e përgëzova stafin për angazhimin e bërë dhe u garantova që kandidatët e LDK-së do të jemi zëri i tyre në institucionet më të larta me zotimin se do të jemi konsekuent në luftimin e përfitimeve qoftë për investime infrastrukturore të objekteve të shëndetësisë në Ferizaj, por edhe të rritjes së stafit të mjekëve dhe personelit tjetër ndihmës në raport me rritjen e numrit të banorëve të komunës që për fat të keq që nga regjistrimi i popullsisë vazhdon të mbetet si një mollë sherri që është shndërruar në pengesë të rritjes së këtij stafi, sepse sipas statistikave Ferizaj i ka vetëm 108 mijë banorë, ndërsa numrat real janë afërsisht 150 mijë banorë”, tha Svarqa.

Svarqa falënderoi mjekët dhe infermierët për angazhimin e tyre gjatë pandemisë.

“Mora edhe informacione se janë të shtirë 16 pacientë në spital, ku në raport me përmasat që kanë qenë të shtirë në spital sot numri i tyre është më i vogël që është rezultat i menaxhimit të stafit. Po ashtu vizituam edhe QKMF-në dhe u impresionuam me rritjen e cilësisë së shërbimeve në Spitalin e Ferizajt dhe për gatishmërinë për punën e mëtejme në favor të realizimit të misionit të tyre human”, tha Svarqa.

Në kuadër të fushatës zgjedhore, kandidatët e LDK-së në Ferizaj kanë zhvilluar takime edhe me qytetarë.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.