Ferizaj

Ferizaj nis aktivitetet për shënimin e 13 vjetorit të Pavarësisë së Kosovës

Published

5 years ago

16 February, 2021

Edhe sivjet për nder të 13 vjetorit të Pavarësisë së Kosovës, Drejtoria e Kulturës, e Rinisë dhe e Sportit organizoi turnirin tradicional në volejboll me femrat që punojnë në institucionet publike.

Në aktivitetin sportiv ku morën pjesë vetëm 4 ekipe, vendin e parë edhe këtë vit e zuri ekipi i Policisë së Kosovës, vendin e dytë Qendra Kryesore e Mjekësisë Familjare në Kaçanik, ndërsa në vendin e tretë dhe të katërt u renditën ekipi i Spitalit Rajonal të Ferizajt dhe ai i komunës.

“Policia çdo herë merr pjesë dhe është kënaqësi të jemi këtu, lojën e parë e fituam, ndërsa tani po pretendojmë të fitojmë prapë, por me rëndësi është pjesëmarrja dhe takimi me femrat e institucioneve të tjera“, tha Suzana Krasniqi nga ekipi i Policisë.

“Është hera e dytë që po marrim pjesë, edhe pse është koha pak ftohtë por është kënaqësi e madhe të marrim pjesë pasi është një aktivitet ndryshe nga puna që e bëjmë”, tha Rita Runjeva nga ekipi i QKMF- së në Kaçanik.

Drejtoresha e Kulturës, e Rinisë dhe e Sportit Xhemile Murati-Shabani, tha se pavarësisht situatës me pandeminë nuk kanë dashur që ky aktivitet të mungoj as sivjet. Ajo njoftoi se kanë organizuar edhe turneun dedikuar diasporës.

“Mënyra e organizimit në rrethana pandemie nuk ka qenë e lehtë të realizohet, por kemi vendosur që ta realizojmë këtë aktivitet në mënyrë që mos ta humbim traditën, po ashtu kemi filluar ta mbajmë edhe aktivitetin e diasporës si shenjë respekti edhe për diasporën, por edhe për punonjësit tanë këtu si policinë e mjekët”, tha Xhemile Murati-Shabani.

Në këtë aktivitet tradicional në Ferizaj mori pjesë edhe presidenti i Komitetit Olimpik të Kosovës Besim Hasani, i cili tha se një aktivitet i tillë do të duhej të organizohej në të gjitha komunat.

“Është kënaqësi të jesh në një turne të tillë pasi ka rëndësi të jashtëzakonshme aktivizimi i femrave të moshës së dytë. Komuna është duke bërë një punë të mirë dhe erdha që t’i përgëzoj për këtë aktivitet, po ashtu edhe të shfrytëzoj momentin që t’i ftoj të gjitha komunat të bëjnë një gjë të tillë“, tha Hasani.

Për nder të 13 vjetorit të Pavarësisë së Kosovës gjatë ditës së sotme janë mbajtur edhe aktivitete letrare, ekzpozitë kolektive, ndërsa aktivitete janë paraparë që të mbahen edhe nesër më 17 shkurt.

Ferizaj

Aktakuzë ndaj tre të dyshuarve për mashtrim me kriptovaluta në Ferizaj

Published

1 day ago

22 May, 2026

Redaksia

Prokuroria Themelore në Ferizaj, Departamenti i Përgjithshëm, ka ngritur aktakuzë kundër të pandehurve me inicialet: A.L., R.J. dhe V.N., për shkak të dyshimit në bashkëkryerje kanë kryer veprën penale”Mashtrimi” sipas Kodit Penal të Republikës së Kosovës

Të pandehurit dyshohen se më 17 Prill 2026, në Ferizaj, rruga, “Cen Dugolli” me dashje dhe në bashkëveprim, me anë të paraqitjes së rreme të fakteve dhe duke përdor emra të rreme, i vënë në lajthitje të dëmtuarit E.F., A.F., dhe Rr.K, duke ua marrë 12,000 euro si kundërpagesë për kriptovaluta të llojit USDT të cilat do t’ua transferonin përmes portofolit digjital “wallet”.

Pasi të dëmtuarve ua marrin shumën prej 12 mijë eurove, të pandehurit i fusin paratë në një çantë të gjelbër dhe i vendosin në një dollap brenda lokalit të cilin e kishin marrë me qira. Ata kishin hapur një vrimë në pjesën e pasme të dollapit, nga ku i morën paratë pa u vërejtur dhe u larguan në drejtim të panjohur.

Pas hetimeve, u zbulua se të dyshuarit e njëjtë, duke përdorur të njëjtën skemë, kishin organizuar një transaksion fiktiv në rrugën “Ismail Reka” në Kaçanik. Edhe aty kishin siguruar një lokal me qira për t’u takuar me persona të interesuar, të cilëve u kishin ofruar transferimin e USDT-ve në vlerë prej 50 mijë Euro.

Aktakuza ngarkon gjithashtu dy nga të pandehurit, A.L. dhe R.J., për një rast të ndodhur më 18 Gusht 2024 në rrugën “Agim Prodani” në Ferizaj ku të dëmtuarit G.A. ia kishin marrë me mashtrim 2 mijë euro duke i premtuar transferimin e kriptovalutave në portofolin e tij. Me të marrë paratë nga viktima, dy të pandehurit largohen me vrap në drejtim të panjohur.

Për të gjitha këto veprime, tre të pandehurit akuzohen për veprën penale “Mashtrimi” nga neni 323 paragrafi 1, lidhur me nenin 31 të Kodit Penal të Republikës së Kosovës.

“Prokurori i çështjes, me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur të shpallen fajtor për veprën penale për të cilën akuzohen dhe të dënohen sipas ligjit”, thuhet mes tjerash në njoftimin e Prokurorisë Themelore të Ferizajt.

Ferizaj

Punëtori që ra nga kulmi i një objekti në Babush u dërgua në QKUK

Published

2 days ago

21 May, 2026

Redaksia

Një 27-vjeçar ka pësuar lëndime të rënda trupore pasi ka rënë nga kulmi i një objekti në fshatin Babush, në magjistralen Ferizaj-Prishtinë.

Në raportin 24 orësh të policisë bëhet e ditur se rasti u raportua të mërkurën, 20.05.2026 rreth orës 15:00.

“Është raportuar se viktima )mashkull kosovar) derisa kishte qenë duke punuar në kulmin e një objekti ishte rrëzuar dhe kishte pësuar lëndime trupore. Viktima fillimisht është dërguar në emergjencën e Ferizajt, por për shkak të gjendjes së rëndë shëndetësore është dërguar në QKUK” thuhet në njoftim.

Në vendin e ngjarjes kanë dalë njësitë relevante të policisë dhe inspektorët e punës derisa rasti është cilësuar si “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Ferizaj

Policia godet një rrjet të kontrabandës së kafshëve në Ferizaj

Published

3 days ago

20 May, 2026

Redaksia

Policia kufitare ka realizuar një operacion në fshatin Rakaj të Ferizajt, nën dyshimin për kontrabandë të dhe mbajtje të paligjshme të kafshëve.

Në njoftimin e policisë bëhet e ditur se gjatë kontrollit të njësive policore dhe inspektorit të Agjencisë së Ushqimit dhe Veterinës (AUV), në pronën e të dyshuarit L.K dhe dy lokacione tjera, janë gjetur 100 krerë dele pa numra matrikulli dhe pa asnjë dokumentacion përcjellës mbi origjinën apo kontrollin veterinar.

Me vendim të Prokurorit të Shtetit rasti po trajtohet si “Kundërvajtje doganore” dhe i është dorëzuar Doganës së Kosovës në Han të Elezit për procedim të mëtutjeshëm.