Ferizaj

Kinemaja e Ferizajt, projekt i zvarritur që 6 vjet

Published

5 years ago

06 May, 2021

Projekti i ndërtimit të kinemasë së qytetit të Ferizajt i cili kishte filluar në vitin 2015, e që ishte projekt dy vjeçar, akoma është shumë larg përfundimit.

Edhe pse kanë kaluar gjashtë vjet që nga nisja e punimeve, ky projekt është zvarritur për shkak të borxhit që komuna ka ndaj punëkryesit.

Punëkryesi “ES Commerce” i cili nuk pranoi të flasë para kamerës, i tha Televizionit Tema se ky projekt kishte shumën e 460 mijë eurove dhe se shumicën e këtyre parave i ka marrë përmes përmbaruesit, pasi komuna e Ferizajt nuk ka ndarë buxhet për projektin e kinemasë. Ai tha se komuna ia ka edhe 60 mijë euro borxh, duke treguar se më 18 prill e ka dorëzuar edhe faturën e fundit në komunë, ku përgjigjia e tyre ishte se nuk kanë buxhet.

Regjisori ferizajas Besim Ugzmajli projektin e kinemasë e sheh si të dështuar dhe jofunksional.

“Është bërë një përpjekje e dështuar, jashtëzakonisht e çuditshme dhe e pashpjegueshme e ndërtimit të një kinemaje të re, e cila duke mos u lexu mirë programi i një kinemaje të mirëfilltë ka dalë një objekt jofunksional për kinema, pasi që kinematë e sotit janë pjesë e rrjetit të brendeve ndërkombëtare të filmit dhe kinemaja jonë nuk i plotëson këto kushte, nuk do të ketë mundësi që për shkak të kushteve infrastrukturore të vjen një brend i kinemave të vendoset në qytetin e Ferizajt, jemi në një gjendje ku nuk kemi kinema. Me rregulla të Bashkimit Evropian preferohet që një qytet si i joni me këtë numër të banorëve do të ishte dashur t’i kishte së paku tri kinema, ndërsa qyteti nuk e ka asnjë e që mendoj se është një hendikep i jashtëzakonshëm për qytetin e Ferizajt me fajin e pothuajse të gjithëve”, tha ai.

Ugzmajli thotë se shteti do të duhej të angazhohej për të ndërtuar hapësira për kulturë.

“Mendoj që kjo duhet të jetë punë e përbashkët e komunitetit dhe institucioneve që të krijohet mundësia që të kemi së paku një kinema në Ferizaj. Ky problem nuk është vetëm i Ferizajt, por thuajse i të gjitha qyteteve të Kosovës, me përjashtim të Prizrenit që ka një zgjidhje pak a shumë funksionale dhe Peja që herë pas here, ndërsa qytetet e tjera e kanë këtë telash. Për mendimin tim do të duhej një organizim mbarështetëror në sigurimin e hapësirave që i kishin plotësu kushtet e një brendi serioz të distribuimit të filmave në Kosovë”, u shpreh ai.

Rreth kësaj teme Televizioni Tema përveç punëkryesit ka tentuar të bisedojë edhe me Drejtoreshën e Kulturës Xhemile Murati-Shabani, mbikëqyrësin e projektit të kinemasë Skender Baftiu dhe me zëdhënësin e komunës së Ferizajt, Albion Sherifi, por që të tre nuk pranuan të flasin para kamerës.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim