Ferizaj

Fermerët të shqetësuar për tërheqjen e masave mbrojtëse

Published

8 years ago

03 August, 2018

Vendimin për tërheqjen e taksës doganore prej 30 për qind në importin e pemëve, perimeve dhe misrit nuk e kanë mirëpritur prodhuesit vendor.

Fermeri Muhamet Karalia nga fshati Pleshinë, i cili ka të mbjella 2 hektarë e 40 ari me perime të ndryshme, thotë se ky vendim i Qeverisë ua pamundëson shitjen e prodhimeve.

“Na dëmton se ne vjet e kemi parë vetin se ku jemi, pasi vitin e kaluar kanë ardhur artikuj të lirë nga Maqedonia e Serbia a ku po e di unë, aq shumë kanë ardhur artikuj të lirë sa që ne kemi punuar e kemi prodhuar pa fitim dhe 70% na ka shkuar dëm, e tash pasi i kanë liruar apet nuk është mirë, nuk është e drejtë, por ku po i dimë ne interesat e tyre”, tha Karalia.

Njohësi i fushës së bujqësisë dhe tregut Avdullah Isufi, thotë se vendime për masa mbrojtëse kanë të gjitha shtetet e rajonit dhe se të tilla janë shumë të nevojshme për përkrahjen e prodhuesve vendor.

“Fermerët vendor vazhdimisht kanë kërkuar që produktet e tyre gjatë pikës së vjeljes të mbrohen pasi kanë një kosto të prodhimit të lartë ndërsa ndodhë që ato t’i shesin nën koston e prodhimit, Ministria e Tregtisë e ka vu një masë para disa ditëve që pastaj ka qenë e detyruar ta heq, por nuk ka bërë konsultime paraprake, vërtet është për të ardhur keq mënyra se si janë deklaruar, këto masa i praktikojnë të gjitha shtetet përreth, si Serbia, Maqedonia, Shqipëria e Mali i Zi dhe masat që i marrin nuk i bëjnë publike në media, kemi rastin në Shqipëri vite të tëra bën barriera të tilla në patate dhe vezë në kohën kur vjen koha për eksport ata e mbrojnë produktin e vet dhe kemi parë storie kur prodhuesit tonë ankohen ministri jonë shkon në Tiranë dhe ata bëhen sikur nuk e kanë ditë dhe lajmëron se do ta heq këtë masë dhe kjo periudhë zgjatë një muaj kur vetëm se është arritur efekti atje, këtë ka qenë dashtë ta bëj edhe shteti ynë”, tha Isufi.

“Sot po e qet taksën, ndërsa nesër po e heq dhe me i thanë importuesit zvogëloj çmimet nuk ka mundësi kjo, sepse depot janë të mbushura me mall, tani çka ka ndodhë me këtë veprim, për dy ditë që importuesit që kanë shti mallra, siç është një firmë në Ferizaj për dy ditë i ka ardh pagesa shtesë 5 mijë euro dhe ka pas humbje të mëdha, ndërsa tani është heq ai vendim i barrierave dhe tani kush ua jep ato pare kësaj firme dhe që tri-katër ditë jemi duke punuar pa tarifë, ndërsa sa importuesi ka hyrë në Kosovë vlera e tyre për dytë ditë ka qenë 1 milion euro, tani kush ua jep ato para atyre”, tha Kastriot Shabani.

Për tërheqjen e masave mbrojtëse, të acaruar shprehen edhe qytetarët.

“Shumë gjynah po më vjen për fermerët tanë që e bëjnë prodhimin edhe nuk munden me shitë, shkon posht, duhet shteti në kufi me i ndalë, prej Greqisë vjen domatja duke e pasur këtu në vend, turp është”, tha Vehbi Terzia.

Vendimi i Qeverisë së Kosovës për vendosjen e masave mbrojtëse për pemë, perime dhe misër nuk zgjati më shumë se dy javë.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

1 day ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”