Ferizaj

Banorët bllokojnë magjistralen, kërkojnë asfaltimin e rrugës në Tërrn

Published

7 years ago

25 August, 2018

Përreth 30 minuta banorët e fshatit Tërrn, Bablak, Lubovc dhe Koshare, kanë bllokuar magjistralen Prishtinë-Shkup në shenjë revolte për mosasfaltimin e rrugës që kalon përgjatë këtyre fshatrave.

“Këtu jemi për të ushtruar të drejtën tonë të protestës ndaj padrejtësive të vazhdueshme që po u bëhen komunitetit tonë, që nga viti 1999 ne përballemi me mungesë të kushteve elementare përfshi rrugën e cila nuk është përkujdesur asnjëherë askush për mirëmbajtjen e saj, shpresojmë që zëri i këtyre qytetarëve do të merret parasysh në mënyrë që të ndërmerret urgjentisht një masë për rehabilitimin e kësaj rruge”, tha Adnan Ibrahimi, banor i fshatit Tërrn.

“Fshati Tërrn i ka afër 1500 banorë, ashtu edhe Bablaku, fshati Lubovc diku 500 banorë, janë duke hek me vite në këtë rrugë me gropa e vërshime, këto fjalë të qytetarëve të tri fshatrave të hynë në vesh të qytetarëve sidomos të ministrit Pal Lekaj që të ndërmerr masa e ta rregullloj këtë rrugë”, tha Ramadan Ademi, banor i fshatit Tërrn.

Në mbështetje të banorëve ishin edhe deputeti i Kuvendit të Kosovës Labinot Tahiri dhe asamblistë të Kuvendit Komunal të Ferizajt.

“Absolut nuk jemi për me blloku rrugë, por me zhblloku rrugë dhe për me bë zgjidhje, por vetë fakti që kjo rrugë është tranzitore dhe është përdorë nga të gjithë qytetarët dhe sot me u lënë pas dore që disa vite është absurde, unë kam shpresu prej Qeverisë Hardinaj dhe minsitrit Pal Lekaj pasi kemi qenë bashkë dhe kemi premtuar, ndërsa tani unë bëj edhe një herë apel që kjo rrugë duhet të shtrohet”, tha Labinot Tahiri.

“Është momenti i fundit që Ministria të reflektojë, janë shterur të gjtiha debatet dhe e vetmja formë është protesta prandaj unë pres që pas kësaj proteste ministri të reflektoj, pasi këta banorë me vite po gënjehen”, tha Amir Rexhepi, asamblist i KK.

“Çka është më e dhimbshme është se kjo rrugë ka hyrë si projekt, janë ndarë mjetet dhe me u heq në fazën finale nga KRPP-ja kjo është e dhimbshme, nuk e di se nga e gjenë atë qetësim ministri Lekaj“, tha Saranda Musliu, asambliste në KK.

Ankesat e banorëve të këtyre fshatrave i arsyeton edhe kryetari i komunës së Ferizajt Agim Aliu. Ai tha se kanë kërkuar që procedurat ligjore për këtë projekt t’i barten komunës së Ferizajt.

“Unë kam kërkuar që procedurat të barten në komunën e Ferizajt për faktin se kam llogaritur se ne si komunë do të merrnim përgjegjësinë e plotë për këtë proces në mënyrë që të shkurtohen afatet kohore dhe siç janë shpjeguar nga departamenti ligjor i Ministrisë së Infrastrukturës ka qenë se janë zhvilluar procedura të mëhershme dhe kjo ka qenë arsyeja që nuk është bartur si çështje në komunën e Ferizajt pavarësisht se ne kemi insistuar”, tha Aliu.

Banorët paralajmëruan se protestat nuk do t’i ndalin deri në realizimin e kërkesës së tyre. Madje, ata thanë se në protestën e radhës rrugën magjistrale Prishtinë-Shkup do ta bllokojnë gjatë tërë ditës.

Art & Showbiz

Nis edicioni i 55-të jubilar i Festivalit të Teatrove Ferizaj

Published

2 weeks ago

01 September, 2025

Redaksia

Nga sot deri më 7 shtator 2025, në Ferizaj do të mbahet Festivali i Teatrove, i cili sivjet shënon edicionin e 55-të jubilar.

Hapja zyrtare e festivalit bëhet nga ora 19:00 me shfaqjen “13” me regji të Sulejman Rushitit, në teatrin “Adriana”, derisa ditëve në vijim, para publikut ferizajas,do të prezantohen disa shfaqje të prodhuara dhe ngjarje të veçanta nga konceptet “Retroteatri” dhe “FTF Skena”.

Festivali i Tetarove Ferizaj, është prej festivaleve më të vjetra në Kosovë, i cili që nga viti 1970, përmes shfaqjeve nga vende të ndryshme jo vetëm vendore por edhe ndërkombëtare, bashkon profesionistë të teatrit dhe artdashës.

Hapjes zyrtare të festivalit do t’i paraprijë shfaqja për të rinj “Black Box” të cilën artdashësit mund ta shohin në Galerinë e qytetit të Ferizajt.

Këtë vit, në programin zyrtar të festivalit, do të jenë shfaqjet: “13” (më 1 shtator), “Bëje ose vdis” (2 shtator), “Djali” (3 shtator), “Hijet e Kohës” dhe “Komedia e zezë” (4 shtator), “God blesh America” (5 shtator), “Kjo është rinia jonë” dhe “PRISHTINA. Vrasja e paralajmëruar e një ëndrre” (6 shtator) si dhe shfaqja “Të vërtetat tona” (7 shtator).

Ky edicion jubilar i festivalit do të përmbyllet më 7 shtator, me shfaqjen jashtë konkurrence “Të bardhët”.

Tradicionalisht, çdo ditë të festivalit organizohen edhe debate për teatrin, punëtori krijuese me artistë ndërkombëtar dhe ndeja pas çdo shfaqjeje në oborrin e Teatrit.

Ferizaj

Arrestohet për vjedhje të trotineteve dhe biçikletave në Ferizaj

Published

3 weeks ago

23 August, 2025

Redaksia

Hetuesit e stacionit policor në Ferizaj, kanë arrestuar të dyshuarin B. T, 28 vjeç, i cili gjatë periudhës 01.07.2025 – 19.08.2025 ka kryer disa raste të vjedhjeve në banesa dhe objekte banesore në qytetin e Ferizajt.

Sipas policisë, nga hetimet është vërtetuar se i dyshuari ka vjedhur dy trotinete elektrike dhe dy biçikleta, me vlerë totale prej rreth 4.220 €, të cilat më pas i kishte shitur personave tjerë, duke iu treguar se ishin të vjedhura.

Me urdhër të prokurorit të shtetit, i dyshuari B. T. është ndaluar për 48 orë për procedura tjera hetimore.

Sendet e vjedhura janë sekuestruar dhe do t’u kthehen pronarëve ligjorë.

Ndërsa ndaj dy personave të tjerë, G .B, 33 vjeç dhe B. H.,25 vjeç, është iniciuar rasti penal “Blerja, pranimi ose fshehja e sendeve të përfituara nga vepra penale”, pasi kanë pranuar se ishin në dijeni për origjinën e tyre.

Ferizaj

Digjen rreth 13 hektarë me të mbjella dhe mal në Lloshkobare të Ferizajt

Published

3 weeks ago

21 August, 2025

Redaksia

Në fshatin Lloshkobare të Ferizajt, nga zjarri janë djegur disa hektarë me të mbjella të ndryshme. Viktimat dyshojnë për zjarrëvënie të qëllimshme nga persona të panjohur.

Në raportin 24-orësh të Policisë së Kosovës, thuhet se të mërkurën pasdite, viktimat kanë raportuar se nga zjarri atyre u janë djegur 5 hektarë mjedër, 3 hektarë të mbjella me dredhëza, 1 hektar me arra dhe 3 hektarë mal.

“Ferizaj 20.08.2025-16:30. Raportohet se persona të panjohur i kanë vënë zjarrin pronës se dy viktimave meshkuj kosovarë, ku janë djegur rreth 3 hektarë me mal, 5 hektarë mjedër, 4 hektarë me dredhëza dhe 1 hektar me arra, që janë djegur në tërësi”, njoftoi Policia e Kosovës.