Ferizaj

Projekti i shujtave për nxënësit në pikëpyetje

Published

8 years ago

06 September, 2018

Viti i ri shkollor filloi, por kiflet ende nuk u erdhën nxënësve. Ky projekt i cili u kritikua më së shumti nga kjo qeverisje për harxhim të buxhetit komunal, sipas të gjitha gjasave nuk do të vazhdojë më tutje. Drejtori i Arsimit në Ferizaj Afrim Llabjani, tha se pushtetarët ende nuk kanë vendosur se si do t’ia bëjnë me projektin e shujtave ditore për nxënësit filloristë të shkollave të komunës së Ferizajt.

“Ky projekt ka filluar vitin e kaluar dhe kontrata e operatorit ka qenë deri në përfundimin e vitit shkollor. Do të thotë kontrata i ka skaduar këtij projekti dhe ne nuk e kemi vazhduar më kontratën dhe nuk e kemi ndonjë kërkesë të madhe për të vazhduar tutje, por jemi në proces të kësaj çështje, por se çfarë do të ndodhë ende nuk dihet, sepse do të shohim se si do të koordinohemi me të gjithë akterët”, tha Llabjani.

Llabjani tha se deri më tani kjo kontratë nuk është vazhduar për shkak të shumës së madhe të projektit.

“Ka qenë një kontratë mbi 1 milion e 100 mijë euro dhe si shumë e madhe që ka qenë është e vërtet që e ka dëmtu mjaftë buxhetin e komunës dhe për këtë arsye ne duhet ta rishikojmë me shumë hollësi këtë projekt. Ndryshe, nuk mendoj se është ndonjë humbje politike, pasi që ne jemi duke u përpjekur që të marrim një vendim më të qëlluarin për momentin“, tha Llabjani.

Nga projekti komunal i shujtave ditore kanë përfituar mbi 10 mijë nxënës të shkollave fillore të Ferizajt, prej klasës së parë deri në të pestën.

Ferizaj

Bëhet i ditur identiteti i viktimave të aksidentit tragjik në Gjermani

Published

1 day ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

1 day ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

3 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.