Ferizaj

Shkolla ”Zenel Hajdini” përfiton pajisje teknologjike nga MZHE

Published

8 years ago

11 September, 2018

Shkolla e mesme e Agrobiznesit dhe Teknologjisë ”Zenel Hajdini” në Ferizaj, ka përfituar disa mjete teknologjike në vlerë 20 mijë euro nga Ministria e Zhvillimit Ekonomik.

Drejtori i kësaj shkolle Abdullah Imeri, tha se po punojnë që nxënësve të shkollës së Agrobiznesit dhe Teknologjisë t’u ofrohen kushte për mësim.

“Në këtë donacion janë përfshirë mjete që nuk i kanë kabinetet e informatikës, janë mjete që nxënësi do ta prek praktikisht punën kur shkon në një mësim. Ne së bashku me Ministrinë e Zhvilimit Ekonomik kemi bërë marrëveshje që të bëjmë një grup prej nxënësve më të mirë që ata në fund të dalin kuadër, apo të kenë njohuri si riparohen kompjuterët e si punojnë ata. Përveç këtyre është një printer 3D, ku nxënësit nuk do shohin printimin e një letre, por printimin e një objekti, që në shkollat tona të mesme nuk besoj se ka pasur një të tillë. Në kuadër të saj e kemi edhe një donacion që pritet të vijë, është një kompjuter me projektor dhe ai do të jetë për Qendrën e Karrierës përmes së cilit nxënësit do të udhëzohen për profile. Ky donacion do të jetë nxitës që nxënësit të vijnë në këtë shkollë pasi jemi duke punuar që t’iu sigurojmë kushte”, tha Imeri.

Edison Avdiu, mësimdhënës i lëndës së teknologjisë së informimit, tha se me anë të këtyre pajisjeve nxënësit do ta kenë më të lehtë të kuptojnë lëndën e informatikës.

“Janë disa paisje që janë të veçanta, nuk bëjnë pjesë në pajisje të thjeshta të teknologjisë së informimit, por bëjnë pjesë në pajisje speciale për teknologjinë e informimit, janë disa pllaka e pajisje të tjera që shërbejnë për elektronikë dhe nxënësit me mësu në praktikë se si kryhen disa procese në informatikë. Ne kemi pasur kabinet të informatikës, por ai ka shërbyer si mënyrë ligjëruese por jo si këto pajisje. Në këtë kabinet ne do ta formojmë një grup prej 25 nxënësve të cilët do t’i zgjedhim se cilët kanë më shumë prirje”, tha Avdiu.

Përveç shkollës së Agrobiznesit dhe Teknologjisë ”Zenel Hajdini”, donacion i ngjashëm u është dhuruar edhe dy shkollave të tjera të Ferizajt, Qendrës së Kompetencës dhe shkollës ekonomike “Faik Konica”.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

2 weeks ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim