Kryeministri Albin Kurti, deklaroi se Qeveria e Kosovës nuk pranon që anëtarësimi në Këshill të Evropës të kushtëzohet me themelimin e Asociacionit të komunave me shumicë serbe.

Kurti, në mbledhjen e sotme të Qeverisë tha se Kosova i ka përmbushur të gjitha kushtet dhe se kjo është konfirmuar nga të gjitha raportet e deritashme dhe me votimin në Asamblenë Parlamentare të KiE-së në prill andaj, siç u shpreh, është për keqardhje mungesa e përkrahjes për anëtarësim nga disa shtete alete dhe se kushti i ri është jashtë standardeve të anëtarësimit.

“Qeveria nuk e pranon kushtëzimin e anëtarësimit në KiE me Asociacion. Për normalizimin e marrëdhënieve me Serbinë, ne bisedojmë në Bruksel, e jo në Strasburg”, tha Kurti.

Franca dhe Gjermania i kërkuan Kosovës të bëjë hapa drejt themelimit të Asociacionit para takimit të ministrave të KiE më 16 dhe 17 maj.

Në anën tjetër,  Holanda, Suedia, Belgjika, Finlanda bashkë me Britaninë e Madhe si shteti më i fuqishëm brenda KiE-së, i kanë ofruar Kosovës mbështetje pa kushte shtesë për anëtarësim në këtë organizatë.

“Ne dëgjuam se ka kryeqytete që tash po e kushtëzojnë finalizimin e procesit të anëtarësimit me dërgimin e një dokumenti në gjykatën Kushtetuese të Kosovës. Qeveria e Kosovës nuk mund të dërgojë në Gjykatë Kushtetuese dokumente, të cilat nuk i ka pranuar dhe të cilat nuk janë zyrtare. Kjo kërkesë ndaj nesh ka qenë dhe mbetet absurde”, shtoi Kurti.

Ai ka përsëritur se Kosova ka ofruar që draft-statuti i sjellë nga Bashkimi Evropian të përfshihet në pakon me marrëveshjen bazë dhe aneksin e Ohrit, por se përpjekja nuk ishte përmbushur për shkak se Serbia ka refuzuar nënshkrimin e pakos.

“Refuzimi s’është pranim. Refuzimi është refuzim. Nëse më 26 tetor 2023 do të pranohej e nënshkruhej paketa e marrëveshjes vetëm atëherë ai draft-statut do të mund të dërgohej në Gjykatë.

Draft-statuti i emisarit Lajçak dhe emisarëve të tjerë dështoi të zyrtarizohej pasi u refuzua. Si i tillë është një jo dokument, është non-paper. Qeveria nuk mund të dërgojë dokumente që s’janë zyrtare”, ka thënë mes tjerash kryeministri Kurti.

Më 27 mars, Komiteti për Politikë dhe Demokraci i Këshillit të Evropës miratoi raportin e raportueses për Kosovën, Dora Bakoyyanis, e cila tha se vendi i ka plotësuar kushtet për t’u bërë anëtar me të drejta të plota i organizatës, ndërsa Asociacionin e konsideroi si çështje të brendshme të Kosovës.

Ky raport, më 16 prill, me shumicë të madhe kaloi edhe në Asamblenë Parlamentare të Këshillit të Evropës, ndërsa vendimin përfundimtar për anëtarësimin e Kosovës duhet ta marrë Komiteti i Ministrave më 16 maj në Strasburg.

Zëvendësministri i Mjedisit, Planifikimit Hapësinor dhe Infrastrukturës, Hysen Durmishi, pas intervistimit në Prokurorinë Speciale për tenderin e rrugës Prishtinë-Podujevë ka deklaruar se ka qenë i ftuar si i dyshuar.

Durmishi u tha mediave se kjo fazë është fillestare gjatë së cilës ka sqaruar pyetjet e prokurorit për të dëshmuar “pastërtinë e plotë” të tij në procesin e ndërtimit të rrugës Prishtinë- Podujevë.

“Isha i ftuar në cilësinë e të dyshuarit për rastin e projektit të ndërtimit të rrugës Prishtinë-Podujevë. Kryesisht kjo është fazë e fillestare dhe pyetjet e prokurorit ishin pyetje sqaruese të cilat unë i sqarova po thuaj se të gjitha pyetjet të cilat I kishte prokurori për ta dëshmuar se procesi për rrugën Prishtinë Podujevë ka qenë një proces i rregullt dhe se atje po zhvillohen punimet me dinamikën të cilën e kemi planifikuar dhe në një farë mënyre sqarova para prokurorit pastërtinë e plotë timen në gjithë këtë proces.

Bëhet fjalë për një kallëzim penal që e ka bërë një operator ekonomik, ankues në kohën kur janë nënshkruar këto kontrata e cila është krejtësisht e pabazuar. Ka vendime edhe të OShP-së, dokumente të cilat janë publike dhe që dëshmojnë pastërtinë tonë në gjithë këtë proces. Prandaj thjeshtë ishin disa sqarime të prokurorit të cilat ai i mori dhe tash po presim”, tha ai.

Durmishi shtoi se punimet në rrugën Prishtinë-Podujevë do të vazhdojnë dhe pritet që brenda vitit të përfundojnë.

Ministrja e Punëve të Jashtme, Donika Gërvalla, ka njoftuar se Rusia aktualisht po kryen një sulm hibrid ndaj Kosovës.

Gërvalla tha se sulmi hibrid rus ndaj Kosovës po vjen pas njoftimit të mbështetjes së Kosovës me pajisje ushtarake për Ukrainën.

“Rusia sot po e sulmon Kosovën në një mënyrë hibride, pas njoftimit tonë për mbështetje me pajisje ushtarake për Ukrainën, në mbrojtjen e saj të justifikuar kundër agresionit gjenocidal rus. Ne e dimë nga gjenocidi i Serbisë ndaj Kosovës se vetëm mjetet ushtarake e ndalin gjenocidin” ka shkruar Gërvalla në rrjetin social “X”.