Botë

Avokati Stojkoviq: Agjentët e Putinit po nxisin konflikt të armatosur në Kosovë

Published

4 years ago

04 August, 2022

Avokati beogradas Çedomir Stojkoviq, një aktivist i cili haptazi lobon për integrimet evropiane dhe e kundërshton ndikimin e Rusisë në hapësirën politike të Serbisë, më 1 gusht 2022 i ka bërë thirrje publike Agjencisë Serbe të Inteligjencës (BIA) që t’i bëjë publik emrat e të gjithë agjentëve të Rusisë të cilët veprojnë në këtë vend, pasi që sipas tij, ata janë përgjegjës për ngritjen e tensioneve në Kosovë dhe nxitjen e frikës tek serbët e Kosovës.

Në këtë deklaratë publike Stojkoviq shkruan:

“ Më 28 maj 2022, ne i paraqitëm një kërkesë Ambasadës së Federatës Ruse për tërheqjen e 4036 agjentëve të saj nga Republika e Serbisë, në mënyrë që vendi ynë të marrë vendime të rëndësishme për të ardhmen e tij në mënyrë sovrane dhe të pavarur, ndër të cilët 27 agjentë janë brenda Qeverisë së Serbisë, shtatë agjentë në Presidencën e Serbisë, 86 agjentë në Ministrinë e Mbrojtjes, 64 agjentë në Ministrinë e Punëve të Brendshme, 113 agjentë në Agjencinë Informative të Sigurisë (BIA) dhe agjentë të shumtë në sferën publike të veprimit dhe në organizatat fetare në Serbi”.

Sipas Stojkoviq, shërbimet e brendshme të sigurisë të Serbisë nuk e kanë ndërmarrë asnjë hap të vetëm për të penguar veprimet e këtyre agjentëve nga atëherë e deri më sot, dhe se Federata Ruse e ka injoruar këtë kërkesë të tij.

“Javët e fundit është vënë re një koordinim i shtuar i agjentëve rusë në Serbi, i cili kulmoi ditëve të fundit rreth çështjes së Kosovës, ku në sferën publike shpërndanin informacione të rreme për gjoja sulme të planifikuara në Kosovë, gjoja spastrim etnik të planifikuar, të gjitha për të krijuar panik dhe frikë tek qytetarët e Serbisë dhe në këtë mënyrë provokuan konflikte të armatosura në Kosovë”, thekson Stojkoviq.

Ai shtoi se agjentët rusë njëkohësisht janë infiltruar edhe në sistemin e rrjedhës së informacionit nga terreni drejt udhëheqjes politike të Republikës së Serbisë, dhe si rezultat vendimmarrësit nuk kanë informata reale dhe të sakta për ngjarjet në terren, prandaj duhet të mbështeten në informacione nga vende të tjera, gjë që në përgjithësi e rritë ekspozimin ndaj rreziqeve, vendimeve të gabuara dhe përshkallëzimit të armatosur të panevojshëm. Nga ana e tretë, thekson ai, disa vendimmarrës janë nën ndikimin e jashtëzakonshëm të Ambasadës së Federatës Ruse në Beograd.

Ai i bëri thirrje BIA-s që të fillojë të bëjë punën e saj dhe të largojë njerëzit e Putinit nga sistemi i rrjedhës së informacionit, të zbulojë në publik emrat e të gjithë agjentëve rusë në hapësirën publike (analistë politikë, zyrtarë të partive politike, deputetë…), si dhe njerëzit që janë nën ndikimin e tyre.

Në deklaratën publike të tij, Avokati Stojkoviq kërkoi që të ndërmerren veprime për mbylljen e të gjitha llogarive në rrjetet sociale të drejtuara nga Agjencia Ruse për hulumtime në Internet, të cilat nxisin urrejtje kundër qytetarëve të Serbisë dhe nxisin konflikte të armatosura. Ai poashtu kërkoi nga BIA që ta mbrojë Serbinë nga “okupimi informativ i Putinit”.

Botë

Trump thotë se ka “mundësi serioze” për ujdi me Iranin, pasi i pezulloi sulmet ndaj caqeve energjetike

Published

2 weeks ago

23 March, 2026

Redaksia

Presidenti i Shteteve të Bashkuara, Donald Trump, ka thënë të hënën se ka “mundësi shumë serioze” për të arritur marrëveshje me Teheranin, pasi tregoi se SHBA-ja dhe Irani zhvilluan bisedime gjatë fundjavës, gjë që e shtyu atë t’i pezullojë sulmet ndaj infrastrukturës energjetike iraniane për pesë ditë.

Duke folur për gazetarët para se të hipte në avionin Air Force One më 23 mars, Trump tha se i dërguari special, Steve Witkoff, dhe dhëndri i tij, Jared Kushner, janë përfshirë në bisedimet e nisura nga Irani.

Ai tha se bisedimet po zhvillohen me një lider “të lartë” iranian – por jo me udhëheqësin suprem Mojtaba Khamenei – dhe se në to janë arritur “pika të rëndësishme të marrëveshjes”.

Zyrtarët dhe mediat shtetërore të lidhura me Iranin e kanë mohuar menjëherë se po zhvillohen bisedime të tilla.

Agjencitë e lajmeve Tasnim dhe Fars, të dyja të afërta me Korpusin e Gardës Revolucionare Islamike (IRGC), cituan burime që thanë se “nuk po zhvillohen bisedime”, as drejtpërdrejt dhe as tërthorazi, midis Teheranit dhe Uashingtonit.

Ndërkohë, Omani po “punon shumë për të vendosur masa të sigurta kalimi për Ngushticën e Hormuzit”, tha ministri i Jashtëm i vendit, Badr al-Busaidi, në rrjetet sociale pak para se Trump të deklaronte se Shtetet e Bashkuara kishin zhvilluar “bisedime frytdhënëse” për t’i dhënë fund luftës.

“Bazuar në tonin dhe përmbajtjen e këtyre bisedimeve të thella, të detajuara dhe frytdhënëse, të cilat do të vazhdojnë gjatë gjithë javës, kam udhëzuar Departamentin e Luftës që ta shtyjë çdo sulm ushtarak ndaj centraleve dhe infrastrukturës energjetike iraniane për një periudhë pesëditore,” tha Trump në një postim në rrjetet sociale më 23 mars, duke shtuar se pezullimi varet nga suksesi i bisedimeve.

Nuk ka pasur njoftime paraprake se po zhvilloheshin bisedime midis Uashingtonit dhe Teheranit.

Ndërkohë, Izraeli – i cili tha menjëherë pas njoftimit të Trumpit se po kryente sulme ajrore në Iranin qendror – nuk ka komentuar publikisht.

“Ne kemi eliminuar fazën e parë të udhëheqjes, fazën e dytë dhe në masë të madhe fazën e tretë. Por, po merremi me njeriun që unë besoj se është më i respektuari dhe lideri”, tha Trump për gazetarët.

“Ne nuk duam pasurim [të uraniumit], por gjithashtu duam uranium të pasuruar”, shtoi ai.

Afati për Ngushticën e Hormuzit

Të shtunën, Trump e kishte paralajmëruar Iranin se centralet e tij elektrike do të shkatërroheshin nëse Teherani nuk do ta “hapte plotësisht” Ngushticën e Hormuzit për të gjithë transportin detar brenda 48 orësh.

Trump e caktoi afatin deri të hënën rreth mesnatës.

Paralajmërimi i tij nxiti kërcënime për kundërpërgjigje nga Garda Revolucionare e Iranit, e cila në një deklaratë të hënën tha se do t’i sulmonte centralet elektrike të Izraelit dhe ato që i furnizojnë bazat amerikane në rajonin e Gjirit, nëse Trump do ta zbatonte kërcënimin e tij për ta “shkatërruar plotësisht” rrjetin energjetik të Iranit.

Ndërsa, Mohammad Baqer Qalibaf, kryetar i Parlamentit iranian, paralajmëroi se “menjëherë pas shënjestrimit të centraleve elektrike dhe infrastrukturës në vendin tonë, infrastruktura jetike, si dhe infrastruktura energjetike dhe e naftës në të gjithë rajonin, do të konsiderohen objektiva legjitime dhe do të shkatërrohen në mënyrë përherë”.

Më shumë se 3.000 njerëz janë vrarë në luftën që SHBA-ja dhe Izraeli e nisën më 28 shkurt, sipas grupit iranian për të drejtat e njeriut, HRANA.

Lufta ka tronditur tregjet, ka rritur kostot e karburantit, ka nxitur frikë për inflacion global dhe ka lëkundur aleancën perëndimore të pasluftës.

Kërcënimi për sulme ndaj rrjeteve elektrike në Gjirin Persik ka rritur frikën për ndërprerje të mëdha në procesin e shkripëzimit të ujit për pije dhe ka trazuar edhe më shumë tregjet e naftës.

| Radio Evropa e Lirë

Botë

Izraeli thotë se ka vrarë zyrtarë të lartë të inteligjencës iraniane

Published

1 month ago

02 March, 2026

Redaksia

Forcat Mbrojtëse të Izraelit (IDF) thanë se kanë vrarë zëvendësministrin e inteligjencës së Iranit për çështjet e Izraelit, Sayed Yahya Hamidi.

Jalal Pour Hossein, udhëheqës i divizionit të spiunazhit në Ministrinë e Inteligjencës, u vra gjithashtu, së bashku me “zyrtarë të tjerë të regjimit”, thuhet në njoftim.

Detaje se si, kur ose ku u vranë nuk jepen.

Por, shtohet se selia e Ministrisë së Inteligjencës në Teheran u godit “pak kohë më parë”.

| Radio Evropa e Lirë