Ferizaj

Fëmijët kërkojnë kushte më të mira për mësim

Published

7 years ago

20 November, 2018

Dita e Konventës Ndërkombëtare për të Drejtat e Fëmijëve, u shënua edhe në Ferizaj. Për nder të kësaj dite në sallën e Kuvendit të Ferizajt u organizua një takim mes Asamblesë Komunale të Fëmijëve me kryesuesen e Kuvendit Komunal dhe drejtorin e Arsimit. Në këtë takim, fëmijët parashtruan kërkesat dhe problemet që ata i preokupojnë.

“Jo vetëm në shkollën tonë, por në shumicën e shkollave ju po kërkoni që të kemi suksese ne, por si mund të prisni suksese nga ne kur në shkollën tonë nuk ka as kabinete e as salla të sportit”, tha nja nxënëse.

“Jemi duke u munduar që të bëjmë disa përparime në këtë drejtim, por kemi shkolla që nuk kanë hapësirë të mjaftueshme, por po besoj se gradualisht ne kemi filluar të bëjmë disa ndryshime në këtë drejtim, kemi filluar ndërtimin e dy sallave pastaj kemi të planifikuar edhe vitin e ardhshëm ndërtimin e sallave në mënyrë që sukseset të jenë më të mëdha, por në këto kushte që i kemi duhet të mundohemi t’ia dalim bashkërisht”, tha drejtori i arsimit Afrim Llabjani.

“Kisha pasur dëshirë që në çdo shkollë me pas psikolog që të na këshillojnë neve të paktën një herë në javë, po ashtu të punohet sa më shumë me nxënës të cilët janë me aftësi të kufizuar dhe të jetë një mësues i posaçëm për ta”, tha një nxënëse tjetër.

“Është e vërtetë që mungesa e psikologëve dhe pedagogëve nëpër shkolla është e madhe, ne fatkeqësisht nuk kemi nëpër shkolla të fshatrave, është çështje imediate, është çështje që duhet të ngritet më tepër dhe të bëhen psikolog, por ne jemi në një fazë që jemi duke i diskutuar këto çështje, por nganjëherë jemi të kufizuar nga linjat buxhetore të cilat nuk mund t’i rrisim në mënyrë që të kemi psikolog nëpër shkolla”, tha Llabjani.

“Disa njësi mësimore ne nuk i kemi në libra, neve na duhet me kliku nëpër shumë ëeb-faqe, a ka mundësi që me na i sjellë të gjitha njësitë mësimore në libra e jo me kërku ne në interent”, tha një tjetër nxënës.

“Është një problem që është duke i përcjell shkollat në vazhdimësi, por që nuk është në domenin tonë, sepse politikat e arsimit i bën Ministria e Arsimit, fatkeqësisht kemi një shpërputhje të plan-programeve mësimore apo zbatimi i kurrikulës së re nuk është në harmoni me tekstet që i keni, por ne kemi marrë informacione nga Ministria e Arsimit se vitin e ardhshëm librat do të jenë në përputhje me plan-programin mësimor”, u përgjigj Llabjani.

“Në shkollën tonë ka probleme edhe me libra, që 3 vite gjuha angleze nuk ka ardhë në shkollën tonë, disa nxënës i kanë blerë, por nuk kanë pasur mundësi me i ble të gjithë”, tha një nxënëse.

“Librat na vijnë nga Ministria e Arsimit, fatkeqësisht kemi pasur telashe me librat e gjuhës angleze pasi librat që kanë qenë në përdorim janë kontestuar nga mësimdhënësit e gjuhës angleze pasi nuk janë në harmoni me plan-programin shkollor dhe kështu që Ministria ka pru libra por jo mjaftueshëm dhe ne kemi pasur telashe edhe në shkollat e tjera, nuk mund të them që nuk do të ketë, ne kemi bërë kërkesa dhe nëse na vijnë librat ne padyshim që do t’i shpërndajmë tek ju”, theksoi Llabjani.

Ndërsa, kryesuesja e Asamblesë Komunale të Fëmijëve Azra Maksuti, shfaqi shpresën që kërkesat e fëmijëve do të merren parasysh.

“Shteti jonë në përgjithësi e dimë se ka të meta në realizimin e të drejtave tona, mirëpo ne duhet të punojmë të gjithë së bashku prandaj e kemi thirrë këtë takim dhe ne këtu kemi mundësi t’i shprehim brengat tona që ato të merren parasysh dhe shpresoj që të punojnë për një të ardhme më të mirë për ne”, tha Arza Maksuti.

Në këtë debat, kryesuesja e Kuvendit Komunal Kristina Gashi-Bytyqi, tha se komuna e Ferizajt ka bërë hapa në respektimin e Konventës për të Drejtat e Fëmijëve, duke miratuar rregulloren e cila ndikon në përmirësimin e jetës së fëmijëve dhe u mundëson atyre që të jenë pjesë e proceseve vendimmarrëse.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

2 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

2 weeks ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”