Ferizaj

LDK akuzon pushtetin për shantazhe

Published

7 years ago

23 November, 2018

Anëtari i Kuvendit Komunal nga radhët e LDK-së në Ferizaj, Burim Karameta, ftoi gazetarët para komunës për t’i shprehur publikisht disa akuza në adresë të pushtetarëve të këtushëm. Ky opozitar ferizajas po thotë se ky pushtet gjatë kësaj periudhe të qeverisjes, ka dëshmuar se është qeveri e shantazheve, shpifjeve dhe linçimeve. Sipas Karametës, ditëve të fundit ka pasur largime nga puna të punonjësve shëndetësor, si dhe parregullsi të shumta që lidhen direkt me të drejtat e punëtorëve të këtij sektori.

“Është bërë në mënyrë shantazhuese të punëtorëve të ndryshëm në baza diskriminuese ku me vete posedoj disa nga deklaratat e këtyre punëtorëve që kanë dhënë dorëheqje nga pozita duke mos pranuar ndërrimin e vendit të punës për shkak të shantazhimit. Po ashtu, kemi edhe një tjetër deklaratë të punëtores tjetër shëndetësore e cila është detyruar të jap dy deklarata të ndryshme për shkak të moskomunikimit nga punëdhënësi dhe gjithashtu edhe nga shantazhimet. Gjithashtu, keni parë tashmë edhe në media që punëtori i larguar për mitmarrje është shpallur i pafajshëm, e që pushtetarët e kanë linçuar të njëjtin. Po ashtu, Inspektorati i Punës para dy ditësh ka shpallur të padrejtë urdhërin apo vendimin e kësaj qeverie që punëtorët shëndetësor të punojnë në orët e natës pa ndonjë kriter, por vetëm për shkak të urdhërit qeveritar duke shkelur çdo të drejtë të këtyre punëtorëve dhe ligjet në fuqi”, tha Karameta.

Gjatë kësaj paraqitje publike, anëtari i LDK-së Burim Karameta, ka kritikuar drejtues të shëndetësisë në Ferizaj se nuk kanë punuar asgjë në sigurimin e aparaturave të reja, ndërsa po e harxhojnë paranë publike duke i riparuar veturat zyrtare të cilat po dëmtohen qëllimisht.

“Deri më tani asnjë investim në aparaturë apo edhe asnjë aparaturë e vetme nuk është blerë për institucionet e shëndetësisë së këtushme. Gjithashtu, njeriu që ka qenë punëtori më i zellshëm i autoparkut pa të drejtë është suspenduar nga puna, ku presim që pas vendimit të organeve të drejtësisë ai t’i kthehet punës. Po ashtu, është e padrejtë prishja e veturave që kanë qenë në shërbim të qytetarëve dhe pacientëve, janë prishur dhe po shkatërrohen dhe po tentohen të riparohen nga paraja publike edhe pse sipas informacioneve të sigurta ato janë dëmtuar me faj të drejtuesve komunal të shëndetësisë”, tha Burim Karameta.

Në këtë konferencë me gazetarë, Karameta ka vlerësuar se qeveria aktuale po i ngjan një qeverie autoritare e diskriminuese mbi baza partiake.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

2 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

2 weeks ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”