Kosovë

Politikanët e korruptuar shkak për mosliberalizimin e vizave, thonë opinionistët

Published

8 years ago

05 December, 2018

Çështja e vizave sikur i dha një zhgënjim përmbyllës këtij viti. Kështu po vlerësojnë aktivistë të shoqërisë civile në Ferizaj, të cilët po thonë se ndërkombëtarët duke dashur t’i dënojnë politikanët e korruptuar, po e dënojnë popullin e Kosovës me mosliberalizim të vizave. Opinionisti Dimal Basha, thotë se ky proces i nisur vite më parë, asnjëherë nuk është marrë seriozisht as nga vendorët e as nga të huajt, ndërkaq qytetarët janë ata që po i vuajnë pasojat.

“Arsyeja pse ne jemi të izoluar është për shkak të politikanëve të pandershëm. Dënimi është kundër politikës e politikanët janë njerëzit që ne vet i kemi votuar. Derisa nuk ndryshon kasta politike që po votohet prej qytetarëve prej vitit në vit atëherë nuk duhet të presim ndryshe, janë të njëjtit njerëz që para 10 vitesh kanë premtuar viza dhe ne vazhdojmë të presim akoma nga ata. Ajshtajni ka thënë se budallakia më e madhe është kur e bënë të njëjtën gjë dhe pret rezultate të ndryshme, prandaj edhe për ne është njëjtë, s’di pse duhet të presim ndryshime duke e votuar të njëjtën klasë politike”, tha Dimal Basha.

Se politikanët e vendit janë fajtorë që Kosova vazhdon të mbetet e izoluar, e thotë edhe opinionisti tjetër ferizajas Shkëlzen Marveci. Ai vlerëson se kjo padrejtësi që po i bëhet Kosovës nga Evropa, po shkakton vuajtje vetëm tek qytetarët e këtij vendi dhe aspak tek klasa politike.

“Një zhgënjim me të vërtetë i madh për shkak që është një padrejtësi që po u bëhet qytetarëve të Kosovës përkundër faktit që vet Komisioni Evropian deklaroi apo aprovoi se çdo gjë ka shkuar në rregull në lidhje me kriteret e liberalizimit të vizave, edhe këtu tash po shihet që ka një presion ndaj politikanëve tanë, mirëpo nëse ka një presion të tillë për arsye të ndryshme mendoj se është e paarsyeshme të bëhet në kurrizin e qytetarëve të Kosovës. Nëse ka presion atë duhet ta adresojnë tek vet klasa politike, sepse nga mosliberalizimi i vizave janë dëmtuar kryekëput qytetarët, janë të rinjtë në rend të parë, janë artistët të cilët nuk mund të veprojnë sikur edhe ata të vendeve të tjera”, u shpreh Marevci.

Sipas këtyre opinionistëve, një tjetër arsye pse vendi vazhdon të ballafaqohet me këto dështime janë vet qytetarët naiv të Kosovës, të cilët asnjëherë nuk e ngritin zërin edhe atëherë kur duhet dhe u takon.

“S’ka qytetari aktive, është një amnezi kolektive që qytetarët merren me tema shumë të mëdha dhe tema koti, ndërsa nuk merren me bërllokun para dere, me probleme që na shqetësojnë çdo ditë. Do të thotë, derisa ne nuk mësohemi për të reaguar çdo ditë, për të kërkuar llogari tek drejtori, kryetari e deri tek ministri, kjo i bjen që kemi deficit të memories dhe të habit fakti se si kjo shoqëri vazhdon të jetë e qetë pas gjithë kësaj katrahure dhe të njëjtën e bënë Evropa derisa ti nuk reagon kundër politikanëve të korruptuar pse Evropa duhet të mërizitet për ty kur ne vet nuk mërzitemi për problemet tona, mendoj se ky është konstatimi që po e vuajmë të gjithë”, tha Basha.

“Është problem mentaliteti, në Kosovë mendoj se është duke mbretëruar një mentalitet jo në nivel të duhur dhe për këtë janë shumë faktorë që po ndikojnë. Në rend të parë duhet të ngritet vetëdija e qytetarëve, e për t’u ngritur vetëdija duhet të ketë një nivel arsimor tjetër dhe duhet të ketë njerëz që gjykojnë tamam sikur qytetarët e shteteve të tjera. Kjo është temë e gjerë, por gjithsesi që duhet të ngritet niveli qytetarë për të reaguar për këto problematika“, u shpreh Marevci.

Gjatë vizitës që pati së fundmi në Kosovë, komisioneri për Zgjerim i Bashkimit Evropian, Johannes Hahn, ka dhënë shenja që kosovarët nuk do të mund të lëvizin pa viza në zonën Schengen para vitit 2020, duke kërkuar edhe pak durim nga kosovarët për këtë çështje.

Kosovë

Mblidhen deputetët për seancën konstituive të Kuvendit të Kosovës

Published

23 hours ago

06 August, 2026

Redaksia

Deputetët që fituan mandatin përfaqësues në zgjedhjet e qershorit, mblidhen sot nga ora 10:00, për të nisur seancën konstituive të Kuvendit të Kosovës.

Në rend dite janë formimi komisionit për verifikimin e mandateve, betimi i deputetëve si dhe zgjedhja e kryetarit dhe e nënkryetarëve të Kuvendit.

Me konstituimin e Kuvendit nis edhe afati prej 60 ditësh për zgjedhjen e presidentit kurse afati prej 15 ditëve për votimin e qeverisë fillon vetëm pasi ushtruesja e detyrës së presidentit ta mandatojë kandidatin e propozuar nga shumica parlamentare.

Kjo është hera e dytë që të zgjedhurit e popullit provojnë të formojnë institucione të qëndrueshme, pas zgjedhjeve të njëpasnjëshme parlamentare të shkaktuara nga mungesa e konsensusit politik për zgjedhjen e presidentit të vendit.

Ferizaj

Qytetarëve u vijnë mesazhe mashtruese – Policia apelon për kujdes

Published

2 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.

Kosovë

LDK kërkon postin e presidentit

Published

2 days ago

05 August, 2026

Redaksia

Deputetë të zgjedhur të Lidhjes Demokratike të Kosovës kanë shprehur qëndrimin se kërkesa e partisë së tyre është që të kenë postin e presidentit.

Hykmete Bajrami dhe Jehona Lushaku Sadriu artikuluan këtë kërkesë, një ditë pasi kreu i LDK-së, Lumir Abdixhiku, dhe ai i Lëvizjes Vetëvendosje, Albin Kurti, nuk arritën ndonjë marrëveshje për krijimin e institucioneve të reja.

Lushaku Sadriu tha se LDK gjithmonë ka kërkuar që institucionet e vendit të sigurojnë një balancë mes fuqive politike.

“Pra edhe në këtë kuptim, domethënë kërkesa jonë është që presidenti t’i takojë LDK-së, në kuptimin që të diskutojmë së bashku për gjithë pushtetin edhe pastaj të bëhet ndarja në mënyrë proporcionale. Ky ka qenë qëndrimi”, tha Lushaku-Sadriu për mediat para mbledhjes së Grupit Parlamentar të LDK-së.

Ndërkaq Bajrami tha për mediat se nuk i di detajet e takimit të djeshëm, por iu duk se Abdixhiku po insiston “me të drejtë” po insiston që partia e tij të ketë postin e presidentit.

“Mendoj se pozita e presidentit do të siguronte një balancim të pushteteve në Kosovë dhe do të ishte një siguresë si për Kosovën, ashtu edhe për Lidhjen Demokratike të Kosovës”, tha Bajrami.

Sipas saj, ofrimi i posteve ministrore nga LVV-ja nuk ofron garanci.

Pas takimit të tyre, që zgjati mbi tri orë, Kurti dhe Abdixhiku shprehën qëndrime të ndryshme sa i përket presidentit – moskonsensusi për të cilin muaj më parë mes partive nxiti zgjedhjet e 7 qershorit.

Kurti insistoi se Kosovës i duhet një president konsensual, jopartiak, ndërkaq Abdixhiku tha se president konsensual është kushdo që i merr 80 vota të deputetëve.

Në zgjedhjet e qershorit, LDK-ja garoi me Vjosa Osmanin edhe për një mandat në krye të shtetit.

“President konsensual është secili president që i merr 80 vota. LDK duhet të ndihet e përfaqësuar për t’i pasur votat e veta”, tha Abdixhiku mbrëmjen e 4 gushtit.

Osmani, së bashku me nënkryetarin e LDK-së, Lutfi Haziri, ishin të pranishëm po ashtu në takimin me Kurtin.

Teksa LVV-ja dhe LDK-ja kanë paralajmëruar vazhdimin e bisedimeve, më 6 gusht pritet të mbahet seanca konstituive e legjislaturës së njëmbëdhjetë. Me konstituimin e organit ligjvënës, nis rrjedhja e afateve për formimin e Qeverisë, por edhe të presidentit. Deputetët më pas do të ketë kohë 60 ditë për të zgjedhur një president, në të kundërtën vendi do të shkojë në zgjedhje – të katërtat që nga shkurti i vitit 2025.

LVV-ja ka fituar 58 mandate dhe së bashku me partitë e komuniteteve joshumicë ka votat e mjaftueshme për të konstituuar Kuvendin dhe krijuar Qeverinë e re, pasi për to kërkohen 61 vota në Kuvendin prej 120 deputetësh.

Megjithatë, për zgjedhjen e presidentit nevojitet prania e 80 deputetëve në Kuvendin me 120 vende që votimi për presidentin e Kosovës të jetë i vlefshëm.

Me një marrëveshje të mundshme me LDK-në, e cila i fitoi 18 vende, atëherë do të arriheshin të paktën 81 vota, mjaftueshëm për votimin e presidentit të ri, nëse të paktën 80 prej tyre do të qëndronin në sallë.

| Radio Evropa e Lirë