Ferizaj

Diskutohet strategjia komunale për personat me aftësi të kufizuara

Published

7 years ago

10 December, 2018

Në sallën e Kuvendit Komunal të Ferizajt, është prezantuar drafti i strategjisë komunale për personat me aftësi të kufizuara dhe plani i veprimit, përmes së cilëve synohet realizimi i të drejtave të kësaj kategorie të shoqërisë.

Përfaqësues të shoqatës “Handikos” në Ferizaj, thanë se ky draft dokument përmban disa objektiva strategjike, të cilat nëse do të zbatohen, do të ndikojnë në përmirësimin e jetës së këtyre personave.

“Objektiva e parë strategjike ka të bëjë me arsim dhe zhvillim profesional, rregullimi i qasjes fizike në shkollat të cilat frekuentojnë personat me aftësi të kufizuar, rritja e shërbimeve mbështetëse, do të thotë, asistentë në institucionet arsimore, objektiva e dytë ka të bëjë me shëndetësinë dhe mirëqenien sociale, është zgjerimi dhe përmirësimi në shërbimet mjekësore rehabilituese dhe sociale për personat me aftësi të kufizuar, objektiva e tretë ka të bëjë me aftësim profesional dhe punësim, krijimi i kushteve dhe mundësive të barabarta për punësimin e personave me aftësi të kufizuara, ndarja e granteve për vetëpunësim të personave me aftësi të kufizuar dhe ofrimi i punës praktike për personat me aftësi të kufizuar”, tha Gresa Behluli nga “Handikos”.

Në këtë diskutim publik që ishte thirrur për të marrë rekomandimet e qytetarëve, vërejtje dhe sugjerime dhanë vetëm dy persona, njëri nga ta zyrtar komunal.

“Në këtë draft shkruan se llogaritet se në Ferizaj janë diku 1800 persona me aftësi të kufizuar, mendoj se këto përllogaritje nuk janë të sakta, pasi në komunën e Ferizajt besoj se numri i tyre është mbi 25 mijë banorë me aftësi të kufizuar të të gjitha kategorive”, tha një pjesëmarrës në diskutim.

“Përpos strategjive që janë të shumta në të gjithë vendin, ndoshta është e rëndësishme të bëhet edhe një listë prioritare apo një listë e aktiviteteve vjetore që duhet të shënohen nga komiteti i personave me nevoja veçanta në mënyrë që të ketë efekt direkt zbatimi i kësaj strategjie dhe mos të mbetet vetëm një dokument në letër”, tha Albion Sherifi.

Strategjia komunale për personat më aftësi të kufizuara dhe plani i veprimit, do t’i dërgohen Kuvendit Komunal të Ferizajt për miratim në seancën e radhës.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim