Ferizaj

Përkujtohen dëshmorët Astrit Bytyqi, Besim Qarri dhe Hysni Kajtazi

Published

7 years ago

14 December, 2018

Në 20 vjetorin e rënies, në Kompleksin e Varrezave të Dëshmorëve në Ferizaj, janë bërë homazhe në përkujtim të dëshmorëve Astrit Bytyqi, Besim Qarri dhe Hysni Kajtazi.

Kryetari i Shoqatës së Familjeve të Dëshmorëve në Ferizaj, Gafurr Bytyqi, i cili është edhe babai i dëshmorit Astrit Bytyqi, tha se këtë përvjetor më të veçantë e bën formimi i Ushtrisë së Kosovës.

“Sot jam më i emocionuar, pasi u bë Ushtria jonë edhe pse për mua gjithmonë ka qenë ushtri, por sot e kemi edhe në letër dhe tani ka kush e mbron Kosovën, një pjesë e amanetit të dëshmorëve po përmbushet, ndërsa pjesa kruciale ka mbetur të përmbushet me kohë duke u angazhuar dhe duke punuar për vendin”, u shpreh Bytyqi.

“Edhe pas 20 viteve jemi krenarë si familje, këtë ditë po jemi edhe më krenarë pasi u bë Ushtria e Kosovës, na vjen mirë që në këtë përvjetor po shoh qytetarë e miq që kanë ardhur të na nderojnë”, tha Agron Kajtazi, vëllai i dëshmorit Hysni Kajtazi.

Kurse, kryetari i Ferizajt Agim Aliu, tha se sakrifica dhe ëndrra e kahmotshme e popullit tonë u realizua sot me formimin e Ushtrisë së Kosovës.

“Është ditë e përzgjedhur, është ditë që tregon përpjekjet, që tregon sakrificat dhe përmbledh histori të gjata flijimesh dhe është ditë ku më në fund ai flijim, ajo ëndërr e shumë të rënëve për liri qoftë me pushkë në dorë, qoftë afër saj sublimohet në atë që ishte ëndërr, pra në Ushtrinë e Kosovës. Me këtë rast, ne përulemi para heronjve dhe dëshmorëve tanë, para invalidëve, veteranëve, martirëve dhe gjithë atyre që kanë sakrifikuar me dekada e shekuj që ne të vijmë në këtë ditë, po ashtu në këtë ditë ne falënderojmë edhe miqtë tanë të përjetshëm në këtë rast SHBA-në, popullin amerikan dhe shtetet e Bashkimit Evropian që treguan se janë me ne”, tha Aliu.

Dëshmorët ferizajas Astrit Bytyqi, Besim Qarri dhe Hysni Kajtazi, ranë në betejën e 14 dhjetorit të vitit 1998, në kufirin shqiptaro-shqiptar, në vendin e quajtur Likenet e Hasit, ku ishin pjesë e formacionit luftarak të UÇK-së, në krye me komandantin Mujë Krasniqi.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

2 weeks ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim