Ferizaj

Miratohet Rregullorja për Taksa, Tarifa dhe Gjoba Komunale

Published

8 years ago

27 December, 2018

Rregullorja për Taksa, Tarifa dhe Gjoba Komunale, edhe sot ishte pikë e rendit të ditës së Kuvendit Komunal. Për këtë rregullore që është diskutuar disa herë nëpër mbledhjet e këtij Kuvendi, sërish u shfaqën pakënaqësi. Ekzekutivi pohoi se në këtë dokument janë futur të gjitha propozimet e partive opozitare, gjë e cila u mohua nga këta të fundit. Megjithë pakënaqësitë e shprehura, në fund ajo u miratua me shumicë votash.

“Nuk po shoh ndonjë ndryshim, përpos nja dy-tri pikave, kam propozu që zyra e avokatëve dhe auditorëve mos me pagu taksë, këmbimoret mos me pas taksë komunale, për fëmijët e familjeve të dëshmorëve për t’u regjistruar në çerdhet publike të hiqen krejt dhe asnjë nuk është inkorporuar”, tha Shkëlzen Selmani nga LDK.

“Krejt çka kam pa që ka ndryshu janë ato pika të cilat i kam propozu unë dhe njëkohësisht që i ka pas edhe shefi i grupit të PDK-së, Arian Imeri, konkretisht është ndryshu për bankomatët e zonave dhe propozimet e mia asnjë nuk janë përfillur, madje i kam dërguar edhe me shkrim“, tha Balton Dërguti nga LDK.

“Balton nuk është e vërtetë se i kemi inkorporuar vetëm të Arianit në rregullore, për shkak se ato të cilat jeni pajtuar të gjithë i kemi inkorporuar, por nuk do të thotë se të gjitha janë ndryshuar përsëri, me ato të cilat jemi pajtuar ne i kemi inkorporuar”, tha Drejtoresha e Financave, Sebahate Ajeti.

Në këtë seancë, debat nxiti edhe propozim-vendimi për vënie në diskutim publik të draft planit të veprimit të Zyrës për Informim. LDK-ja, kritikoi pushtetin për jotransparencë, ndërsa udhëheqës të qeverisë lokale u lavdëruan se asnjëri pushtet paraprak nuk ka qenë më transparent se ky që është tani.

“Nuk mundeni me bë faqen e komunës si faqe të PDK-së, hyni aty dhe shihni fotot e diskutimeve në KK të Ferizajt dhe në foto është vetëm Arian Imeri, ka raste kur nuk është Ariani, por se atëherë prezent ka qenë Agim Aliu në Kuvend”, tha Balton Dërguti nga LDK.

“Nëse ne flasim për transaprencë atëherë le t’i publikon Luli të gjitha lejet e ndërtimit që i ka dhënë”, tha Muharrem Svarqa nga LDK.

“Nëse dikush ka një memorie institucionale besoj që e kam unë për shkak të së kaluarës, vendimet të cilat sot publikohen asnjëherë nuk janë publikuar më herët”, tha nënkryetari i komunës Naim Ferati.

“E ke të vështirë me mbrojt shefin aktual para ish-shefit tënd, por realitet është që fjala transparencë është minimum që mund të thuhet për këtë qeverisje”, tha Gëzim Kokollari nga LDK.

“Fatkeqësisht po bëhet debat LDK-PDK, LDK po pretendon se e di krejt çka po bëhet, por shtrohet pyetja se si po i di, prandaj lidhet me barcoletën ku po e di që po i marrë nga dy lugë, tash po jam t’u i marrë vetë, edhe këta po e dinë se çka janë t’u ba se u kanë ba vet”, tha Xhavit Zariqi nga AAK.

Në mbledhjen e sotme u miratua edhe Strategjia Komunale për Personat me Aftësi të Kufizuara në Komunën e Ferizajt si dhe Plani i Veprimit. Asamblistët vendosën për Mbrojtjen e Vlerës së Natyrës: Bifurkacioni i Lumit Nerodime në Ferizaj si Monument i Natyrës.

Ferizaj

Bëhet i ditur identiteti i viktimave të aksidentit tragjik në Gjermani

Published

4 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

4 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

6 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.