Ferizaj

Paraqitet puna një vjeçare e Kuvendit Komunal

Published

8 years ago

28 December, 2018

Kryesuesja e Kuvendit Komunal të Ferizajt, Kristina Gashi-Bytyqi, në një konferencë të thirrur për media, pasqyroi punën një vjeçare të Kuvendit Komunal, ku tha se gjatë këtij viti janë mbajtur 11 seanca dhe janë aprovuar 109 vendime të ndryshme. Arritjen më të madhe në historinë e Ferizajt, ajo e konsideroi emërimin e saj në këtë pozitë, duke u bërë kështu femra e parë që udhëheq me legjislativin.

“Vendimet e Kuvendit të Komunës së Ferizajt të vitit 2018 do të mbahen mend nga gjenerata në gjeneratë si vendime shumë të rëndësishme dhe jetike për qytetarët tanë, si vendimi për Spitalin regjional, vendimi për varrezat e qytetit të Ferizajt, vendimi për themelimin e Muzeut të Kujtesës, ku më në fund familjet e dëshmorëve, invalidëve dhe veteranët do të kenë mundësi t’i ruajnë kujtimet dhe të prezantojnë vlerat e luftës duke iu ofruar qytetarëve të njohin të kaluarën e lavdishme të luftës së fundit të popullit tonë, të Ushtrisë Çlirimtare të Kosovës. Kuvendi i Komunës së Ferizajt për herë të parë ka filluar së zbatuari dispozitat ligjore të ligjit për vetëqeverisje lokale sa i përket planifikimit të punës së Kuvendit duke miratuar planin e punës së Kuvendit të Komunës për vitin 2018, konsideroj që kemi arritur ta përmbushim me sukses mbi 90% të planit”, tha Gashi-Bytyqi.

Gashi-Bytyqi, tha se të gjitha rregulloret e miratuara në Kuvend janë hartuar në bashkëpunim me qytetarët të cilët kanë marrë pjesë nëpër tubimet publike.

“Aktet dhe rregulloret komunale janë formësuar në bazë të kërkesave të qytetarëve të komunës sonë, para se të dalin në Kuvend për t’u miratuar kemi mbajtur diskutime publike me qytetarët ku të gjitha kërkesat, vërejtjet dhe propozimet e tyre janë inkorporuar. Të gjitha këto akte dhe rregullore proceduralisht kanë kaluar edhe përmes komisionit për hartimin e akteve juridike dhe konsultave me përfaqësuesit e të gjitha partive politike të përfaqësuara në KK. Për herë të parë Kuvendi i Komunës së Ferizajt, ka diskutuar për peticione të qytetarëve, ku besoj se është një fillim dhe dëshmi e mirë në rritjen e transparencës dhe besueshmërisë ndaj institucionit më të lartë legjeslativ. Ju kemi përmbajtur të gjitha rekomandimeve të MAPL dhe ministrive të linjave në lidhje me shqyrtimin dhe rishqyrtimin e vendimeve, jo vetëm të kësaj legjislature, por të gjitha vendimet e legjislaturave të tjera të cilat nuk janë rishqyrtuar asnjëherë”, u shpreh ajo.

Sa i përket vendimeve të nivelit qendor që po bien në duart e asamblistëve para se të shkojnë në adresë të saj dhe të kryetarit Aliu, kryesuesja Gashi-Bytyqi e pranoi se një gjë e tillë ka ndodhur edhe kur PDK-ja ishte në opozitë.

Ferizaj

Bëhet i ditur identiteti i viktimave të aksidentit tragjik në Gjermani

Published

4 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

4 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

6 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.