Ferizaj

Svarqa e quan Aliun kryetar të sfilatave

Published

8 years ago

28 December, 2018

Lidhja Demokratike e Kosovës në Ferizaj, ka akuzuar qeverinë lokale të udhëhequr nga Agim Aliu për keqqeverisje gjatë këtij viti që po lëmë pas. Ish-kryetari i kësaj komune, aktualisht kryetar i LDK-së Muharrem Svarqa, Aliun e quajti kryetar pa program qeverisës, i cili, sipas tij, me krejt çka mund të mburret është promovimi nëpër fotografi.

“Në emër të kodit të ndërtimit të nënkalimit për vetura me numër 15771, ku janë ndarë 3 milionë e 5 mijë euro, kryetari Aliu kokë më vete me vendime ad hoc, ashtu siç është karakterizuar këtë vit, ka marrë vendim për lidhjen e kontratës për ndërtimin e nënkalimit që ai e quan “Bashkim të Qytetit”, një kontratë për shumën 4 milionë e 3 miijë euro edhe pse këto mjete kanë qenë të planifikuara deri në vitin 2021. Ne këtë projekt e konsiderojmë skandaloz, jo vetëm se është realizuar pa ndonjë paralajmërim, pa analiza paraprake të studimit të fizibiliteti, studimit gjeomekanik të tokës, por edhe pa projekt detal. Një kryetar dembel i cili nuk mund të krenohet me rezultate për këtë vit, me përjashtim që mund të krenohet për lloje të ndryshme të propagandës dhe të sfilatave me fotografi të shtrenjta të cilat i paguajmë të gjithë ne”, tha Svarqa.

Svarqa ka theksuar se viti qeverisës 2018 karakterizohet me vendime të paligjshme, me hakmarrje ndaj kundërshtarëve politik, si dhe me shpërblime për mbështetësit e tij.

“Një qeveri pa program pune, ka qenë edhe përpjekja për hakmarrje ndaj kundërshtarëve politik duke filluar nga komuna, nga stafi i përgjithshëm administrativ, QKMF-të dhe në kompanitë publike dhe këto kanë sjellur një gjendje alarmante në këto kompani të cilat sot janë para falimentimit. Akuzat tjera që ka pas qeveria komunale pas marrjes së mandatit kanë qenë ankesat e vazhdueshme për numrin e madh të të punësuarve me kontrata të veçanta të cilat janë ndërprerë me vendim të tij për t’u zëvendësuar me dhjetëfishin e atyre që kanë ekzistuar. Ankesa të tjera kanë qenë edhe me projektet që kanë qenë 2-3 vjeçare të cilat janë trajtuar borxhe nga qeveria edhe pse s’kanë mundur të argumentohen. Një skandal tjetër është se ne kemi lënë kontrata 3-4 vjeçare, ndërsa këta këtë vit kanë lidhur kontrata pa qenë të planifikuara në buxhetin e qeverisë dhe atë kontrata 6 vjeçare”, tha Svarqa.

Në konferencën e thirrur për media, ndër të tjera LDK përmendi edhe vendimet e ministrive përkatëse, të rekomanduara për anulim në Kuvendin e Komunës, të cilat, sipas kësaj partie, jo vetëm që nuk anulohen, por mbivotohen dhe festohen me duartrokitje dhe kjo tregon se sa është i interesuar koalicioni qeverisës dhe kryetari Aliu për zbatimin e ligjit.

Ferizaj

Bëhet i ditur identiteti i viktimave të aksidentit tragjik në Gjermani

Published

4 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

4 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

6 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.