Ka dështuar edhe përpjekja e 52-të e deputetëve për konstituim të Kuvendit të Kosovës pasi në vazhdimin e sotëm, për propozimin për krijimin e komisionit për votim të fshehë votuan 54 deputetë derisa në seancë ishin të pranishëm 117 deputetë.

Kryesuesi i seancës, Avni Dehari tha se vazhdimi i radhës, do të mbahet të shtunën, më 26 korrik, me fillim nga ora 14:00.

Seanca e radhës do të mbahet vetëm një ditë para se të hyjë në fuqi masa e përkohshme e Gjykatës Kushtetuese për të mos lejuar asnjë veprim nga deputetët për konstituim të Kuvendit nga 27 korriku deri më 8 gusht.

Deputetja e Lëvizjes Vetëvendosje e propozuar për kryeparlamentare, Albulena Haxhiu,  vlerësoi si të natyrshme që Gjykata Kushtetuese ka marrë vendim për masë të përkohshme, marrë parasysh situatën aktuale.

Ajo nuk përjashtoi mbajtjen e ndonjë seance tjetër sot apo nesër kur edhe përfundon afati 30 ditor i vendosur nga aktgjykimi i Kushtetueses.

“Na kanë mbetur edhe pak orë. Na ka mbetur sot, kjo nuk do të thotë që nuk do të ketë seancë edhe më vonë, kjo nuk do të thotë që nuk do të ketë seancë edhe nesër. Në rrethana të tilla duhet reflektim nga deputetët e Kuvendit të Kosovës, në të kundërtën e vetmja zgjidhje mbeten zgjedhjet e reja”, tha Haxhiu.

Në përpjekjen e 52-të për konstituimin e Kuvendit të Kosovës para skadimit të afatit kushtetues,  në hyrje të Kuvendit janë parë ambasadorë të vendeve perëndimore, përfshirë përfaqësues të Shteteve të Bashkuara,  Mbretërisë së Bashkuar dhe Gjermanisë.

Si pjesëtarë të vendeve të QUINT-it, ata kanë bërë thirrje disa herë që Kosova t’i formojë sa më shpejt institucionet.