Millosh Pleskoviq është dënuar me 15 vjet burgim për krime lufte të kryera në shtator të vitit 1998 në Prizren.

Aktgjykimi u shpall sot në Gjykatën Themelore të Prishtinës.

Pleskoviq është gjetur fajtor pasi rreth datës 1 shtator 1998 në afërsi të lagjes “Hoqa Mahalla” në Prizren, në bashkëkryerje me një grup serbësh të armatosur, kishin vrarë Binak dhe Reshat Dacin, Fatmir Bojaxhiun dhe kishin plagosur disa civilë të tjerë.

Sipas aktakuzës së Prokurorisë Speciale e ngritur më 7 qershor 2024, Millosh Pleskoviq gjatë vitit 1998-99 në Prizren, në bashkëkryerje me persona të tjerë, ka shkelur rregullat e së drejtës ndërkombëtare kundër personave civilë, duke kryer vrasjen e viktimave.

Me dënimin e shqiptuar prej 15 vjet burgim për Pleskoviqin, nuk u pajtuan familjarët e viktimave dhe avokatët e tyre, pasi e vlerësuan si dënim të butë. Sipas tyre, Pleskoviq është dashur të merrte dënim me burgim të përjetshëm, marrë parasysh rrethanat e vrasjes dhe mizorinë e aktit, ku viktimat janë gjetur me gjymtyrë të prerë.  

Posta e Kosovës ka njoftuar se përmes Filatelisë së saj ka lëshuar sot në qarkullim emisionin e pullave postare në nderim të figurës dhe veprës së regjisorit dhe pedagogut të mirënjohur kosovar, Bekim Lumi.

Në njoftimin e shpërndarë përmes rrjeteve sociale, Posta e Kosovës ka përmbledhur në pika të shkurtra gjithë veprimtarinë dhe kontributin artistik dhe pedagogjik të Bekim Lumit, i cili ndërroi jetë në vitin 2018 pas një sëmundje të rëndë.

“Bekim Lumi (1966-2018) la gjurmë të pashlyeshme në skenën teatrore dhe në edukimin artistik në Kosovë, si regjisor vizionar dhe avangardë, por edhe si pedagog i përkushtuar në Fakultetin e Arteve në Prishtinë. Me regji të guximshme dhe qasje bashkëkohore, teatrit shqiptar i dha një frymë të re, prandaj me të drejtë konsiderohet si njëri ndër regjisorët më të vlerësuar në fushën e teatrit shqiptar.

Prej vitit 2006 deri më 2010, ai nxori revistën teatrore “Loja”. Me shfaqjet e tij ka marrë pjesë në dhjetëra festivale teatrore me rëndësi kombëtare e ndërkombëtare, si në: Zvicër, Francë, Gjermani, Itali, Greqi, Rumani, Bullgari, Bosnjë e Hercegovinë, e në vende të tjera.

Për punën e tij regjisoriale është shpërblyer me shumë çmime, ndër të cilat veçohet ai i vitit 2006, kur në Festivalin Ndërkombëtar të Teatrit në Lugano të Zvicrës, për shfaqjen “Mësimi” të realizuar në Teatrin “Dodona”, fitoi çmimin kryesor ”Shfaqja më e mirë”.

Po ashtu, në vitin 2016 u nderua nga Ministria e Kulturës së Kosovës me çmimin vjetor “Regjisor i vitit”. Për shfaqjen e tij “Arturo Ui”, më 2019, Lumi u nderua nga MKRS-ja me shpërblimin “Regjia më e mirë e vitit” dhe shfaqja u shpall “Shfaqja më e mirë e vitit”.

Më 2023, Presidentja e Republikës së Kosovës, Vjosa Osmani, e dekoroi Bekim Lumin post mortum me Medaljen Presidenciale të Meritave në fushën teatrore.

Bekim Lumi, si pedagog dhe profesor, ishte figurë formuese e brezave të aktorëve të rinj dhe regjisorëve, duke dhënë një kontribut të çmuar në edukimin artistik dhe skenik në vend.

Pas vdekjes së tij, Qendra Multimedia i ka botuar veprat, si: “Shakespeare-i dhe Kanuni  i Lekë Dukagjinit” 2019, një studim krahasues, librin me poezi “Engjëlli blu” 2021, si dhe librin “Loja e Bekim Lumit”, kritika, shqyrtime dhe shënime.

Figura dhe veprat e Bekim Lumit vazhdojnë të mbesin inspirim për brezat që vijnë”, thuhet mes tjerash në njoftimin e Postës së Kosovës

Forca e Sigurisë së Kosovës ka njoftuar se pasditen e sotme ka gjetur trupin e pajetë të mërgimtarit, Rrahim Latifit, i cili dyshohet se vdiq pasi u hodh në ujë nga ura në Liqenin e Ujmanit, më 27 korrik.

Pavarësisht kërkimeve për dy ditë rresht nga Policia dhe Shoqata e Kërkim-Shpëtimit, trupi i tij nuk u gjet.

Kurse sot, me angazhimin të edhe ekipeve të specializuara të kërkim-shpëtimit të FSK-së, pas disa orësh kërkim, u gjet trupi i pajetë i mërgimtarit 33-vjeçar.

“Falë intesitetit të lartë të kërkimit dhe profesionalizmit të ekipeve tona në terren, pas disa orësh kërkimi në bashkëpunim me Policinë e Kosovës, AME dhe KFOR, kanë arritur të gjejnë trupin e pajetë në zonën e  liqenit të Ujmanit. Pas evakuimit, trupi i pajetë i viktimës i është dorëzuar Policisë së Kosovës dhe ekipit të forenzikës për procedurat e mëtejme”, thuhet në njoftimin e FSK-së.