Ferizaj

29 vjet: Këshilli i pajtimit të gjaqeve akoma ka punë

Published

7 years ago

26 February, 2019

Sot janë bërë 29 vjet kur me nismën e Anton Çetës në Kosovë nisi aksioni atdhetar e humanitar i faljes së gjaqeve, që asokohe si dukuri kishte shtrirë rrënjë shumë thellë anembanë vendit.
Përvjetori i aksionit fisnik u shënua edhe në Ferizaj, ku veprimtarë e anëtarë të këshillit të dikurshëm lokal të pajtimit , thanë se viti 1990 ishte viti më i organizuar dhe më frytdhënës i kombit shqiptar:

“Viti 1990 shënoi një nga ngjarjet më të rëndësishme të historisë së popullit shqiptar, pajtimin e gjaqeve dhe ngatërresave, ky vit hyri në histori si viti më i orgamizuar dhe më frytdhënësi, hyri si bashkim i popullit shqiptar mbrenda dhe jashtë trojeve etnike, dhe u bë një ndër masat mbrojtëse më të fuqishme kundër pushtuesit serb” – tha Fatmir Çerkini, anëtar i këshillit pajtues.
“Ky këshill ka pasur shumë dimenzione, bashkimi i faktorit shqiptar me u bë bashkë, pastaj shtylla e bashkimit dhe afrimit dhe unitetit kombëtar na priste rreziku i luftës, e të kishim hy në luftë me tërë ato gjaqe do të ishte edhe më rëndë. Por madhështinë kësaj lëvizjeje ia dhënë ata që e shtrinë dorën e pajtimit” – tha veprimtari Xhevat Kryeziu.

Në mbledhimin e sotëm, aktivistët e pajtimeve uruan që të mos ketë nevojë më për ndërhyrjen e këtij këshilli:

“Uroj dhe gëzoj që kësi këshilla të pajtimit të gjaqeve mos të kemi më, por të kemi këshilla të zhvillimit ekonomik e kulturor. Fatkeqësisht këto po na ngjajnë edhe sot, siç ishte rasti në Ferizaj, hakmarrje, gjakmarrje që ato duhet të i’a lëmë pushtetit se për këtë kemi punuar dhe luftuar, për të formuar organet tona për tu marrur me cështjet e ngatërresave dhe pa funksionimin e shtetit juridik nuk mund të ketë edhe shtet të zhvilluar ekonomik”, tha Rushiti.

Drejtori i policisë në Ferizaj Gazmend Hoxha, në fjalimin e tij tha se si shoqëri, akoma nuk kemi arritur ne shkallën që të shuajmë këshillat e pajtimit të gjaqeve:

“A kemi nevojë edhe sot për këshillin e pajtimit? Do të ishte mirë të mos kemi nevojë asnjëherë për këshillin e pajtimit, por fatkeqësisht ky problem ekziston akoma tek ne, rasti i fundit në Ferizaj në bazë të informacioneve që ka Policia është bërë konkretisht për motive të hakmarrjes, kjo dëshmon se akoma shoqëria jonë nuk ka ecur përpara dhe mendoj se akoma kemi nevojë për një këshill të tillë”- deklaroi drejtori Hoxha.

Kryetari i këshillit të pajtimit të gjaqeve në Ferizaj, Raif Musa, tha se gjakmarrja krijon izolim e dhe e merr peng te ardhmen e njerëzve:

“Gjatë gjithë pajtimeve ne nuk kemi kërkuar falje në emër të vrasësve por gjithmonë në emër të rinisë, në emër të së ardhmes, sepse ishte momenti që të bëhej bashkimi i popullit për frymën e lirisë. Kurse sot në vend të hakmarrjes duhet të kërkojmë paqen, dashurinë për jetën, pasi gjakmarrja vetëm vret ajo vetmon, izolon dhe mban peng të ardhmen, ndërsa falja ndërton ura gëzimi, ndjenjë krenarie, paqe dhe përparim” – tha Raif Musa, në fjalën e tij të rastit.

Se falja të bënë krenar dhe të qetë, e thotë edhe Rrahim Bajraktari, i cili vite më parë fali dorasin e babait dhe nënës së tij:

“Kam falur gjakin e babait, nënës dhe plagën e motrës e cila jeton sot, ka qenë e rëndë, por e kam falur, kur më thoshin falnaj neve se nuk je duke i’a falur vrasësit atëherë kam vendosur të kontriboj për cështjen e kombit, sot kënaqem që kam bërë dicka e kam kontribu”,tha Bajraktari.

Këshilli per pajtimin e gjaqeve në Kosovë, që nga themelimi i tij ka arritur të ndalojë hakmarrjen tek më shumë se 2500 familje, dhe të zgjidhë ngatërresat ndërmjet qindra familjeve të tjera.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

1 day ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”