Policia Rajonale e Ferizajt javën e fundit ka konfiskuar 23 motoçikleta pa dokumentacion të ligjshëm derisa ka shqiptuar edhe 13 gjoba për shkelje të rregullave të trafikut.

Në njoftimin e policisë, bëhet e ditur se ky aksion është zhvilluar në kuadër të planit operativ “Motoçikleta 2025”.,

“Policia Rajonale e Ferizajt, në kuadër të planit operativ “Motoçikleta 2025”, me qëllim të rritjes së sigurisë në komunikacion, gjatë periudhës 28.07 – 03.08.2025 ka shqiptuar 13 gjoba dhe ka konfiskuar 23 motoçikleta, për shkak të mungesës së dokumentacionit dhe shkeljeve të rregullave të trafikut,” thuhet në postimin e Policisë së Kosovës në Facebook.

Njësia e Komunikacionit Rrugor në Ferizaj ka shqiptuar dy shoferëve gjoba dhe nga 3 muaj ndalesë të drejtimit të mjetit për tejkalim të shpejtësisë në rrugën transitore Shtime Belincë.

Në rastin e parë, shoferi B.G. (42 vjeç), duke drejtuar një veturë të tipit Volvo me targa të huaja, është kapur duke zhvilluar shpejtësi 118 km/h në një zonë me kufizim 60 km/h.

Ndaj tij është shqiptuar një gjobë prej 300 eurosh dhe masa e ndalimit të drejtimit të mjetit për 3 muaj në territorin e Republikës së Kosovës.

Kurse në rastin e dytë, shoferi F.M. (53 vjeç), me veturë të tipit Audi me targa vendore, është kapur duke qarkulluar me shpejtësi 121 km/h në të njëjtën zonë.

Ndaj tij është shqiptuar një gjobë prej 300 eurosh, 3 pikë negative, si dhe masa e ndalimit të mjetit për 3 muaj.

Një burrë 57-vjeçar nga Ferizaj, është arrestuar nën dyshimin se ka shtënë me armë zjarri gjatë një dasme në fshatin Greme. Policia ka sekuestruar katër armë zjarri, përfshirë dy pistoleta dhe dy pushkë gjuetie, ndërsa ndaj tij është iniciuar rast penal për mbajtje të paautorizuar të armëve dhe përdorim të armës apo mjetit të rrezikshëm.

“Ngjarja ka ndodhur më 2 gusht rreth orës 13:00, kur Policia Rajonale e Ferizajt ka pranuar informatën për të shtëna me armë zjarri. Njësitet policore kanë dalë menjëherë në vendin e ngjarjes, ku në oborrin e shtëpisë së të dyshuarit, S.A. (57), janë gjetur 50 gëzhoja dhe janë sekuestruar një pistoletë dhe një pushkë gjuetie.

Hetimet kanë vazhduar edhe ditën e nesërme, më 3 gusht, kur i dyshuari ka dorëzuar edhe një pistoletë dhe një pushkë gjuetie, të cilat po ashtu janë sekuestruar,  thuhet në njoftimin e policisë në Facebook.