Organizata e Veteranëve të Luftës së UÇK-së ka njoftuar se më 14 shtator nga ora 14:00 do të mbahet protestë paqësore para Gjykatës Speciale në Hagë. Kjo protestë organizohet me iniciativë të veteranëve nga mërgata.

Kryetari i OVL-UÇK-së, Hysni Gucati, u tha mediave se protesta ka për qëllim të kundërshtojë padrejtësitë që, sipas tij, i bënë kjo gjykatë.

“Me iniciativën e bashkëluftëtarëve tanë që jetojnë në mërgatë, njërin nga ta e kemi këtu, Fatmir Koci, Ukë Lushi që jeton në Amerikë dhe disa të tjerë, më 14 shtator 2025 do të mbahet një protestë në qytetin Hagë në Holandë, para Gjykatës Speciale, në orën 14:00. Ne, si organizata të dala nga lufta e UÇK-së, i kemi dhënë mbështetjen tonë të plotë me të gjitha kapacitetet dhe do të jemi bashkë në organizim. Kërkesën për protestë e kemi bërë te autoritetet holandeze dhe jemi në pritje të konfirmimit për lokacionin. Ju bëjmë thirrje të gjithë mërgimtarëve tanë që të marrin pjesë në këtë protestë paqësore kundër padrejtësive që po ndodhin në Gjykatën Speciale”, tha Gucati.

Kurse njëri nga organizatorët nga diaspora, Fatmir Koci, u bëri thirrje politikanëve e qytetarëve që t’i bashkohen kësaj proteste.

“U bëj thirrje të gjitha institucioneve, partive pa dallim ngjyrash dhe çdo shqiptari në diasporë që më 14 shtator të jemi bashkë para Gjykatës në Hagë. Të tregojmë se Kosova nuk pranon më padrejtësi në emër të drejtësisë. Luftën e kemi fituar me gjakun e dëshmorëve dhe përkrahjen e miqve tanë dhe do ta fitojmë edhe këtë betejë për dinjitet dhe të vërtetën”, tha Koci.

Më 7 gusht,  mijëra qytetarë protestuan në Prishtinë “kundër padrejtësisë” nga Dhomat e Specializuara të Kosovës në Hagë ndaj ish-krerëve të Ushtrisë Çlirimtare të Kosovës të cilët po akuzohen për krime lufte dhe krime kundër njerëzimit.

Në protestën, që u organizua nga kategoritë e dala nga lufta, morën pjesë qytetarë nga vise të ndryshme të Kosovës, por edhe nga vende të rajonit.