Njësia e Komunikacionit Rrugor e Policisë në Ferizaj, ka ndëshkuar dy shoferë të cilët u kapën në flagrancë kur po bënin gara shpejtësie nga rruga “Brahim Ademi” në rrugën “Driton Islami”.

Sipas njoftimit të policisë, shoferi me inicialet A.M. (23 vjeç), me veturë të tipit Audi dhe shoferi me inicialet P.M (20 vjeç) me veturën Golf, me targa vendore, janë kapur në flagrancë duke bërë gara shpejtësie.

Të dy shoferëve, për kundërvajtje të rënda në trafik, u janë shqiptuar gjoba prej 500 euro, 5 pikë negative dhe masa mbrojtëse për ndalim të së drejtës për të drejtuar automjetin për 12 muaj, thuhet në njoftimin e policisë.

Policia në Ferizaj ka njoftuar se të dielën u raportua një rast për një grua të zhdukur.

Sipas raportit 24 orësh të policisë, gruaja  dyshohet se ka dalë nga shtëpia mesditën e së dielës, derisa ende nuk dihet gjë për të.

“Ankuesi mashkull kosovar ka raportuar se viktima femër kosovare është larguar nga shtëpia dhe nuk dihet asgjë për vendndodhjen saj. Rasti po hetohet nga ekipet relavante policore”, thuhet në njoftim.

Prokuroria Themelore në Ferizaj, bëri të ditur se i dyshuari për vrasjen  që ndodhi mbrëmë në fshatin “Balaj”është dërguar në mbajtje në kohëzgjatje prej 48 orësh.

Sipas njoftimit, Prokurori i Shtetit, brenda afatit ligjor do të paraqesë kërkesë pranë gjykatës kompetente për caktimin e masës së paraburgimit ndaj të dyshuarit.

“Prokurori kujdestar nga Departamenti për Krime të Rënda, ka dalë në vendin e ngjarjes, nga aty në bashkëpunim të plotë me Policinë e njësitë relevante kanë ndërmarrë veprime hetimore, me qëllim të ndriçimit të rrethanave të kësaj ngjarje.

Me vendim të prokurorit të shtetit, i dyshuari me iniciale B.R., është ndaluar në kohëzgjatje prej 48-orësh, për shkak të dyshimit të veprës penale “Vrasja” sipas Kodit Penal të Republikës së Kosovës.

Ndërsa, trupi i pajetë i viktimës (I.R), është dërguar në Institutin e Mjekësisë Ligjore (IML), në Prishtinë, për obduksion.

Aktualisht, Prokuroria Themelore në Ferizaj është duke punuar për të sqaruar tutje të gjitha rrethanat dhe motivin e kësaj çështje penale “, thuhet mes tjerash në njoftim.

Sipas Policisë së Kosovës, ngjarjes e cila ndodhi më 15.09.2025 në fshatin Balaji i parapriu një mosmarrëveshje e më pas një fjalosje mes të dyshuarit e viktimës, që mes vete kanë lidhje familjare.