Ferizaj

Pluhuri nga rruga e lënë në gjysmë shqetëson komogllavasit

Published

6 years ago

29 October, 2019

Ka afër një muaj që fshati Komogllavë i Ferizajt është mbuluar nga pluhuri si pasojë e rrugës kryesore të këtij fshati e cila ka mbetur vetëm në zhavor.

Banorët thonë se më 4 tetor, pak para zgjedhjeve parlamentare, është larguar asfalti i vjetër për t’u shtruar asfalti i ri, por që nga atëherë askush më nuk është marrë me këtë rrugë.

“Katastrofë jemi me këtë pluhur, jemi lajmëruar edhe në komunë, dritaret nuk mundemi me i hap kurrë se le më me dalë në oborr, rrobat po i terim brenda, kjo rrugë është shtru tri ditë para zgjedhje dhe më as që u interesu dikush, nuk e dimë a është prej komunës apo kompanisë”, tha Lutfie Abdullahu nga Komogllava.

“Dy ditë para zgjedhjeve kanë ardhë e kanë heq asfaltin, po është shumë problem, as në oborr nuk po mundemi me dalë, është katastrofë, nuk e di se çka është duke ndodhë kryesorja ne nuk jemi duke mundur as me dalë në oborrin tonë“, tha Ismail Abdullahu nga Komogllava.

“Nga 5 tetori kompania që e ka fituar tenderin e ka heq asfaltin dhe e ka lënë në këtë gjendje dhe nuk është punuar më në këtë aspekt, na është premtuar se do të filloj në këtë javë, por kjo është gjendja, gjithçka është e pluhrosur, çdo gjë është bërë bardh“, tha Vedat Ismaili.

“Është dhënë një garancion që të premtën me fillu punimet, nuk kanë filluar, ne kemi paralajmëruar një protestë dhe unë e besoj se një kamion nuk e ka qëllimin e mirë, por kanë ardhë vetëm sa me u vërejt në rrugë se përndryshe rruga do të fillonte nga e mbara e jo siç e kanë nisur tani, prandaj nuk besojmë, unë besoj se këtë e kanë bërë me marrë kohë dhe me bë një opinon se jemi të interesuar përndryshe pas përfundimit të zgjedhjeve njeri i gjallë këtu nuk ka ardhë”, tha Vehbi Emini.

Në anën tjetër, përfaqësues të ekzekutivit ferizajas, thanë se punimet për asfaltimin e kësaj rruge kanë filluar dhe ato do të shkojnë sipas planifikimeve.

“Lajmi i mirë është që në Komogllavë punëkryesi është në terren dhe po punohet për përfundimin e këtij projekti, të gjitha projektet edhe ky në Komogllavë ka një bazë ligjore dhe planifikim financiar, ka një kohë për përfundimin e saj dhe qytetarët nuk kanë arsye të ndjehen të shqetësuar për këtë projekt, pasi ai do të vijoj në ritmin e vet normal”, tha Albion Sherifi, përfaqësues i komunës së Ferizajt.

Ndryshe nga banorët e Komogllavës të cilët po kërkojnë asfaltim të rrugës, banorët e Zllatarit po ankohen për asfaltim jocilësor. Asfaltimi i rrugës ”Shkolla” i bërë javën e kaluar, po del të jetë jokualitativ. Ai madje po mund të hiqet edhe me dorë.

“Kur ka ardhë asfalti kanë bërë ndasi, por më e keqja është cilësia, kemi bërë një reagim, kam kontaktuar me drejtorin, ka ardhë drejtori dhe i tha kompanisë që ta largoj këtë asfalt se është jocilësor, ne kemi prit që 20 vite bile kur të shtrohet le të jetë cilësor se më nuk i vie radha kurrë“, tha Burim Kurti, banor i fshatit Zllatar.

Albion Sherifi nga komuna e Ferizajt, tha se ky asfalt do të zëvendësohet me asfalt të kualitetit të lartë.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim