Ferizaj

Sabedini: Sulmi ndaj meje me motive politike

Published

7 years ago

30 October, 2019

Jakup Sabedini, anëtar i Partisë Demokratike të Kosovës në Ferizaj, ka akuzuar aktivistë të Lëvizjes Vetëvendosje në këtë qytet, për sulmin fizik të ndodhur më 27 tetor. I kontaktuar nga TV TEMA, Sabedini nuk ka pranuar të prononcohet para kamerës, mirëpo përmes telefonit, thotë se sulmi ka ndodhur për arsye politike, duke mos dashur të përmend emra të sulmuesve.

”Sulmi ka qenë i organizuar, i planifikuar, edhe kam pas kërcënime të mëhershme, ka qenë një interval shumë i shkurtër nga 6 tetori deri në ditën që e kanë ekzekutu sulmin kundër meje. Përpos sulmit fizik kam pas fatkeqësisht edhe një sulm moral nga Lëvizja Vetëvendosje dega në Ferizaj e cila në vend që të distancohet nga veprimet e aktivistëve, edhe mos qofshin aktivistë siç pretendojnë ata, ata janë përpjek me kundërshtu. Ne askush nuk e kemi kundërshtu Vetëvendosjen, as Partia Demokratike e Kosovës dega në Ferizaj, as unë si individ, në këtë rast si viktimë e rastit, edhe vërtet familjarisht kemi qenë të tronditur pak. Lajmin e kemi publiku pas dy dite për arsye të familjes mos me qenë një tronditje ad hock për familjen time. Ka qenë motiv politik, edhe siç po shihet këtu në rrjete sociale, ata janë, aty shihet që janë aktivistë të Lëvizjes Vetëvendosje dhe aty shihen, pa dashur me etiketu asnjë deputet të Lëvizjes Vetëvendosje, por aty ishin edhe Hekuran Murati dhe Dimal Basha, tash nuk mundem me thënë që ata kanë qenë protagonistë të nxitjes, por ata janë aktivistë të Lëvizjes Vetëvendosje”, u shpreh ai.

TV TEMA: A kanë qenë ata prezentë kur ka ndodhë rasti?

“Jo, jo, rasti kur ka ndodhë jo, në fotografitë që shihen në aktivitete të fushatës, të fitores, të gëzimit të tyre, shihet që ata janë nën shoqërinë e këtyre grupeve të këtij grupi që më kanë sulmu”, tha Sabedini .

E, në Policinë e Kosovës në Ferizaj, thonë se ky rast është paraqitur nga vet viktima dhe se hetimet po vazhdojnë.

“Po rasti është raportuar me 27 të këtij muaji, nga ana e viktimës jemi njoftuar se me këtë datë rreth orës 1 e 15 minuta në një objekt hotelier në Ferizaj viktima është sulmuar nga disa persona, policia ka dalë në vendin e ngjarjes, viktimës iu ka ofruar ndihma mjekësore, ndërsa të dyshuarit nuk janë has në vendin e ngjarjes, pas intervistimit të viktimës policia ka sjellë një person në Stacionin Policor ne Ferizaj për ta intervistuar lidhur me këtë rast, gjithashtu është njoftuar edhe prokurori, lidhur me këtë rast pas përfundimit të intervistës nga ana e prokurorit personi është urdhëruar që të lirohet dhe rasti të shkojë në procedurë të rregullt, policia është ende duke i zgjeruar hetimet lidhur edhe me persona të tjerë të mundshëm të cilët kanë qenë të kyqur në këtë rast“, tha Agim Gashi, zëdhënës i Policisë së Kosovës në Ferizaj.

Ndërkaq, Lëvizja Vetëvendosje në Ferizaj, përmes një komunikate për media, i ka cilësuar të rreme akuzat e Sabedinit. ”Fakti se thuhet që ngjarja ka ndodhur para tre ditësh tregon se dikush po interesohet të nxisë opinionin publik përmes shpifjeve e lajmeve të pavërteta. Aktivistët e Lëvizjes nuk janë të përfshirë, prandaj kryesit e vërtetë duhet të kërkohen diku tjetër. Dhuna është e dënueshme, por dhe shfrytëzimi i emrit të Lëvizjes për shpifje e akuza të rrejshme si kjo është i padrejtë, ndonëse e kuptojmë që PDK-ja në këtë kohë nuk ka temë tjetër, e vetëm lajmet e pavërteta i shohin si mundësi për të kthyer vëmendjen”, thuhet në reagimin e qendrës së LVV në Ferizaj.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

18 hours ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”