Ferizaj

Paralajmërohet asfaltimi i rrugës që lidh fshatrat Manastirc-Zaskok

Published

6 years ago

31 October, 2019

Pjesës së mbetur të rrugës së paasfaltuar që lidh fshatrat Manastirc dhe Zaskok, siç duket po i vie fundi. Shpresë për këtë dha sot drejtori i Infrastrukturës në Ferizaj, Arbër Bytyqi.

“Njëra nga pikat e rendit të ditës ishte edhe kjo pikë e cila do të zgjidhë problemet me pronat në atë pjesë, gjegjësisht në zonën që lidh fshatin Manastirc me fshatin Zaskok, po besoj që pas kalimit të afateve ligjore ju e patë që votat e kuvendarëve sot ishin që të aprovohet si pikë e rendit të ditës, ndërsa ne tash duhet t’i presim edhe afatet ligjore nga Ministria, gjegjësisht nga MAPL-ja, dhe po shpresoj që edhe kushtet atmosferike t’i kemi në favorin tonë dhe ta zgjidhim edhe atë problematikë që është në atë zonë, të përfundohet edhe ai segment i shkurt prej 300 metrave në fshatin Manastirc dhe ato 3-4 shtëpi sa janë në atë pjesë të kenë kushte më të mira të jetesës”, tha drejtori Bytyqi.

Më tej, drejtori Bytyqi tha se në mungesë të vullnetit të banorëve për të liruar pronat e tyre, janë detyruar të ndjekin procedurat ligjore.

“Ka munguar vullneti i banorëve të asaj zone që ta lirojnë pjesën për interes të përgjithshëm dhe ne jemi detyruar që t’i përcjellim procedurat ligjore, sot jeni dëshmitarë që këto procedura vetëm po i japim drejtim me miratimin e Kuvendit të Ferizajt dhe po besoj që edhe MAPL-ja do ta kthejë një vendim në favor tonë dhe pas përfundimit të këtyre ne do të vazhdojmë procedurat tjera që janë të parapara në bazë të ligjeve në fuqi të Republikës së Kosovës, afati është 15 ditor që duhet të pritet konfirmimi nga ministria për ligjshmërinë e rendit të ditës po shpresojmë që pas përfundimit të këtij afati të kemi edhe kushtet e mira atmosferike dhe të mund të vazhdojmë më tutje me asfaltimin e atij segmenti të rrugës”, u shpreh drejtori Bytyqi.

Ky segment rrugor bën pjesë në projektin e unazës së jashtme rrugore të Komunës së Ferizajt që lidh fshatrat Prelez i Jerlive, Kosinë, Llojza, Dremjak, Nerodime, Manastirc, Zaskok, Greme.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.