Ferizaj

Kërkohet angazhim institucional për parandalimin e përdorimit të narkotikëve

Published

7 years ago

01 November, 2019

Nën organizimin e Qendrës Këshilluese “Këshillimi”, në Ferizaj është mbajtur konferenca me temën “Nëntori-muaj i vetëdijësimit kundër substancave narkotike”. Me këtë rast, drejtoresha e Qendrës Këshilluese “Këshillimi”, Arjeta Musliu, duke folur rreth kësaj qendre, tha se hapja e saj ishte domosdoshmëri e kohës.

“Që 3 muaj që funksionojmë si qendër këshilluese kemi pasur afër 150 raste që kanë frekuentuar qendrën tonë dhe kanë kërkuar ndihmë vullnetarisht për të hequr dorë nga substancat narkotike. Kjo është këmbanë alarmi për shoqërinë tonë, nuk mund të krenohemi që kemi kaq shumë raste, por jemi tejet krenarë me punën tonë vullnetare me aq përkushtim që po bëjmë ndaj këtyre individëve që janë të varur nga substancat narkotike. Qendra jonë të gjitha shërbimet i ka falas duke pasur edhe përdorues të komuniteteve që jetojnë në Kosovë ku dominon gjinia mashkullore, madje kemi arritur që ata që kanë ardhur në fillim të hapjes së qendrës sonë, tani janë në fazën më të mirë për të hequr dorë plotësisht nga përdorimi i substancave narkotike, duke shërbyer edhe si vullnetarë në qendrën tonë sa që janë familjarizuar me këtë qendër si shtëpia e tyre e dytë, duke e gjetur shpresën dhe rikthimin në familje, shkollë dhe shoqëri”, tha drejtoresha Musliu.

Ndërsa, Migjen Amzai, ekspert i psikoterapisë, foli për përvojat e të punuarit me këtë kategori të njerëzve.

“Mundohem t’ua qëndis në zemrat e tyre, mundohem t’ua qëndis në përditshmërinë e tyre fjalën të dua, fjalën e dua, fjalën më do, sepse kjo është ajo që ju ka munguar. Dy përqafime që pata nga dy djem pas takimit me grup nuk i harroj kurrë, njëri filloi të qajë edhe tha kurrë se kam përjetuar këtë, imagjinoni unë jam një person i panjohur për atë, unë jam i huaj për atë, çfarë tregon kjo, tregon që nuk i duan prindërit këta fëmijë, tregon që janë të lënë pas dore, nuk ka prind që nuk e do fëmijën e vet, mirëpo ka diçka në dinamikën familjare që nuk shkon, sigurisht edhe në takimet në grup kjo është shumë evidente, sepse prindi gjithmonë duke u fokusuar në të.
E dini si është fëmija, fëmija është çfarë t’i ushqesh fëmijës, fëmija me atë do të rritet, fëmija atë do të marrë, atë do të kërkoj prej teje. Prindërit zakonisht që pak më dominant, pak më patriarkal, pak më urdhërdhënës dhe nuk pranojnë këshilla nuk pranojnë as të diskutojnë për tema, as nuk i dëgjojnë fëmijët bile në shumicën e rasteve, në këto raste femijët edhe kur t’i thuash mos se do vritesh, do sëmuresh, do bëhesh, fëmija këto i do dhe kështu fëmija rritet, zhvillohet, besoj që fillimi është ky, mënyra se si ne i flasim fëmijëve tanë“, u shpreh Amzai.

Ndërkaq, kryetari i Ferizajt, Agim Aliu, tha gjatë kësaj konference se së bashku mund t’ia dalim në parandalimin e kësaj dukurie negative.

“Drogat janë kërcënimi ynë, shteti ka detyrën të jetë në krye të kësaj lufte, ajo nuk është as diagnozë, as lojë fjalësh, as lemeri në kthinat e spitaleve e mantelbardhëve, por dhembje që pllakos gjithë shpirtin, plagë që kullon në çdo pore të shoqërisë e për të cilën lypset që pa kursim me profesionistë e vullnetmirë ta vëmë në binarët e eliminimit këtë farë të keqe që mbinë vdekje, fatkeqësi, pikëllim e pafuqi. Unë jamë luftëtar bashkë me ju, çdo armë në duart e mija është edhe e juaja kundrejt narkotikëve që helmojnë fëmijët tanë”, tha në mes tjerash kryetari Aliu.

Gjatë diskutimeve në këtë konferencë u kërkua themelimi i qendrave rehabilituese për përdoruesit e drogave, si dhe angazhim më i madh institucional dhe shoqëror për të parandaluar këtë dukuri negative.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

12 hours ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”