Lokacioni për ndërtimin e stadiumit nacional të Kosovës është bërë prapë temë diskutimi. Derisa po debatohet se ku duhet të ndërtohet ky stadium, trajneri ferizajas Agron Selmani, thotë se stadiumi i Kombëtares së Kosovës duhet të ndërtohet në qytetin e Ferizajt, meqë lokacioni gjeografik I këtij qyteti është I përshtatshëm për një stadium të tillë.

“Një alternativë e tretë, një alternativë që kishte me qenë më e pranueshme për shkak të pozicionit gjeografik që e ka qyteti i Ferizajt, për shkak të zonës sportive e cila veq është zonë enkas e dedikuar për aktivitete sportive, unë po mendoj se edhe për shkak të rrethanave historike dhe për shkak të rrethanave sportive edhe për shkak të shumë faktorëve demografik. Unë mendoj se Ferizaj do të ishte një ide më e mirë në krahasim me këto dy pozicionet aktualisht. Arsyeja është shumë e logjikshme dhe shumë konkrete. Rajoni i Ferizajt me komunën e Shtimës, Shtërpces e Kaçanikut dhe Hanit të Elezit, po ashtu edhe me reflektim të qytetit të Vitisë, nuk është i përfaqësuar me asnjë objekt. Fitimi do të ishte i dyanshëm, investimi do të ishte më racional kurse qasja dhe pozita gjeografike edhe faktorë të tjerë janë në favor të idesë sime dhe nuk kam asgjë kundër ideve tjera, por përse të mos luftojmë me një ide të mirë, të shëndosh dhe të fitoj opsioni më i mirë”, tha Selmani.

Se ky stadium duhet të ndërtohet në Ferizaj e thotë edhe trajneri Ahmet Sylejmani.

“Infrastruktura ekziston dhe mandej infrastruktura rrugore, infrastruktura po mendoj edhe në atë aspektin material, këtu tek ne afër palestrës sportive “Bill Clinton” edhe stadiumi me bari artificial që i plotëson disa kushte që aktiviteti të vazhdoj edhe në aspektin nacional për këtë çështjen e stadiumit nacional. Është mirë që komunës së Ferizajt një herë t’i jepet një mundësi që të ndërtoj një stadium, për arsye se tani mbi ligjin për AKP-në që u është dhënë kompetenca për prona komunave mundemi edhe në aspektin material të kursejmë për arsye se nuk ka nevojë të shpronësohen tokat, po mendoj në atë objekt që është gati 30 hektarë që mund të bëhet një stadium me të vërtetë i mirë dhe ka hyrje dhe dalje dhe këtu janë rruga nacionale “Arbën Xhaferi”, është rruga këndej “Ibrahim Rugova” që mund të lidhet, mandej është hekurudha,  aeroporti është afër, domethënë ka pika lëvizëse shumë të mira”, tha Sylejmani.

Qeveria e Kosovës, përkatësisht kryeministri në largim, Ramush Haradinaj, me 4 dhjetor të vitit 2017, në mbledhjen e qeverisë kishte marrë vendim që zona ekonomike e Drenasit, të caktohet si lokacioni për ndërtimin e stadiumit. Fillimisht, vendi ku ishte caktuar lokacioni i stadiumit ishte tjetër. Presidenti aktual Hashim Thaçi, në kohën kur ishte kryeministërmë 18 mars të 2014, në mbledhjen e qeverisë, kishte marrë vendim që të fillojnë procedurat për ndërtimin e stadiumit kombëtar të Kosovës. Lokacioni ishte caktuar në territorin e komunës së Prishtinës. Por, një deklaratë nga anëtari i LDK-së, Lumir Abdixhiku, ka ringjallur reagimet. Deputeti i Lidhjes Demokratike tha se partia e tij dhe Lëvizja Vetëvendosje, si fitues të zgjedhjeve të 6 tetorit, kanë vendosur që stadiumi kombëtar i Kosovës të mos ndërtohet në Drenas, por në Bernicë.