Kryetari i rizgjedhur i Nismës Socialdemokrate në Ferizaj Besnik Berisha, synon që në këtë subjekt politik të angazhoj sa më shumë anëtarë të moshave të reja. Në një intervistë për Televizionin Tema, Berisha tha se partia e tij do të bëj përpjekje që secilës familje me gjendje të rëndë sociale t’ia punësojë nga një anëtar.
“Projektet e partisë dhe në bazë të programit të qendrës, por edhe në degën tonë është punësimi i një anëtari të secilës familje. Pra, ne si Nismë Socialdemokrate jemi parti që jemi të interesuar për ta çuar vendin përpara në të gjitha proceset e rëndësishme, kështu që edhe dega e Ferizajt do ta ketë një rol të konsiderueshëm edhe në qendër. Përndryshe ne edhe pse bëjmë pjesë në bashkëqeverisje lokale, ende nuk kemi punësuar askënd, por synojmë që këtë gjë ta bëjmë dhe mos t’i ndajmë ata sipas partisë, por si familje që ka nevojë për punë”, tha Berisha.
Berisha njoftoi se çdo ditë në këtë subjekt politik janë duke u bërë aderime të reja, madje edhe nga subjektet e tjera politike.
“Ne jemi duke marrë vlera, do të thotë njerëz që nuk i është ofruar hapësira nëpër partitë që ishin, prandaj tek ne po e gjejnë veten sepse ne si subjekt politik kemi vendos të jemi të hapur dhe të gjithë të aderuarit do ta kenë vendin meritor’’, tha Berisha.
Sipas Berishës brenda 5 muajve të fundit Nisma Socialdemokrate në Ferizaj është fuqizuar, ku gjatë kësaj periudhe kohore ka arritur t’i formojë 32 nëndegë në këtë komunë.