Ferizaj

LDK akuzon pushtetin për mosrealizim të projekteve infrastrukturore

Published

8 years ago

12 May, 2018

Lidhja Demokratike e Kosovës në Ferizaj, ka akuzuar udhëheqësinë komunale në këtë qytet për mosrealizim të projekteve infrastrukturore që ishin paraparë të realizohen këtë vit, e për të cilat sipas LDK-së, janë të destinuara mjetet financiare si dhe janë të nënshkruara kontratat.

Valon Halimi nga ky subjekt politik, tha se e gjithë kjo po bëhet për të ndryshuar destinimin e mjeteve buxhetore me qëllim të realizimit të projekteve sipas kërkesave të militantëve të partive në pushtet.

“Ky pushtet i përgjumur edhe pas 5 muajve në lëmin e infrastrukturës nuk ka bërë asnjë hap. Kryetari i komunës Agim Aliu, ka lënë pas vete 5 muaj të humbur të zhvillimit ekonomik të Ferizajt. Ai në vend se të ftojë operatorët ekonomik që të realizojnë kontratat e nënshkruara për projektet infrastrukturore ai po vazhdon monologun e vetë mekanik. Për fat të keq ai as nuk po procedon projektet infrastrukturore sipas buxhetit të këtij viti , qytetarët janë të shqetësuar me këtë stagnim, këtë regres që po ndodhë. Kryetari i komunës po i fut në lajthitje operatorët ekonomik të cilët kanë në shkruar kontrata paraprake duke u thënë mos punoni edhe përkundër gatishmërisë së tyre që të vazhdojnë punët, madje edhe projektet infrastrukturore që i paguan Qeveria e që komuna nuk paguan asnjë cent për to. Kjo është tendencë e hapur e kryetarit të komunës për ndaljen e këtyre projekteve, destinimin e mjeteve për projekte të tjera sipas kërkesave të militantizmit të PDK-së dhe PAN-it, kjo rrezikon që kompanitë private të futen në listën e zezë, duke i lajthitur që disa edhe vullnetarisht të heqin dorë nga realizimi i kontratave dhe i projekteve”, theksoi Halimi.

Halimi tha se mospuna e kësaj qeverie që nga ardhja në pushtet, vërehet shumë lehtë në terren.

“Ilustrimi më i thjesht i kësaj neglizhence janë edhe gropat e rrugëve urbane anekënd qytetit, si dhe pusetat e hapura të cilat janë rrezik për jetën e qytetarëve si dhe dëmet që u bëhen në automjetet e tyre dhe nuk ka si të jetë ndryshe pasi komuna nuk ka hapur tender për mirëmbajtën e 8 rrugëve për asfaltim, komuna po vazhdon mirëmbajtjen e rrugëve me zhavorr në mënyrë antiligjore, pa procedura, pa tender dhe pa përzgjedhjen e operatorëve , qytetarët e dinë se asnjë kompani në komunë nuk investon pa interes, edhe ato pak trotuare për këmbësorë tashmë janë pushtuar anekënd qytetit nga ndërtimet që po bëhen ngase inspektorët nuk duken askund”, tha Halimi.

Lidhja Demokratike e Kosovës në Ferizaj, kërkoi që të fillojnë së realizuari projektet që kjo parti, gjatë kohës sa ishte në pushtet, kishte paraparë të realizohen këtë vit.

Ferizaj

Gjatë qershorit në Ferizaj janë konfiskuar 74 motoçikleta

Published

3 days ago

02 July, 2026

Redaksia

Policia Rajonale e Ferizajt ka bërë të ditur se gjatë muajit qershor ka intensifikuar kontrollet në trafik ndaj drejtuesve të motoçikletave dhe skuterëve.

Si rezultat i këtyre kontrolleve, gjatë kësaj periudhe janë konfiskuar 74 motoçikleta, kryesisht për mungesë të dokumentacionit të rregullt derisa janë shqiptuar edhe 106 gjoba ndaj drejtuesve të motoçikletave, të cilët janë kapur duke qarkulluar në kundërshtim me rregullat dhe ligjet e komunikacionit rrugor.

Numri më i madh i gjobave janë shqiptuar për drejtim të motoçikletës pa patentë shofer, gjithsej 52 gjoba, 46 gjoba për drejtim të motoçikletës pa regjistrim dhe 8 gjoba për kundërvajtje të tjera.

Ferizaj

Prokuroria kërkon paraburgim ndaj të dyshuarës për vrasjen në Ferizaj

Published

6 days ago

29 June, 2026

Redaksia

Prokuroria Themelore në Ferizaj ka kërkuar nga Gjykata Themelore në Ferizaj, caktimin e masës së paraburgimit ndaj të pandehurës A.R., për shkak të dyshimit të veprës penale “Vrasja” sipas Kodit Penal të Republikës së Kosovës.

Sipas kërkesës së Prokurorisë, ekziston dyshimi i bazuar se me datë 28 Qershor 2026, rreth orës 22:40 në Ferizaj, rruga, “Sejdi Sejdiu”, e pandehura ka privuar nga jeta tani të ndjerin F.H., pas një mosmarrëveshje dhe përleshje fizike në mes tyre, me të cilën ka kryer veprën penale “Vrasja”, nga neni 172 të KPRK-së.

Ndërkaq, i dyshuari me iniciale M.B., që ishte ndaluar deri në sqarimin e plotë të rrethanave dhe përfshirjes së tij në rast, me aktvendim të Prokurorit të Shtetit është liruar.

Po ashtu, në këtë rast, lëndime trupore ka pësuar edhe e dyshuara A.R., të cilat dyshohet se i janë shkaktuar nga viktima- tani i ndjeri (F.H.,) për të cilat ka marr trajtim mjekësor në Qendrën Klinike Universitare të Kosovës (QKUK).

Ferizaj

Ndalohen dy persona për vrasjen e 32 vjeçarit në Ferizaj

Published

6 days ago

29 June, 2026

Redaksia

Policia e Kosovës ka dhënë detaje lidhur me vrasjen që ka ndodhur mbrëmë rreth orës 22:50, në një banesë në rrugën “Sejdi Sejdiu”në Ferizaj, ku një person ka humbur jetën dhe dy të tjerë janë ndaluar për 48 orë.

Viktima është identifikuar me inicialet F.H., 32 vjeç, ndërsa vdekja e tij është konstatuar në vendin e ngjarjes nga ekipi mjekësor.

“Gjatë ekzaminimit të vendit të ngjarjes është konstatuar një plagë që dyshohet se është shkaktuar nga arma e zjarrit. Në vendngjarje janë gjetur dhe sekuestruar një pistoletë dhe një gëzhojë.

Nga hetimet fillestare rezulton se ngjarja ka ndodhur në banesën e M.B. (48 vjeç), ku në momentin e incidentit ndodheshin aty bashkëshortja, si dhe vajza e tij A.R. (24 vjeçe). Kjo e fundit ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës (QKUK).

Pas ekzaminimit të vendit të ngjarjes, ekziston dyshimi i bazuar se rasti ndërlidhet me veprën penale “Vrasje e rëndë”.

Me vendim të prokurorit të rastit, i dyshuari M.B. është ndaluar për 48 orë. Po ashtu, edhe ndaj A.R. është lëshuar vendim për ndalim prej 48 orësh, mirëpo ajo vazhdon të mbetet nën trajtim mjekësor në QKUK.

Trupi i pajetë i viktimës është dërguar në Institutin e Mjekësisë Ligjore në Prishtinë për obduksion.

Sektori i Hetimeve Rajonale, në koordinim dhe autorizim të prokurorit të shtetit, është duke ndërmarrë veprime intensive hetimore për zbardhjen e plotë të rrethanave të këtij rasti”, thuhet mes tjerash në njoftimin e Policisë.