Ferizaj

Fshati i Vjetër dhe Bibaj akoma pa ujë të pijes

Published

8 years ago

25 May, 2018

Në gusht të vitit 2016 patën filluar punimet për instalimin e ujësjellësit në fshatin Bibaj dhe në Fshatin e Vjetër, por përkundër kësaj, këto dy fshatra ende përballën me mungesë të ujit të pijes.

Banorët thonë se me ujë të pijshëm nga ujësjellësi janë furnizuar vetëm dy javë, edhe atë veç sa ishte fushata zgjedhore.

“E kanë lëshu një herë ujin para zgjedhjeve dhe gëzimi ka qenë shumë i madh, madje kemi bërë edhe festë në oborr të shkollës për ujë të pijshëm, por tash po bëhen 6-7 muaj që ne po presim ujin padurim, banorët e fshatit Bibaj janë kyçur, orët i kanë vendosur të gjithë, mund të them që 5% e tyre nuk janë kyçur me ora nëpër sistem, por pjesa më e madhe po dhe tek ne mund të lëshohet uji”, tha Faton Haxhisalihu, banor i fshatit Bibaj.

“Që një vit e gjysmë janë të vendosur gypat dhe kurrë nuk e kanë lëshuar as në Bibaj as në Fshat të Vjetër, vetëm gënjeshtra, çdo dy ditë shkojmë në qytet dhe nuk është vetëm një ditë, por që 4-5 vjet kështu”, tha Basri Neziri, banor i Fshatit të Vjetër.

“Nuk e di se çfarë ka ndodhë me ujësjellësin, pasi unë jam në Gjermani kam ardh në pushim, por nuk e di nëse e kanë lëshu ujin ose jo, por gypat janë dhe siç kam dëgju e kanë lëshu një herë dhe javë kanë ndalë prapë”, tha Ibrahim Ibrahimi, banor i fshatit Bibaj.

Ndërsa, në kompaninë rajonale të ujit “Bifurkacioni”, thonë se pa u kyçur në sistem të gjithë banorët e të dy fshatrave nuk do të filloj furnizimi me ujë.

“Problemi në këtë sistem të furnizimit me ujë në fshatin Bibaj dhe Fshat të Vjetër qëndron se është kryer rrjeti primar dhe sekondar, por nuk janë kryer të gjitha kyçjet. Fshati Bibaj e ka kryer një numër të konsiderueshëm të kyçjeve që është obligim i qytetarëve, ndërsa Fshati i Vjetër jo. Për fshatin Bibaj kemi filluar regjistrimin për faturim, ndërsa për Fshatin e Vjetër pa u bë kyçjet nuk mundemi me lëshu ujin, por as me bë regjistrimin për faturim. Pra, problemi është tek kyçjet individuale dhe përderisa nuk është bërë realizimi i të gjitha kyçjeve nuk mundemi me bë lëshimin e ujit dhe në momentin që kryhen të gjitha kyçjet ne e lëshojmë ujin dhe i shtim në sistemin e faturimit”, tha Zelfije Hyseni.

Kyçjet individuale konsumatorëve të fshatit Bibaj dhe Fshatit të Vjetër po iu kushtojnë rreth 100 euro për një metër gjatësi, ku përfshihen edhe elementet përcjellëse.

Ferizaj

Gjatë qershorit në Ferizaj janë konfiskuar 74 motoçikleta

Published

2 days ago

02 July, 2026

Redaksia

Policia Rajonale e Ferizajt ka bërë të ditur se gjatë muajit qershor ka intensifikuar kontrollet në trafik ndaj drejtuesve të motoçikletave dhe skuterëve.

Si rezultat i këtyre kontrolleve, gjatë kësaj periudhe janë konfiskuar 74 motoçikleta, kryesisht për mungesë të dokumentacionit të rregullt derisa janë shqiptuar edhe 106 gjoba ndaj drejtuesve të motoçikletave, të cilët janë kapur duke qarkulluar në kundërshtim me rregullat dhe ligjet e komunikacionit rrugor.

Numri më i madh i gjobave janë shqiptuar për drejtim të motoçikletës pa patentë shofer, gjithsej 52 gjoba, 46 gjoba për drejtim të motoçikletës pa regjistrim dhe 8 gjoba për kundërvajtje të tjera.

Ferizaj

Prokuroria kërkon paraburgim ndaj të dyshuarës për vrasjen në Ferizaj

Published

4 days ago

29 June, 2026

Redaksia

Prokuroria Themelore në Ferizaj ka kërkuar nga Gjykata Themelore në Ferizaj, caktimin e masës së paraburgimit ndaj të pandehurës A.R., për shkak të dyshimit të veprës penale “Vrasja” sipas Kodit Penal të Republikës së Kosovës.

Sipas kërkesës së Prokurorisë, ekziston dyshimi i bazuar se me datë 28 Qershor 2026, rreth orës 22:40 në Ferizaj, rruga, “Sejdi Sejdiu”, e pandehura ka privuar nga jeta tani të ndjerin F.H., pas një mosmarrëveshje dhe përleshje fizike në mes tyre, me të cilën ka kryer veprën penale “Vrasja”, nga neni 172 të KPRK-së.

Ndërkaq, i dyshuari me iniciale M.B., që ishte ndaluar deri në sqarimin e plotë të rrethanave dhe përfshirjes së tij në rast, me aktvendim të Prokurorit të Shtetit është liruar.

Po ashtu, në këtë rast, lëndime trupore ka pësuar edhe e dyshuara A.R., të cilat dyshohet se i janë shkaktuar nga viktima- tani i ndjeri (F.H.,) për të cilat ka marr trajtim mjekësor në Qendrën Klinike Universitare të Kosovës (QKUK).

Ferizaj

Ndalohen dy persona për vrasjen e 32 vjeçarit në Ferizaj

Published

5 days ago

29 June, 2026

Redaksia

Policia e Kosovës ka dhënë detaje lidhur me vrasjen që ka ndodhur mbrëmë rreth orës 22:50, në një banesë në rrugën “Sejdi Sejdiu”në Ferizaj, ku një person ka humbur jetën dhe dy të tjerë janë ndaluar për 48 orë.

Viktima është identifikuar me inicialet F.H., 32 vjeç, ndërsa vdekja e tij është konstatuar në vendin e ngjarjes nga ekipi mjekësor.

“Gjatë ekzaminimit të vendit të ngjarjes është konstatuar një plagë që dyshohet se është shkaktuar nga arma e zjarrit. Në vendngjarje janë gjetur dhe sekuestruar një pistoletë dhe një gëzhojë.

Nga hetimet fillestare rezulton se ngjarja ka ndodhur në banesën e M.B. (48 vjeç), ku në momentin e incidentit ndodheshin aty bashkëshortja, si dhe vajza e tij A.R. (24 vjeçe). Kjo e fundit ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës (QKUK).

Pas ekzaminimit të vendit të ngjarjes, ekziston dyshimi i bazuar se rasti ndërlidhet me veprën penale “Vrasje e rëndë”.

Me vendim të prokurorit të rastit, i dyshuari M.B. është ndaluar për 48 orë. Po ashtu, edhe ndaj A.R. është lëshuar vendim për ndalim prej 48 orësh, mirëpo ajo vazhdon të mbetet nën trajtim mjekësor në QKUK.

Trupi i pajetë i viktimës është dërguar në Institutin e Mjekësisë Ligjore në Prishtinë për obduksion.

Sektori i Hetimeve Rajonale, në koordinim dhe autorizim të prokurorit të shtetit, është duke ndërmarrë veprime intensive hetimore për zbardhjen e plotë të rrethanave të këtij rasti”, thuhet mes tjerash në njoftimin e Policisë.