Ferizaj

Fillon renovimi i disa shkollave të Ferizajt

Published

8 years ago

07 July, 2018

Drejtoria e Arsimit në Ferizaj, ka filluar renovimin e disa shkollave fillore dhe të mesme në këtë komunë. Drejtori i Arsimit Afrim Llabjani, tha se riparimi i disa prej shkollave ka qenë mëse i nevojshëm, sepse në shumicën prej tyre shpesh janë rrezikuar edhe nxënësit.

“Komuna e Ferizajt ka paraparë që këtë vit të riparohen disa nga shkollat të cilat kanë qenë në një gjendje jo të mirë sa i përket çatisë së këtyre shkollave dhe posa ka përfunduar viti shkollor ne i kemi kontraktuar operatorët ekonomik të cilët i kanë fituar këto tendere që të fillojnë punimet në shkollat që duhet të rindërtohen, kështu që ne kemi filluar në shkollën “Pjetër Bogdani”, ”Çesk Zadeja”, pastaj është shkollën “Jeronim de Rada” dhe shkollën “Bilall Shala” në fashtin Lloshkobare, kemi parë që gjendja e tyre ka qenë jashtëzakonisht e keqe, gjatë çdo kohe me shi ka pas pikime në këto shkolla dhe kemi pasur dëmtime në këto shkollë dhe kështu që e kemi parë si urgjente të intervenohet në to dhe tani më me ndërrimin e tyre që po bëhet do t’i eliminojmë këto dobësi dhe do të krijojmë kushte më të mira për zhvillimin e procesit mësimor”, tha Llabjani.

Llabjani tha se intervenimet nëpër shkolla do të përfundojnë me kohë në mënyrë që të mos ketë pengesa në fillimin e vitit të ri shkollor.

“Gjithsesi që do të fillojnë me kohë, për këtë arsye ne kemi insistuar që të fillohet më herët në mënyrë që me 1 shtator të jemi të gatshëm për të filluar procesin mësimor në këto shkolla, po ashtu ne tani do të fillojmë edhe me mirëmbajtjen verore të shkollave ku do të bëhet lyerja e tyre, do të bëhet rregullimi, pastrimi i shkollave në mënyrë që me 1 shtator ne të jemi të gatshëm për të filluar”, tha ai.

Drejtori Llabjani tha se përveç këtyre katër shkollave, renovime do të ketë edhe në katër shkolla të tjera, të cilat do të financohen nga programi i efiçiencës.

Në gjendje jo të mirë është edhe objekti i shkollës së mesme ekonomike “Faik Konica”, i përuruar dy vite më parë, por sipas Llabjanit aty nuk mund të intervenohet pasi ende nuk është bërë pranimi teknik.

Ferizaj

Gjatë qershorit në Ferizaj janë konfiskuar 74 motoçikleta

Published

16 hours ago

02 July, 2026

Redaksia

Policia Rajonale e Ferizajt ka bërë të ditur se gjatë muajit qershor ka intensifikuar kontrollet në trafik ndaj drejtuesve të motoçikletave dhe skuterëve.

Si rezultat i këtyre kontrolleve, gjatë kësaj periudhe janë konfiskuar 74 motoçikleta, kryesisht për mungesë të dokumentacionit të rregullt derisa janë shqiptuar edhe 106 gjoba ndaj drejtuesve të motoçikletave, të cilët janë kapur duke qarkulluar në kundërshtim me rregullat dhe ligjet e komunikacionit rrugor.

Numri më i madh i gjobave janë shqiptuar për drejtim të motoçikletës pa patentë shofer, gjithsej 52 gjoba, 46 gjoba për drejtim të motoçikletës pa regjistrim dhe 8 gjoba për kundërvajtje të tjera.

Ferizaj

Prokuroria kërkon paraburgim ndaj të dyshuarës për vrasjen në Ferizaj

Published

3 days ago

29 June, 2026

Redaksia

Prokuroria Themelore në Ferizaj ka kërkuar nga Gjykata Themelore në Ferizaj, caktimin e masës së paraburgimit ndaj të pandehurës A.R., për shkak të dyshimit të veprës penale “Vrasja” sipas Kodit Penal të Republikës së Kosovës.

Sipas kërkesës së Prokurorisë, ekziston dyshimi i bazuar se me datë 28 Qershor 2026, rreth orës 22:40 në Ferizaj, rruga, “Sejdi Sejdiu”, e pandehura ka privuar nga jeta tani të ndjerin F.H., pas një mosmarrëveshje dhe përleshje fizike në mes tyre, me të cilën ka kryer veprën penale “Vrasja”, nga neni 172 të KPRK-së.

Ndërkaq, i dyshuari me iniciale M.B., që ishte ndaluar deri në sqarimin e plotë të rrethanave dhe përfshirjes së tij në rast, me aktvendim të Prokurorit të Shtetit është liruar.

Po ashtu, në këtë rast, lëndime trupore ka pësuar edhe e dyshuara A.R., të cilat dyshohet se i janë shkaktuar nga viktima- tani i ndjeri (F.H.,) për të cilat ka marr trajtim mjekësor në Qendrën Klinike Universitare të Kosovës (QKUK).

Ferizaj

Ndalohen dy persona për vrasjen e 32 vjeçarit në Ferizaj

Published

4 days ago

29 June, 2026

Redaksia

Policia e Kosovës ka dhënë detaje lidhur me vrasjen që ka ndodhur mbrëmë rreth orës 22:50, në një banesë në rrugën “Sejdi Sejdiu”në Ferizaj, ku një person ka humbur jetën dhe dy të tjerë janë ndaluar për 48 orë.

Viktima është identifikuar me inicialet F.H., 32 vjeç, ndërsa vdekja e tij është konstatuar në vendin e ngjarjes nga ekipi mjekësor.

“Gjatë ekzaminimit të vendit të ngjarjes është konstatuar një plagë që dyshohet se është shkaktuar nga arma e zjarrit. Në vendngjarje janë gjetur dhe sekuestruar një pistoletë dhe një gëzhojë.

Nga hetimet fillestare rezulton se ngjarja ka ndodhur në banesën e M.B. (48 vjeç), ku në momentin e incidentit ndodheshin aty bashkëshortja, si dhe vajza e tij A.R. (24 vjeçe). Kjo e fundit ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës (QKUK).

Pas ekzaminimit të vendit të ngjarjes, ekziston dyshimi i bazuar se rasti ndërlidhet me veprën penale “Vrasje e rëndë”.

Me vendim të prokurorit të rastit, i dyshuari M.B. është ndaluar për 48 orë. Po ashtu, edhe ndaj A.R. është lëshuar vendim për ndalim prej 48 orësh, mirëpo ajo vazhdon të mbetet nën trajtim mjekësor në QKUK.

Trupi i pajetë i viktimës është dërguar në Institutin e Mjekësisë Ligjore në Prishtinë për obduksion.

Sektori i Hetimeve Rajonale, në koordinim dhe autorizim të prokurorit të shtetit, është duke ndërmarrë veprime intensive hetimore për zbardhjen e plotë të rrethanave të këtij rasti”, thuhet mes tjerash në njoftimin e Policisë.